रोमी 3
3
1तुं बुचा मोखयाल कोउं जेईं ई बोलियाल, “त यहूदी भोई कइ जमणे की फायदा असा, होर अपु खतना कर कइ की फायदा असा?” 2अउं बोता कि हर यक कनारा तेन्के फायदा असा। सोबी केआं पेहले त ई कि परमेश्वरे अपु वचन तेन्के पुरखी के जिम्म छो थिआ। 3तेन्हि बिचा अगर केहि यकीन लेएक ना भुए त कोई गल नेईं। तेन्के यकीन लेएक ना भुणे बेलिए परमेश्वरे सच्चाई झुठी थोड़ी बणती? 4कदी ना! चहे सोब मेह्णु झूठे बणियेल, पर परमेश्वर हमेशा सच्चा असा, जीं कि धरमे कताब अन्तर लिखो असु,
“ताकि तु अपु बोकी अन्तर धर्मी बणाल,
होर न्याय कते टेम तु हमेशा जीताल।”#छुआंरी 51:4
5पर, हें अधर्मे कमी के बेलि अगर परमेश्वरे न्याय त धरम सुआ सुसुर केता, त असी की बोलुण? कि ईं ना कि परमेश्वर इरुह लेहेर किढ़ता त सज्जा देन्ता? ई अउं मेह्णु के हेसाब जुए बोलुण लगो असा। 6ईं कदी ना भोई सकतु कि परमेश्वर इरुह लेहेर किढ़ता! ना त से मतोके न्याय कीं कइ सकता? 7मोखयाल कोउं जेईं ई बोलियाल कि “अगर में झूठे बझई जोई परमेश्वरे सच्चाई केती होर तसे महिमा बधती, त फि किस अउं दोषी बणाई कइ सज्जाई हकदार बणाई छो असा? 8तोउं त खरु ई असु कि अस बुराई कते रिहे, ताकि तसे भलाई निस्ती रिहेल।” केहि मेह्णु असी पुठ ईं बोलुणे झूठा दोष बि लान्ते। पर परमेश्वर एन्हि मेह्णु पुठ दोष लाई कइ कोई गलत न कता।
कोई धर्मी नेईं
9तोउं एसे मतलब की भुआ? अस यहूदी कि तेन्हि गैर यहूदी मेह्णु केआं खरे असे ना? कदी ना; किस कि मेईं पेहलाई बोल छो असु कि यहूदी त गैर यहूदी दुहे पापे वश अन्तर असे। 10जीं कि धरमे कताब अन्तर लिखो असु :
“कोई बि धर्मी नेईं, यक जेईं बि नेईं।
11कोई ईं नेईं, जे सही की असु समझ सकियेल;
ईं कोई नेईं जे परमेश्वरे इच्छा मनण चहन्ता।
12परमेश्वर केईआं सोब उलाठ घेई गो असे,
सोब नकम्मे बण गो असे;
कोई भलाई करणे बाड़ा नेईं,
यक बि नेईं।#छुआंरी 14:1-3; 53:1-3
13तेन्के टेठु केईं खुली कब्रे ईं कुस्तुरी कुस्तुरी बोके निस्ती,
तेन्के मुंह केआं कपटी कपटी बोके घते छोए ईं निस्तु।#छुआंरी 5:9
तेन्के जिभुड़ पुठ कीड़े ईं जेहेर भुन्ता।#छुआंरी 140:3
14तेन्के आसी बइ सद शराप त ग्या निस्ती।#छुआंरी 10:7
15तेन्के हथ खुर मेह्णु मारण जे दौड़ते;
16जेन बइ से कुमुले हंटते, तेस जगाई कदी पूरा ना भुन्ता।
17तेन्हि शान्ति त भाईचारे जुए बिशुण ना एन्तु।#यशायाह 59:7,8
18तेन्हि परमेश्वर हेर कइ बि कोई डर ना लगता।”#छुआंरी 36:1
19अस जाणते कि नियम अन्तर जे कुछ बि असु, से सोब तेन्हि जे असु जे नियमे वश अन्तर असे; ताकि परमेश्वरे सामणि कोई जेईं बि किछ बहाना ना बणाल, होर पूरा मतोक परमेश्वरे सज्जा मेणे लेएक बणियाल। 20किस कि, नियम मान कइ कोई बि मेह्णु परमेश्वरे समाणि धर्मी ना बणता। बल्कि नियमे बेलि असी गलती त पापे पिछाण भुन्ति।
परमेश्वरे इच्छा - विश्वास करणे बेलि बचुण
(3:21—4:25)
यीशु पुठ विश्वास करणे बेलि धर्मी बणण
21पर असी बचाणे से चाका परमेश्वरे अभेईं कुढ़ो असा। से नियम मान कइ धर्मी बणुण केआं अलग असा, जेसे उगाह मूसे दुतो नियम अन्तर त भविष्य वक्ती के बोकी अन्तर असा। 22मतलब कि से चाका यीशु मसीह पुठ विश्वास करणे बेलि पूरा भुन्ता। परमेश्वर सोबी विश्वास करणे बाड़ी धर्मी बणान्ता, किस कि तसे सामणि सोब यक असे। कोई केहर-बेहर नेईं। 23किस कि सोबी गलती त पाप किओ असे त परमेश्वरे महिमा मेणे लेएक नेईं रिहो। 24पर परमेश्वरे कृपा कर कइ, यीशु मसीहे बचाणे कमे बेलि सोब धर्मी बणो असे। 25परमेश्वरे से हें बचाणे भकत बणाई कइ लंघा, ताकि तसे क्रूस पुठ मरणे बेलि, तस पुठ विश्वास कर कइ अस धर्मी बण घियेल। ईं कर कइ परमेश्वरे हरालु कि इस केआं पेहले जेन्हि मेह्णु गलती त पाप किओ थिए, तेन्हि जुए लाह रख कइ त तेन्हि माफ कर कइ तेन सही किउ। 26होर इस टेम एसे बेलि ई बि केई घेन्तु कि परमेश्वर धर्मी असा त जे यीशु पुठ विश्वास कते, तेन्हि धर्मी बणान्ता।
27त मेह्णु केस बोक पुठ अक्कड़ लान्ते? केसे पुठ बि से अक्कड़ लाई ना सकते। किस कि से नियम मानणे बेलि नेईं, बल्कि विश्वास करणे बेलि धर्मी बणो असे। 28तोउं त, अस एस नतीजे पुठ पुजो असे कि मेह्णु नियम मान कइ ना, बल्कि विश्वास करणे बेलिए धर्मी बणता। 29तुस ई ना सोचे कि परमेश्वर सद यहूदी मेह्णु जोई परेम कता, होर गैर यहूदी मेह्णु जोई परेम ना कता। अउं त बोता कि से गैर यहूदी मेह्णु जोई बि परेम कता। 30त किस कि यके परमेश्वर असा, त से खतना किओ यहूदी मेह्णु विश्वास बेलिए धर्मी बणान्ता, होर बगैर खतने बाड़ी गैर यहूदी मेह्णु जे बि तेसे विश्वासे बेलिए धर्मी बणान्ता। 31त कि विश्वासे बेलिए अस नियम बेकार बणान्ते ना? कदी ना! बल्कि अस नियम पूरा कते।
Currently Selected:
रोमी 3: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
