रोमी 16
16
अखिर बोक त नमस्कार
1ए ट्यारेओ! अउं तुसी फइबे भेणि बारे धिक बतान्ता। से किंख्रेया#प्रतिनिधि 18:18 शेहरे मसीहे सतसंगे सेविका भो। 2अउं तुसी जे बोता कि जीं विश्वासी मेह्णु करो लौतु, तीं तुस तेस जे प्रभु नओएं बेलि आबिश करीण दिए।#16:2 पौलुसे ई चिट्ठि फइबा भेणि केईआं रोमी मेह्णु जे लंघो थी। त जेस केसे बोक अन्तर तेस तुं जरूरत भोल तसे मदत करे, किस कि से बि अपफ जे सुआ जेईं के बल्कि में बि खरी करणे बाड़ी हरालो असी।
3अउं प्रिस्का भेण त तसे धाणि अक्विला भाई जे नमस्कार कता, जे मसीह यीशु सेवा करण अन्तर मोउं जोई साते कष्ट कते।#प्रतिनिधि 18:1-3; 18:18-26 4तेन्हि त में लिए अपु जान बि दाव पुठ लाई छओ थी। त सद अउंए ना, बल्कि गैर यहूदी के सोब सतसंग बि तेन्के धन्यवाद कते। 5तेन्के गी मीणे बाड़ी सतसंग जे बि में नमस्कार।
में ट्यारे भाई इपैनितुस जे बि में नमस्कार। से एशिया इलाके केआं मसीह अन्तर विश्वास करणे बाड़ा पेहला मेह्णु भो। 6मरियम जे बि में नमस्कार, जेन तुं मसीह अन्तर विश्वासे लिए सुआ मेहनत की। 7अन्द्रोनीकुस भाई त यूनियास भेणि जे बि में नमस्कार। से में ईं यहूदी भो त मोउं जोई साते कैद भुओ थिए। होर प्रतिनिधि बुछ ए खरे नामी-ग्रामी असे। एनि मोउं केईआं पेहलाई मसीह पुठ विश्वास किओ थिआ। 8विश्वास अन्तर में ट्यारे मितर अम्पलियातुस जे बि में नमस्कार। 9उरबानुस जे, जे असी जोई साते मसीहे सेवा कता, होर में ट्यारे भाई इस्तखुस जे में नमस्कार। 10भाई अपेल्लेस जे में नमस्कार। तेन मसीह सेवा करण अन्तर कष्ट सेह कइ अपफ जे यकीन लेएक साबित किओ असा। होर अरिस्तुबुलुस त तसे टब्बरे जे बि में नमस्कार। 11भाई हेरोदियोन जे में नमस्कार। से में ईं यहूदी भो। नरकिस्सुस त तसे टब्बरे जे, जे मसीह पुठ विश्वास कते, में नमस्कार। 12त्रुफेना भेण त त्रुफोसा भेण जे में नमस्कार, जे प्रभु सेवा करण अन्तर कष्ट कती। में ट्यारी परसिस भेण जे बि में नमस्कार, जेन प्रभु सेवा करण अन्तर सुआ कष्ट किआ। 13प्रभु सेवा करण अन्तर सुआ खास भाई रुफुस जे, त तसे ईया जे में नमस्कार। तसे ई अपु कोईये ईं में बि ख्याल रखती। 14असुंक्रितुस, फलेगोन, हिरमेस, पत्रोबास, हिरमास त तेन्हि जोई साथी होरे भाई जे में नमस्कार। 15भाई फिलोलोगुस त यूलिया भेणि, भाई नेरेउस त तसे भेण, होर भाई ओलुंपास त तेस जोई साथी सोबी विश्वासी मेह्णु जे में नमस्कार। 16अपफ बुच यकी होरी जुए शुचे गड़ेमेड़े करे। मसीह मानणे बाड़ी सोबी सतसंगी बाड़ी के तुसी जे नमस्कार।
17ए ट्यारेओ, अउं तुं छने कता कि तुस तेन्हि मेह्णु तालीण दिए जे मेह्णु झगड़ान्ते त जे शिक्षा तुसी मेओ असी, तेसे खिलाफ भोई कइ होरी के विश्वास मुकान्ते। तेन्हि केईआं दूर बिशे। 18किस कि ईं मेह्णु हें मसीहे ना, पर अपु पेटे सेवा कते। होर चिकनी चुपड़ी बोकी बइ सिधे साधे मने मेह्णु बेहकाइ छते। 19तुं खुश खबरी मानणे बारे चर्चा चोहरो कना हू भोई गो असी, त अउं तुं बारे खुश असा। पर अउं ईं चहन्ता कि तुस भलाई लिए अक्लदार त बुराई लिए भले बण बिशे। 20तोउं, शान्ति देणे बाड़ा परमेश्वर शैतान तुं खुरे बइ झठ ढचवाई छता। हें प्रभु यीशु मसीहे दाह दया त कृपादृष्टि हमेशा तुसी पुठ भुन्ति रिहे।
21मोउं जोई साते कम करणे बाड़ा तिमुथियुस, होर में ईं यहूदी लूकियुस, यासोन त सोसिपत्रुस तुसी जे नमस्कार कते। 22में चिट्ठि लिखणे बाड़ा तिरतियुस बि प्रभु नओं पुठ तुसी जे नमस्कार कता। 23जेसे गी इठियाणि सतसंग भुन्ता त जेसे गी अउं मेहमान असा, से भाई गयुस तुसी जे नमस्कार कता। शेहरे धने भण्डारी, भाई इरास्तुस तुसी जे नमस्कार कता। होर भाई क्वारतुस बि तुसी जे नमस्कार कता। 24[हें प्रभु यीशु मसीहे कृपादृष्टि तुसी सोबी पुठ भुन्ति रिहे। आमीन।]
अशुशी प्रार्थना
25अभेईं जे तुसी में खुश खबरी त यीशु मसीहे समाचारे हेसाब जोई विश्वास अन्तर पक्का कइ बटता, तेस परमेश्वरे महिमा लौती भो। ए खुश खबरी से बोक भो, जे जुग जुग केआं नियोको थी। 26पर अब तसे भिहो खुल गो असा। भविष्य वक्ती के लिखो बोकी के बेलि, परमपिता परमेश्वरे निआंगी बइ एसे बारे अब हर जाति मेह्णु बिच प्रचार भुओ असा, ताकि सोब जेईं तस पुठ विश्वास कर कइ मानियेल। 27तेस यके सर्व ज्ञानी परमेश्वरे यीशु मसीहे बेलि जुग जुग तकर महिमा भुन्ति रिहे।
आमीन।
Currently Selected:
रोमी 16: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
