रोमी 12
12
विश्वासी मेह्णु के चाल चलण
(12:1—15:13)
मसीह अन्तर नोई जिन्दगी
1तोउं त ए ट्यारेओ, अउं तुसी परमेश्वरे बोडी कृपा याद दिआई कइ छने कता कि तुस अपु अपफ परमेश्वरे जे यक ईं भकत बणे, जे शुची असी, होर जे सद परमेश्वर जे जीन्ता त जेस हेर परमेश्वर खुश भुन्ता। एईएं तुं सच्चे मन त आत्माई जोई परमेश्वरे पूजा अराधना भो। 2इस मतोके मेह्णु के ईं न बणे। पर तुं मन बदलीणे हेसाब जोई परमेश्वर तुं चाल चलण बि बदलण दिए, जेसे बेलिए तुस परमेश्वरे खरी, तस खुश करणे बाड़ी त हर कनारी बइ सिद्ध इच्छा बिझियेल।
3परमेश्वर केईआं मेओ कृपाई बझई जोई अउं तुसी अन्तरा हर यक जेईं जे बोता कि तुसी अपफ जे जीं समझुण चहिए, तेस केईआं बध कइ ना समझे। पर जीं परमेश्वरे हर यक जेईं कें धे जत विश्वास दुतो असा, तेस हेसाब जोई तुस अपु अपफ समझे। 4किस कि जीं हें यक जिसम अन्तर सुआ अंग असे, होर सोबी अंगी के अपु अपु कम असे, 5तिहांणि अस जे सुआ जेईं असे, मसीह अन्तर यक जिसमे ईं असे त अपफ बुच उई मी कइ यकी होरी अंगे ईं असे। 6असी पुठ परमेश्वरे कृपाई हेसाब जोई असी अलग अलग वरदान मेओ असा। त जेस भविष्य वाणि करणे वरदान मेओ असा, से अपु विश्वासे हेसाब जोई भविष्य वाणि करे। 7अगर सेवा करणे वरदान मेओ असा, त सेवा कते रिहे। होर अगर केसे शिचालणे वरदान मेओ असा त से बि तिहांणि शिचालते रिहे। 8अगर हिम्मत देणे वरदान मेओ असा, त से हिम्मत देन्ते रिहे। दान देणे बाड़ा वरदान मेओ असा त खुले दिल जोई दिए। अगर नेता भुणे वरदान मेओ असा त तस पूरे जोश जुएई करे। अगर दाह दया करणे वरदान मेओ असा तस खुशी जोई करे।
9परेम करण अन्तर कोई कपट ना करे, बुराई हेर नफरत करे, भलाई कते रिहे। 10सोब भाईचारे जोई बिशे। होरी इज्जत करण अन्तर अपफ बुच यकी होरी केईआं बधते घिए। 11कोशिश करण अन्तर सुस्त न बणे, अपु आत्मा जोश जुए रखे, होर प्रभु सेवा कते रिहे। 12परमेश्वर पुठ अपु उम्मीदे बारे खुश रिहे, दुख तकलीफ अन्तर लाह रखे, हमेशा प्रार्थना कते रिहे। 13विश्वासी मेह्णु के जरूरत पूरी करण जे तेन्के मदत करे, मेहमानी के खातिरदारी कते रिहे।
14अपु भुंजाणे बाड़ी जे अशुश दिए; अशुश दिए, कदी शराप न दिए। 15खुश बिशणे बाड़ी जोई खुश रिहे, रोलणे बाड़ी जोई रोलीण दिए। 16अपफ बुच यक मन भोई बिशे। घमण्डी न बणे, पर गरीबी जोई उई मी कइ बिशे। अपणे आप अक्लदार न बणे। 17बुराई बंटि केसे जोई बुराई न करे। तस कम करे जेसे बेलि सोबी मेह्णु के भलाई भुन्ति। 18जोउं तकर भोई सकतु, तुस हर यक मेह्णु जोई परेम जोई बिशणे कोशिश करे। 19ए ट्यारेओ, धरमे कताब अन्तर लिखो असु,
“प्रभु बोता कि बदला नेण में कम भो,
अउंए बदला नेन्ता।”#विधि 32:35; इब्रानी 10:30
त तुसी कदी अपु बदला न नेण, पर तेस मेह्णु परमेश्वरे लेहेर जे छड़ दिए। 20एस बंटि
“अगर तुं दुश्माण ढुका भोल त तेस खांजे खिलाण दिए,
अगर से टिशो असा त तेस पुओणि पिआण दिए,
किस कि ईं करणे बेलिए तुस तेन्हि लज लाई कइ फुकते
होर लजी बेलिए तेन्के किणहेरु धरती लगतु।”#उजवाण 25:21-22
21बुराई केईआं हार न घिए, पर भलाई बेलिए बुराई जीतीण दिए।
Currently Selected:
रोमी 12: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
