रोमी 2

परमेश्वर सोबी के लेखाजोखा नेन्ता

1तोउं त, ए होरी पुठ दोष लाणे बाड़िओ! तुसी केईं कोई बहाना नेईं बचो। किस कि जेस बोक अन्तर तुस होरी पुठ दोष लान्ते, तेस बोक अन्तर तुस अपफ बि दोषी भुन्ते, किस कि तुस जेस बोके दोष होरी पुठ लान्ते, अपफ तेस कम कते। 2अस जाणते कि ईं ईं कम करणे बाड़ी पुठ परमेश्वरे कनारा ठीक ठाक सज्जा मेण असी। 3ए ट्यारेओ! तुस जे ईं ईं कम करणे बाड़ी पुठ दोष लान्ते, पर अपफ बि ईं कम कते, तुस कि ई समझते ना कि तुस परमेश्वरे सज्जाई केआं बच घेन्ते? कदी ना! 4तुस तसे कृपादृष्टि, सीढ़णे हिम्मत त तुसी जुए लाह रखण घट ना माने, बल्कि ई समझे कि परमेश्वरे कृपादृष्टि तुसी अपु मन बदलाई कइ तस जुए मीणे मौका देन्ती। 5पर तुसी त अपु मन नकठर कइ रखो असे, होर अपु जीण नेईं बदलो। ई कर कइ तुस तेस लेहरी रोजे लिए अपफ जे परमेश्वरे लेहेर किठि करण लगो असे, जेस रोज परमेश्वरे सच्चा न्याय सोबी के सामणि एन्ता। 6तपल से हर यक जेईं तसे कमे हेसाब जुए फल देन्ता। 7परमेश्वर तेन्के धे अमर जीवन देन्ता, जे लाह रख कइ खरु कम कते रेहन्ते, ताकि तेन्हि जे परमेश्वर खरु बोलियाल, इज्जत दियेल, होर से तस जुए हमेशा बिशियेल। 8पर परमेश्वर तेन्हि पुठ लेहेर किढ़ता त भयंकर कोप कता, जे मतलबी असे त सच्चाई छड़ कइ अधर्म कते। 9त हर यक तेस मेह्‍णु पुठ ती दुख त कष्ट एन्ता, जे बुरा कता। पेहले त यहूदी मेह्‍णु पुठ, तोउं गैर यहूदी#2:9 मूल भाषा अन्तर “यूनानी मेह्‍णु पुठ” लिखो असु। पुठ। 10पर परमेश्वर तेन्हि सोबी जे खरु बोता, तेन्हि इज्जत देन्ता त तेन्के भलाई कता जे भले कम कते। पेहले यहूदी मेह्‍णु के, तोउं गैर यहूदी के। 11किस कि परमेश्वर कदी केहर-बेहर ना कता।

12परमेश्वरे नियम मेणे बगैर जेन्हि पाप किए, तेन्हि बगैर नियमे अपु गलती लिए सज्जा मेती। होर जेन्हि नियम मेई गो असे, तेन्के सज्जा नियमे हेसाब जुए भुन्ति। 13किस कि परमेश्वरे सामणि नियम शुणणे बाड़े धर्मी नेईं, पर नियम मान कइ जीणे बाड़े धर्मी बणते। 14त जपल बि गैर यहूदी मेह्‍णु जेन्हि केईं परमेश्वरे नियम नेईं, अपु सभावे हेसाब जुए तेन्हि कमी कते, जे परमेश्वरे नियमे हेसाब जुए असे त तेन्हि जे सेईंए परमेश्वरे नियम भो। 15-16ईं कर कइ से नियमे बोके अपु अपु मन अन्तर लिखो हरालते त तेन्के अन्तरात्मा बि परमेश्वरे नियमे उगाही देन्ती। में खुश खबरी हेसाब जुए, जेस रोज परमेश्वर यीशु मसीहे बेलिए मेह्‍णु के नियको बोकी के न्याय करियाल, तेस रोज तेन्के अन्तरात्मा ईं तेन्हि दोषी बणान्ती या नरदोष कती।

नियम त यहूदी मेह्‍णु

17पर तोउ अपु पता असा ना? तु जे अपफ जे यहूदी बोता, परमेश्वरे दुतो नियम पुठ भरोसा कता, परमेश्वर जुओई अपु रिश्ते बारे रोभ लान्ता, 18तसे इच्छा जाणता त तसे नियमे शिक्षा मेणे बेलि खरी खरी बोकी जुए साथोठ देन्ता। 19अगर तु अपु अपफ जे पूरे भरोसे जुए बोता कि “अउं अन्ही बत हरालणे बाड़ा भो, अन्हारे अन्तर बिशो मेह्‍णु के दीया भो, 20मुर्खी शिचालणे बाड़ा भो, गभुरु उपदेश देणे बाड़ा भो।” होर तु बोडे अक्कड़ जुए बोता कि ज्ञाने त सच्चाई नमूना, जे नियम असा, मोउं मेओ असा। 21त कि तु जे होरी शिचालता, अपु अपफ ना शिचता ना? पर अउं बोता कि तु जे होरी ना चोरणे सलाह देन्ता, अपफ चोरुण छड़ दे। 22तु जे बोता कि “नाजायज रिश्ता ना रख” अपफ केसे जोई नाजायज रिश्ता ना रख। तु जे मुर्ति के बुराई कता, तु अपफ देहरी अन्तरा चोर नउ। 23तु त परमेश्वरे नियम मेणे बारे अक्कड़ लान्ता, त नियम ना मान कइ तसे बेज्जती ना कर। 24किस कि धरमे कताब अन्तर लिखो असु कि

“तुं बझई जोई ईं गैर यहूदी मेह्‍णु परमेश्वरे बेज्जती करण लगो असे।”#यशायाह 52:5

25अगर तु यहूदी मूसे दुतो नियम मान कइ जीन्ता त खतना करणे फायदा असा। पर अगर तु नियम ना मानियेल त तें खतना करणे कोई फायदा नेईं। 26होर अगर गैर यहूदी मेह्‍णु बगैर खतने बि नियम मानियेल, त परमेश्वर तस धर्मी मानता। 27तोउं त, जे मेह्‍णु जिसमे हिसाब जोई बगैर खतने असा, पर अगर से नियम पूरा कता, त कि से तोउ दोषी बड़ाई ना छता ना, किस कि तु नियम जाण कइ बि त अपु जिसमे खतना कर कइ बि नियम ना मानता? 28किस कि सच्चा यहूदी से ना भो जे बाहरीआ केता, होर ना सच्चा खतना से असा, जे बाहरीआ केता त जिसम पुठ भुन्ता। 29पर सच्चा यहूदी सेईंए भो, जे नियम मानता, होर सच्चा खतना सेईंए भो, जे मन अन्तर भुन्ता, ना कि केणे बाड़े जिसम पुठ भुन्ता। एन्के ईं मेह्‍णु के तारीफ मेह्‍णु के बेलिए ना, बल्कि परमेश्वरे बेलि भुन्ति।

Currently Selected:

रोमी 2: pgg

Highlight

Compare

Copy