Cakacaka 18
18
Mai Korinica
1Sa oti na veika oqo, sa lako tani e Aceni ko Paula, ka yaco ki Korinica. 2A sa kunea kina e dua na Jiu na yacana ko Akuila, sa sucu mai Ponito, a sa qai lako walega mai Itali, kei na watina ko Virisila, ni sa vakarota ko Kilotiu me lako tani e Roma na Jiu kecega. A sa lako vei rau ko koya, 3ka ni ratou sa matai vata, sa tiko vata kei rau ko koya, ka cakacaka vata—ni ratou sa matai ni valelaca. 4A sa vunau e na valenilotu e na veisiga ni vakacecegu kecega, ka sa sasaga me rawai ira na Jiu kei ira na kai Kirisi. 5Ia ni sa lako mai Masitonia ko Sailasa kei Timoci, sa vakauqeti ko Paula, a sa dautukuna vei ira na Jiu ni sa Karisito ga ko Jisu. 6Ni ra sa qai vorata ka vosa vakacaca sa kureitaka na nona i sulu ko koya, ka kaya vei ira, “Ena baleti kemudou ga na nomudou rusa! Au sa sega ni cala kina. Me tekivu oqo, ka’u sa na lako vei ira na kai matanitu tani.” 7A sa lako tani eke, ka curu ki na nona vale e dua, a yacana ko Taito Jusito, a tamata sa lotu tiko vua na Kalou, a sa voleka ki na valenilotu na nona vale. 8A sa vakabauta na Turaga ko Kirisipo, na turaga ni valenilotu, kei ira kecega na nona lewe-ni-vuvale; a sa lewe vuqa na kai Korinica ni ra sa rogoca, era sa vakabauta, ka ra sa papitaisotaki. 9Sa qai kaya vei Paula na Turaga e na bogi e na raivotu, “Kakua ni rere, mo vosa ga, ka kua ni ko galu; 10ni ka’u sa tiko vata kei iko, ka na sega e dua me sagai iko me vakacacani iko, ni sa lewe vuqa na noqu tamata e na koro oqo.” 11A sa tiko mai kea ko koya ka yabaki dua ka vula ono, ka dauvakavulici ira e na vosa ni Kalou.
Era sa Vesuki Paula na Jiu
12Ia ni sa turaga mai Akaia ko Kalio, era sa lomavata na Jiu me ra tauri Paula vakaukauwa, a ra sa kauta ki na mata ni tikotiko ni veilewai, 13ka kaya, “Ko koya oqo sa vakavulici ira na tamata me ra qarava na Kalou e na sala ka sa sega ni vaka na vunau.” 14Ia ni sa vakarau vosa ko Paula, sa kaya vei ira na Jiu ko Kalio, “Oi kemudou na Jiu, kevaka sa dua na ka e kovei, se dua na ca levu, e dodonu me’u vosoti kemudou. 15Ia kevaka e veiletitaki nai vakavuvuli, kei na yaca eso, kei na nomudou vunau, dou lewa ga. Ni ka’u sa sega ni via lewa na veika vakaoqo.” 16A sa vakasevi ira tani e na mata ni tikotiko ni veilewai. 17A ra sa qai tauri Sosiceni na turaga ni valenilotu, ka vaculaka e na mata ni tikotiko ni veilewai. A sa weletaka na ka kecega oqo ko Kalio.
Lesu Tale ki Anitioki ko Paula
18 #
Tiko 6.18
Sa oti oqori sa tiko ga ko Paula ka dede, a sa qai tatau vei ira na veiwekani, ka soko ki Siria, ko iratou vata kaya ko Virisila kei Akuila. A sa tasia mada na uluna mai Kenikiria, ni sa vauci e na dua na bubului. 19Ni sa yaco ki Efeso, a sa biuti rau e kea, ia sa curu taumada ko koya ki na valenilotu, ka vakavulici ira na Jiu. 20Ni ra sa masuta me tiko dede vei ira, sa sega ni vakadonuya ko koya; 21ia sa tatau ga vei ira, ka kaya, “Au na lesu tale mai vei kemudou, kevaka e vinakata na Kalou.” A sa qai soko yani mai Efeso ko koya.
22Ni sa sobu ki Sisaria, sa lako cake (ki Jerusalemi), ka veikidavaki kei ira nai soqosoqo lotu, sa qai lako sobu ki Anitioki. 23Ia ni sa tiko dede vakalailai, sa qai lako tani, a sa lakova vakadodonu voli na vanua ko Kalatia, kei Firijia, a sa vakataudeitaki ira kecega era sa lotu.
Ko Apolosa Mai Efeso kei Korinica
24A sa dua na Jiu na yacana ko Apolosa, sa sucu mai Alekisadria, na tamata sa dauvosa vakamatata, ka sa kila vinaka nai Vola Tabu ko koya, sa tadu yani ki Efeso. 25Sa vakatavulici ko koya oqo e na Sala ni Turaga. Ia sa daukatakata na yalona ni sa tukuna ka vunautaka vakadodonu ko koya na veika me baleta na Turaga, ia sa kila walega ko koya na papitaiso i Joni. 26A sa vakatekivu me vosa doudou e na valenilotu, ia ni rau sa rogoca ko Akuila kei Virisila, erau sa qai kauti koya vakatikitiki, ka rau vakamacalataka vinaka vua na Sala ni Kalou e na kena ka dodonu. 27Ia ni sa via lako yani ki Akaia ko koya, era sa vakauqeti koya kina ko ira na veiwekani ka ra sa volavola, ka masuti ira na tisaipeli me ra kidavaki koya. Ia ni sa yaco kina ko koya, sa vukei ira vakalevu era sa vakabauta e na vuku ni loloma, 28ni sa ka gumatua sara na nona rawai ira votu na Jiu, e na veileti kei ira, ka vakatakila mai nai Vola Tabu ni sa Karisito ko Jisu.
Currently Selected:
Cakacaka 18: FRV21
Highlight
Share
Copy
Want to have your highlights saved across all your devices? Sign up or sign in
