Cakacaka 17
17
Na Vakatubu Ue mai Cesalonaika
1Ia ni ratou sa lako sivita yani na vanua ko Amifipoli kei Apolonia, eratou sa yaco ki Cesalonaika, ka sa tu kina e dua na nodra valenilotu na Jiu. 2A sa curu ki loma ko Paula, me vaka na nona i valavala, ka sa tolu na Siga ni Vakacecegu sa veiwasei kina kei ira mai nai Vola Tabu, 3ni sa vakamacalataka ka vakadinadinataka, ni sa kilikili kei na Karisito me vosota na mate, ka tucake tale mai na mate, ka vaka, “Ni sai koya na Karisito, ko Jisu oqo, ko koya ka’u sa vunautaka vei kemudou.” 4A sa vakabauta ko ira eso, ka laki veitokani kei Paula kei Sailasa, kei ira e lewe vuqa na kai Kirisi era a lotu vaka-Jiu, kei na lewe vica wale na marama dauveiliutaki. 5Ia era sa qai vuvu ko ira na Jiu, ka ra sa kauta eso vei ira na dauvakacaca, ka ra sa vakasoqoni ira vata na lewe vuqa, ka vakatubu ue e na koro. A ra sa curuma vakaukauwa na vale i Jesoni, ka ra sa segata me ra kauti iratou vei ira na lewe ni koro. 6E na vuku ni nodra sa sega ni kunei iratou, era sa qai yarataki Jesoni kei ira na veiwekani eso vei ira na turaga ni koro, ka kaci, “O iratou oqo eratou sa vukici vuravura me ca, eratou sa tadu talega mai ki ke, 7ka sa kauti iratou ko Jesoni ki na nona vale. Era sa talaidredre ko ira kecega oqo ki na vunau i Sisa, ni ra sa kaya sa dua tale na tui, ko Jisu.” 8A ra sa kidroa na lewe ni koro kei ira na kena turaga ni ra sa rogoca na veika oqori. 9Ia ni ra sa vakadeitaka oti na veika me na sauma ko Jesoni kei ira na kena vo, era sa sereki ira me ra lako.
Ko Paula kei Sailasa mai Peria
10Ko ira na veiwekani era sa kusarawa me ra talai Paula kei Sailasa ki Peria e na bogi; ia ni rau sa yaco kina, erau sa lako ki na nodra valenilotu na Jiu. 11A ra sa uasivi vei ira na kai Cesalonaika ko ira oqo e na yalo vakaturaga, ni ra sa vakarogoca na vosa e na loma e vinakata sara, ka ra sa dauvakasaqaqara e nai Vola Tabu e na veisiga, se sa dodonu vakakina na veika oqori, se segai. 12O koya ga oqo era sa lewe vuqa kina era sa vakabauta, kei ira talega na marama ni Kirisi, kei ira na tagane, era sa sega ni lewe lailai. 13Ia ni ra sa kila ko ira na Jiu mai Cesalonaika ni sa vunautaka na vosa ni Kalou ko Paula mai Peria, era sa lako talega kina, ka vakayavalati ira na lewe vuqa. 14A ra sa kusarawa kina na veiwekani me ra vakauti Paula yani me lako vaka ki na wasawasa, ia erau sa tiko laivi ga mai kea ko Sailasa kei Timoci. 15Ko ira sa vakaraici Paula era sa kauta koya sara ki Aceni; ia ni sa tau vei ira nai vakaro vei Sailasa kei Timoci me rau lako kusarawa mai vua, era sa qai lako.
Ko Paula mai Aceni
16Ia ni sa waraki rau tiko mai Aceni ko Paula, sa katakata vakalevu na lomana, ni sa raica sa sinai na koro e na veimatakau. 17O koya sa veileti kina ko koya kei ira na Jiu e na nodra valenilotu, kei ira talega na tani era sa lotu, kei ira talega era sa sota kaya e na rara ni veivoli e na veisiga. 18Sa qai veileti kaya, eso na nodra vuku nai tokani i Epikuro, kei ira na Sitoike. Ka sa kaya eso, “A cava mada sa via kaya o la na dauvosa oqo?” Eso tale era kaya, “Ko koya oqo sa vaka e dua sa vakatakila mai eso na kalou vou.” (Oqo e baleta ni a vunautaki Jisu tiko vei ira ko koya kei na nona tucake tale mai na mate.) 19A ra sa qai taura, ka tubera ki na vanua-cecere nei Arisi, ka kaya, “Ena rawa beka me keimami kila se cava nai vakavuvuli vou oqo ko sa mai tukuna? 20Ni ko sa kauta mai eso na veika e vulagi ki na daligaimami, ka keimami sa via kila kina se cava nai balebale ni veika oqo.” 21(Ni sa sega na ka tani era sa daukitaka ko ira kecega na kai Aceni, kei ira na vulagi era sa tiko kina, me ra veitukutukunitaka ga se rogoca, e dua na ka vou.)
Na Vosa i Paula Mai Aceni
22Sa qai wavu tu ko Paula e na loma ni vanua-cecere nei Arisi, ka kaya, “Oi kemuni na kai Aceni, au sa kunea e na ka kecega ni kemuni sa dausoro vakalevu. 23Io, ni’u sa lako voli, ka raica na veika kemuni sa soro kina, au sa kunea talega e dua nai cabocabo-ni-soro sa volai kina: ‘Vua na kalou e tawa kilai.’ Ia ko koya ko ni sa soro kina ni kemuni sa sega ni kila, au sa qai tukuna oqo vei kemuni. 24#1Tui 8.27; Aisea 42.5; Caka 7.48Na Kalou ka buli vuravura kei na ka kecega sa tu kina, sa Turaga ga ko koya mai lomalagi kei vuravura, ka sa sega ni tiko e na veivale ni soro sa caka e na liga; 25ka sa sega talega ni qaravi e na liga ni tamata, me vaka e bau yaga vua e dua na ka, ni sa solia ga ko koya vei keda kecega na bula, kei na cegu, kei na ka kecega. 26A sa buli ira, era sa dra vata, na lewe ni veivanua kecega, me ra tiko e na dela i vuravura taucoko, ka sa lesia na veigauna ka digitaki eliu, kei nai yalayala ni nodra veiyasana, 27me rawa ni ra vakasaqara kina na Kalou, de ra vakayayamo beka vua, ka kunei koya—ia sa sega ga ni yawa ko koya vei keda yadua. 28Me vaka ‘ni da sa bula e na vukuna, ka yavala, ka rawata mai vua na noda bula’; me vaka talega sa kaya na nomuni dau-ni-vucu eso,
‘Ni da sa nona kawa talega koi keda.’
29Oqo, ni da sa kawa ni Kalou, e sega ni dodonu kina me da nanuma sa tautauvata na Kalou kei na koula, se na siliva, se na vatu sa ceuta na matai se na tamata vuku. 30Na gauna ni noda lialia sa vosota oti na Kalou, ia sa vakarota ga e na gauna edaidai vei ira na tamata kecega e na veivanua kecega me ra veivutuni, 31baleta ni sa lokuca oti ko koya na siga ena lewai vuravura kina e na lewa dodonu, vei koya na tamata sa lesia ko koya; ka sa vakadinadina kina vei ira na tamata kecega e na nona vakaturi koya cake tale mai na mate.”
Na Veika sa Yaco ena Vuku ni Vosa i Paula
32Ia ni ra sa rogoca na tucake tale mai na mate, sa vakalialia ko ira eso; ka so sa kaya, “Keitou na rogoci iko tale e na ka oqo.” 33Sa qai lako tani yani e na kedra maliwa ko Paula. 34A sa kabiti koya eso na tamata, a ra sa vakabauta; e dua vei ira ko Taionisio mai na mataveilewai mai na vanua-cecere nei Arisi, kei na yalewa sa vakatokai ko Tamarisi, koi rau kei ira tale eso.
Currently Selected:
Cakacaka 17: FRV21
Highlight
Share
Copy
Want to have your highlights saved across all your devices? Sign up or sign in
