मत्ती 1
1
येशू ख्रीष्टकीइ फाफामुक्या
(लूका ३:२३-३८)
1अब्राहाम ओःले दाउदकीइ छार्क्युफुर्क्यु येशू ख्रीष्टीकीइ फाफामुक्या दीक्यारा इःङे– 2अब्राहाम इसहाककीइ आबा एःके, इसहाक याकूबकीइ आबा एःके, याकूब यहुदा रा खुङगीइ आतानोःक्याइ आबा एःके, 3यहुदादी फारेस रा जाहेरकीइ आबा एःके (खुङक्याइ आमा तामार एःके), फारेस हेस्रोनगीइ आबा, हेस्रोन आरामगीइ आबा, 4आराम अम्मीनादाबकीइ आबा, अम्मीनादाब नहशोनगीइ आबा, नहशोन सल्मोनगीइ आबा, 5सल्मोन बोअजकीइ आबा एःके (बोअजकीइ आमा राहाब एःके), बोअज ओबेदकीइ आबा एःके (ओबेदकीइ आमाइ मीःनदी रूथ एःके), ओबेत यिशैगीइ आबा, 6यिशै दाउद क्याःल्बुइ आबा एःके।
दाउद सोलोमनगीइ आबा एःके (सोलोमनगीइ आमा तोःङ्ला उरियाहइ पेःमे एःके), 7सोलोमन रहबामगीइ आबा, रहबाम अबियाइ आबा, अबिया आसाइ आबा, 8आसा यहोशापातकीइ आबा, यहोशापात यहोरामगीइ आबा, यहोराम उज्जियाहइ आबा, 9उज्जियाह योतामगीइ आबा, योताम आहाजकीइ आबा, आहाज हिजकियाइ आबा, 10हिजकिया मनश्शेइ आबा, मनश्शे अमोनगीइ आबा, अमोन योशियाहइ आबा, 11योशियाह यकोनियास रा खुङगीइ नोःक्याइ आबा एःके, खुङक्यादी यहूदीक्याला बेबिलोन देशला बन्दी जोदी खेर्केन समय तोःङ्ला केःदी एःके।
12खुङक्याला बेबीलोन देशला बन्दी जोदी खेर्मीःजीक यकोनियास शालतिएलगीइ आबा एःके, शालतिएल यरुबाबेलगीइ आबा, 13यरुबाबेल अबिउदकीइ आबा, अबिउद एल्याकीमगीइ आबा, एल्याकीम आजोरकीइ आबा, 14आजोर सादोककीइ आबा, सादोक आखिमगीइ आबा, आखिम एलिउदकीइ आबा, 15एलिउद एलाजारकीइ आबा, एलाजार मत्तानगीइ आबा, मत्तान याकूबकीइ आबा, 16याकूब योसेफकीइ आबा एःके, खुङ येशूइ आमा मरियमगीइ ख्योबो एःके, मरियमगीइरा थार्च्युगेन ख्रीष्ट लाःकेन येशूला केसी।
17एःन्डुले अब्राहाममीःजीक दाउदथुप पुस्ता च्युप्सी काःल्सी ओःले दाउदमीःजीक इस्राएलीक्याला बेबीलोनला बन्दी जोदी खेर्क्योक बेलाथुप च्युप्सी पुस्ता काःल्सी। ओःले ओः समयमीःजीक थार्च्युगेन खीष्ट केगेन समयथुप च्युप्सी पुस्ता काःल्सी।
येशू ख्रीष्टकीइ केबु
(लूका २:१-७)
18येशू ख्रीष्टकीइ केबु एःन्डुले काःल्सी– खुङगीइ आमा मरियम योसेफला लाङ्दी एःके, इःनाङ खुङक्याइदी याःर्का क्याःप्चे तोःङ्लारा मरियम चाङ्मा लालाःम्ले जुबु ङीःपाक काःल्दी एःके। 19इःनाङ योसेफ ताःक्पा मीः एःक्योक सोङ्गारा, खुङला ङोःछाबु माःजोबा पेःदी खुङला नाःङ-नाःङ्लारा पोःर्तेकेन सेम पेःसी। 20खुङगीइ एःन्डुबा ठीवा चेतेरा एःकासुना, मीलामला प्रभुइ स्वर्गदुत चीग खुङसाःला थोङ्सी, ओःले खुङला एःन्डु लाःसी, “योसेफ, दाऊदकीइ छार्क्युफुर्क्यु, मरियमला ख्योइ पेःमे जोजेला स्वीकार पेःजेला माःजी, चीलेलाःना खुङ चाङ्मा लाइ ल्हेलाःम्ले जुबु ङीःपाक काःल्योक इःङे। 21खुङगीइ पुः चीग केगेन्दी एः, ओःले ख्योइ खुङगीइ मीःन येशू#१:२१ येशू येशू लाःकेन शब्ददी हिब्रु तामगीइ “यहोशु” लाःकेन शब्द इःङे, ओःखो लाःक्योक दी “प्रभुइ थार्च्युए।” ज्यो, चीलेलाःना खुङगीइ राःङगीइ मीःक्याला खुङक्याइ लाःयोलाःम्ले थार्च्युगेन एः।”
22कोन्ज्योइ लेःङ्गो तेर्केनलाःम्ले प्रभुइ लाःक्योक ताम पुरा डोजेलारा दीखो थाम्जेर ताम काःल्क्योक इःङे– 23“तादो, कन्या पेःन्पीःजा जुबु ङीःपाक ओःङेन एः ओःले खुङगीइ पुः चीग केगेन एः। ओःले मीःक्याइ खुङला इम्मानुएल लाःकेन एः।”#यशैया ७:१४ (इम्मानुएल लाःक्योकदी कोन्ज्यो उःङीमु एः लाःक्योक इःङे।)
24योसेफ ङी छेसी ओःले प्रभुइ स्वर्गदुतकीइ मीलामला लाःक्योक ताम ङीःन्दी मरियमला याःर्का क्याःप्ती राःङङीमु ख्योङ्सी। 25इःनाङ मरियमगीइ पुः माकेथुप योसेफ मरियमङीमु तेन चीगला माःङ्याल। मरियमगीइ पुः केमीःजीक योसेफकीइ ओः पीःजाइ मीःन येशू ज्यासी।
Currently Selected:
मत्ती 1: SYW
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.