मत्ती 2
2
स्यारलाःम्ले मीःक्या येशूला फ्या छाल्जेला ओःङ्क्योक
1हेरोद क्याःल्बुइ समयला यहुदियाइ बेथलेहेम युःलला येशू केमीःजीक, स्यारकीइ ज्योतिषीक्या यरूशलेमला लेप्सी ओःले 2खुङक्याइ लाःसी, “यहूदीक्याइ क्याःल्बु काःल्दी केक्योक पीःजा काःला एःपा? चीलेलाःना खुङगीइ कार्मा स्यार्कासुना ङीःइ थोङ्सी ओःले खुङला फ्या छाल्जेला ओःङ्दी एः।”
3दीखो ताम कोःदी हेरोद क्याःल्बु छाबा छुबे काःल्सी, ओःन्डुलेरा यरूशलेमगीइ मीःक्याइ सेममाङ छाबाछुबे काःल्सी। 4ओःले खुङगीइ थाम्जेर छेस्यो पूजाहारीक्या ओःले धर्मगुरुक्याला रुःप जोसी, ओःले टीःसी, “थार्च्युगेन ख्रीष्ट काःला केगेन एःपा?” 5खुङक्याइ लाःसी, “यहुदियाइ बेथलेहेम युःलला चीलेलाःना छ्येइ पेज्याला कोन्ज्योइ लेःङ्गो तेर्केन्दीइ दीखोइ बारेला एःन्डुले प्रुःदी एः,
6‘ए यहुदियाइ बेथलेहेम,
ख्यो यहुदियाइ सहरक्याइ कील्ला काःन्डुबा पेःदीङ छीमी म्याः,
चीलेलाःना ख्योलाःम्ले क्याःल्बु चीग थेङ्दी ओःङेन एः,
ओःले खुङगीइरा कोःरालुइ च्योःङ्रारा ङाःइ मीःक्या इस्राएलला तागेन एः।’#मीका ५:२”
7दीखो ताम कोःदी हेरोदकीइ ओः स्यारलाःम्ले ओःङ्क्योक ज्योतिषीक्याला छ्यो चीगला खेर्ती टीःसी ओःले कार्मा थोङ्क्योक समय छोर्सी। 8ओः तीङ्ला खुङगीइ ज्योतिषीक्याला बेथलेहेमला ताङ्देरा लाःसी, “ख्याक्या सुङ ओःले ओः पीःजाला छोल्दो। खुङला फ्रेमीःजीक ङाःला लेःङ्गो ना ओःले ङाःङ काःल्दी खुङला फ्या छाल्गे।”
9ओःले क्याःल्बुइ लाःक्योक ताम कोःदी खुङक्या राःङगीइ लाःम स्युःसी। तोःङ्ला स्यारला थोङ्क्योक कार्मा खुङक्याइ फीर्च्या थोङ्सी। ओःखो कार्मा खुङक्याइ तोःङ तोःङ्ला काःल्सी ओःले पीःजा एःक्योक ठाउँगीइ चोला लेःप्मीजीक ओःखो कार्मा ओःलारा तेःसी। 10ओःले खुङक्याइ ओः कार्माला थोङ्दी खुङक्या माःङ्बुरा खाम्साङ्बु काःल्दी केःदाङ पेःसी।
11ओःले ओः खीमला लेप्मीःजीक खुङक्या नाःङ्ला स्युःसी ओःले पीःजाला खुङगीइ आमा मरियमङीमु थोङ्सी, ओःले खुङक्याइ खाप्लु क्याःप्ती पीःजाला फ्या छाल्सी। ओःले राःङगीइ काःम फ्यादी खुङला सेर, सीःम्बु टीःमाइ साङ ओःले सीःम्बु टीःमा तेर्केन माःर्कु भेटी च्योल्सी।
12ओःले हेरोदसाःला लोःदी माःन्डो लाःती मीलामला कोन्ज्योइ आज्ञा ज्योर्ती खुङक्या राःङ्सारा लाःम पेःदी राःङगीइ देशला लोःसी।
योसेफ रा मरियम मिश्रला छ्योङ्क्योक
13ओः ज्योतिषीक्या काःल्सीःङमीःजीक योसेफकीइ मीलामला प्रभुइ स्वर्गदुतला थोङ्सी ओःले स्वर्गदुतकीइ खुङला लाःसी, “लोःङ ओःले गेबुरा आमा पुःला खेर्ती मिश्रला छ्योङ्दो। ओःले ङाःइ लोःदी स्यो माःलापथुप ख्योक्या ओःला तेः चीलेलाःना पीःजाला सेचेला हेरोदकीइ छोल्देरा एः।”
14एःन्डुबा मीलाम थोङ्मीःजीक योसेफकीइ आमा पुःला खेर्ती कुःङ्मुरा मिश्र देशछ्योले काःल्सी। 15ओःले हेरोद मासीथुप खुङक्या ओःलारा तेःसी। प्रभुइ राःङगीइ लेःङ्गो तेर्केन मीःइ लाःक्योक ताम पुरा डोजेला दी ताम काःल्क्योक इःङे, “ङाःइ मिश्र देशलाःम्ले राःङगीइ पुःला केक्याःप्सी।”#होशे ११:१
हेरोदकीइ पीःजाक्याला सेच्युक्योक
16ज्योतिषीक्याइ राःङला स्योप क्युःर्क्योक ताम छोर्मीःजीक हेरोद सीःताङगीइ मार्थुम खील्सी। ओः सोङ्गारा, थेक्या ताङ्दी बेथलेहेम ओःले ओःलाइ छुरफारकीइ लोः ङी ओःले ओः भन्दा छीमी पुः पीःजाक्या थाम्जेरला सेकेन आज्ञा तेर्सी। ओः ज्योतिषीक्याइ कार्मा थोङ्क्योक समय अनुसार खुङगीइ दी लेःगा पेःदी एःके। 17ओःले कोन्ज्योइ लेःङ्गो लाःकेन यर्मियालाःम्ले लाःक्योक ताम पुरा काःल्सी,
18“रामाला छ्योम्बो के चीग कोःदेरा एः,
ङुःदेरा पेःक्योक ओःले तुःङाल पेःक्योक के।
राहेल राःङगीइ पीःजाक्याइ लागी ङुःदेरा एः।
खुङला सुइयाङ छ्याबे ज्यामाःखु
चीलेलाःना थाम्जेर पीःजा सीदी एः।”#यर्मिया ३१:१५
19हेरोद सीमीःजीक प्रभुइ स्वर्गदूत मिश्र देशला योसेफसाःला मीलामला थोङ्सी, 20ओःले एःन्डु लाःसी, “लोःङ, पीःजा ओःले खुङगीइ आमा ङीमुरा खेर्ती इस्राएल देशला लोदी सुङ, चीलेलाःना पीःजाला सेचे छोल्गेन मीःक्या सीसीःङ्दी एः।” 21ओः सोङ्गारा, खुङ लाःङ्दी पीःजा ओःले पीःजाइ आमाला ङीमुरा खेर्ती इस्राएल देशला लोःसी।
22इःनाङ हेरोदकीइ पुः अर्खिलाउस यहुदियाइ क्याःल्बु काःल्दी एः लाःक्योक ताम कोःदी योसेफ ओःछ्योले डोजेला जीसी। खुङला मीलामला कोन्ज्योइ चेतावनी तेर्क्योक सोङ्गारा खुङ गालील प्रदेशला काःल्सी। 23खुङ काःल्दी नासरत लाःकेन सहरला तेःसी। एःन्डुले कोन्ज्योइ लेःङ्गो तेर्केन मीःक्यालाःम्ले लाःक्योक ताम पुरा काःल्सी, “खुङला नासरी लाःकेन एः।”
Currently Selected:
मत्ती 2: SYW
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.