रोमी 13
13
प्रशासने अधिकारी के वश अन्तर बिशुण
1हर यक मेह्णु अपु प्रशासने अधिकारी के वश अन्तर बिशुण, किस कि परमेश्वर ईं असा जे तेन्हि अधिकार देन्ता। होर जे अधिकारी असे, से परमेश्वरे नियुक्त किओ असे। 2तोउं त, जे कोउं अधिकारी के खिलाफ भुन्ता, से परमेश्वरे इच्छाई खिलाफ भुन्ता। होर अधिकारी के खिलाफ भुणे बझई जोई तेन्हि सज्जा मेती। 3अउं ए तोउं बोता किस कि अधिकारी खरे कम करणे बाड़ी डराण जे नेईं, पर बुरे कम करणे बाड़ी डराण जे असे। तोउं त अगर तुस अधिकारी हेर नडर रेहण चहन्ते, त खरे कम करे। तोउं से तुं तारीफ कते। 4किस कि से तुं भलाई लिए परमेश्वरे सेवक भिन्थ। पर अगर तुस बुराई करियेल, त डरे, किस कि परमेश्वर ए बुरे कम करणे बाड़ी सज्जा देण जे नियुक्त किओ असे। ई कर कइ से तसे सेवा कते। 5तोउं त, अधिकारी के वश अन्तर बिशुण जरूरी असु, ना कि सद तेन्के सज्जा देणे डरे बझई जुए, पर अन्तरात्माई उगाही बझई जुए बि कि से परमेश्वरे सेवक भिन्थ। 6इस बझई जुए मामला बि देण दिए, किस कि अधिकारी जपल अपु कम सुसुर कते रेहन्ते, से परमेश्वरे सेवा कते। 7तोउं त, हर यक जेईं के हक चुकान्ते रिहे, जेस मामला लौता, तसे धे मामला दिए, जेस हरा-करा लौता, तसे धे हरा-करा दिए। जेस हेर डरुण चहिए, तस हेर डरीण दिए, जेसे इज्जत करीण चहिए, तसे इज्जत करे।
यक होरी जोई परेम करण
8तुस अपफ बुछ परेम जोई बिशणे ऋण छड़ दी कइ, होर केसेरी ऋणि न बणे। किस कि जे होरी जोई परेम कते, तेन्हि नियम मनो असे। 9किस कि
“नाजायज रिश्ता न रखुंण,
मेह्णु मारण नउ,
चोरुण नउ,
लालच न करीण”#निसुणे 20:13-15; 17
त इन्हि छड़ कइ होरी बि केहि निआंग असी, जेन्के सीरे इस बोक अन्तर असी कि,
“तु अपु भेयाड़ी जोई अपु बराबर परेम कर।”#पुजारोठि 19:18
10अगर तुस अपु भेयाड़ी जोई सच्चे परेम कते त तुस तेन्हि जोई कोई गलत न कते। तोउं त परेम करण, नियम मनण असे।
मसीहे एणे रोज
11अभेईंकण टेम पिछाण कइ जे मेईं बोलो असु तस करीण दिए। खड़ भो त समोझि बिशे, किस कि अब हें बचणे टेम नीड़ा एई गो असा। हें बचणे टेम पेहले केईआं अब सुआ नीड़ा एई गो असा। 12धरती पुठ हें जीण पूरु भुणे बाड़ु असु, जीं यक रात खतम भुणे बाड़ी असी, त भ्याग भुणे बाड़ी असी। तोउं त, असी अन्हारे कम छड़ दी कइ टगड़ियारी हथियार टाइ रखण। 13असी तीं जीण, जीं अस दिसाई हंटते। ना कि मौजमस्ति कर कइ, न प्याकड़ बण कइ, न नाजायज रिश्ता बणाई कइ त बेशर्मी कम कर कइ, होर न कुटीण मडीण त जड़ कइ। 14बल्कि असी यीशु मसीहे ईं जीण असु। त असी अपु जिसमे बुरी इच्छा पूरी करणे कोशिश न करीण।
Currently Selected:
रोमी 13: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
