रोमी 14
14
केसे पंची ना करीण
1ए ट्यारेओ! तुस तेन्हि सोबी विश्वासी मेह्णु जुए बि उई मी कइ बिशे, जे कुछ बोकी बारे विश्वास अन्तर अभेईं बि कमजोर असे। तेन्हि जोई तेन्के शक पुठ बेहेस ना करे। 2किस कि केहि जेईं समझते कि खाण अन्तर कुछ नेईं त से सोब कुछ खांते। पर विश्वास अन्तर कमजोर भुणे बझई जुए केहि सिर्फ शाग सब्जी खांते। 3त सोब कुछ खाणे बाड़ा, सद शाग सब्जी खाणे बाड़े नीच न समझे, होर सद साग सब्जी खाणे बाड़ा सोब कुछ खाणे बाड़ी पुठ दोष न लाए, किस कि परमेश्वरे सोब जेईं अपु मनो असे। 4ईं कर कइ तुस जीं होरी नौखर पुठ दोष लान्ते, त तुस गलत कते। से सही कते या गलत कते, एसे फैसला सद तेन्के मालिक यीशु कइ बटता। प्रभु अपु सेवकी सुसुर रख बटता चहे से जे किछ बि खाणे बाड़े भोल।
5केहि मेह्णु कुछ रोज खास मानते, त केहि जेईं हर यक रोज यके बराबर मानते। पर हर यक जेईं अपु अपु मन अन्तर पक्का पता लगो लौता कि से ईं किस सोचते। 6जे केस रोज खास मानते, से प्रभु इज्जत देणे खातिर मानते। होर जे सम्हाई कुछ खांते, से बि प्रभु इज्जत देणे खातिर खांते, किस कि तसे लिए से परमेश्वरे धन्यवाद कते। होर जे न खांते, से प्रभु इज्जत देणे खातिर न खांते, होर परमेश्वरे धन्यवाद बि कते। 7किस कि अस मसीह पुठ विश्वास कते त हें जीण त मरुण सद तसे इज्जत देणे खातिर भो लौतु, हें लिए ना। 8त अगर अस जीन्ते असे त अपु जीणे बेलि से खुश करण चहिए। होर अगर अस मरते त अपु मरण अन्तर बि प्रभु खुश करण चहिए। तोउं त, चहे अस जीएल या मरेल अस प्रभुएरी भोई कइ तस खुश कते। 9इस बझई जुए ईं मसीह मर गा त दुबारी जी बि गा, ताकि से जे मरो असे होर जे जीन्ते असे, तेन्हि दुहि के प्रभु भुआल।
10त तुसी होरे विश्वासी पुठ दोष ना लाण, होर ना होरे विश्वासी नीच समझुण, किस कि असी सोबी परमेश्वरे न्याय करणे रोज तसे समाणि खड़ भुण असु। 11किस कि धरमे कताब अन्तर लिखो असु कि
“प्रभु बोता, ‘मोउं अपु जिन्दगी सोह कि
हर यक जेईं में अगर उटेऊ ठेल देन्ते,
त हर यक जिभुड़ मोउं परमेश्वर मानतु।’”#यशायाह 45:23
12त, असी बुचा हर यक जेईं परमेश्वरे धे अपु अपु लेखाजोखा देण एन्ता।
होरी गलती त पाप करणे बझह न बणुण
13तोउं त, चले, इढ़िया पता अस यकी होरी पुठ हउ दोष न लान्ते। पर तुस पक्कु करे कि तुस केसे पाप करणे या मसीह पुठ विश्वास खतम करणे बझह ना बणियेल। 14प्रभु यीशु जुओई मीणे बेलि मोउं पूरा यकीन भोई गो असा कि कोई बि चीज खाण जे अपु अपफ जुठी नेईं, पर जे तेस जुठी मानते, तेन्के लिए से जुठी भोई घेन्ति। 15जे चीज तुस खांते, अगर तसे बेलिए केस विश्वासी विश्वास खतम भोई घेन्ता, त फि तुस तेस जोई परेम ना हरालते। त जेस बचाणे लिए मसीह मरा, तेस तुस अपु खाणे बेलिए खतम न करे। 16तोउं त, तुस तस ना कर जे तुं होरे विश्वासी बुरु लगियेल, चहे से तुसी खरु लगतु भोल। 17किस कि परमेश्वरे राज्य अन्तर खाणे पीणे कोई खासियत नेईं, खासियत असी त शुची आत्माई बेलि धर्मी जीणे, अपफ बुच उई मी कइ त खुशी जुए बिशणे। 18अगर तुस एसे ईं मसीहे सेवा कते, त परमेश्वर तुसी जुए खुश भुन्ता, होर मेह्णु तुं इज्जत कते। 19तोउं त, असी लगातार तेन्हि बोकी अन्तर कोशिश करीण चहिए जेसे, बेलिए होरी जोई मेल मिलाप बधता त सोबी के अन्तर सुधार भोल। 20हें लिए परमेश्वरे जे कम किओ असे तस अपु खाणे चहे बेलि बेकार न करे। सच्चे बि परमेश्वरे खाण जे सोब कुछ शुचु किओ असु। पर तुं खाणे बेलि अगर केस मेह्णु विश्वास खतम भोई घेन्ता त तुस बुरु कते। 21खरु त ईं असु कि तुस ना त मासुं खाए, ना अराख पिए, होर न कुछ ईं करे जेसे बेलिए तुं विश्वासी भाई या भेणि विश्वास खतम भोल। 22त एन्हि बोकी बारे तुं जे विश्वास असा, तस सद परमेश्वर त अपफ बुछ रखे। तेस मेह्णु धे परमेश्वर सुआ अशुश देन्ता, जे अपु ठीक किओ विश्वास अन्तर अपफ पुठ दोष न लान्ता। 23होर जपल बि अस कोई कम परमेश्वर पुठ बजन विश्वासे कते, त अस पाप कते। तोउं त जे दुमना भोई कइ खांता से दोषी बण गो असा, किस कि से बजन विश्वासे खांता।
Currently Selected:
रोमी 14: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
