रोमी 10
10
1ए ट्यारेओ, अउं पूरे मन जुए चहन्ता, होर इस्राएले मेह्णु लिए परमेश्वरे सामणि में प्रार्थना ईं असी कि से बच घियेल। 2किस कि तेन्हि परमेश्वरे लिए लगाव त असा, पर अक्ल जोई ना। एसे उगाही अउं देन्ता। 3किस कि तेन्हि परमेश्वरे मेह्णु धर्मी बणाणे बारे अणजाण भोई कइ, अपफ धर्मी बणणे कोशिश की। होर धर्मी बणाणे परमेश्वरे योजना ना मनी। 4मसीह एणे बेलि नियमे कम पूरा भुआ, ताकि जे कोउं मसीह पुठ विश्वास कराल, परमेश्वर तस धर्मी बड़ाल।
सोबी जाति बचाणे बत यीशु भो
5मेह्णु सम्हाई नियम मान कइ धरमे करमे बेलि धर्मी भुणे बारे मूसे ईं लिखो असु कि
“जे मेह्णु नियम मानता,
से तसे बेलिए जीन्ता।”#पुजारोठि 18:5
6पर विश्वासे बेलिए धर्मी भुणे बारे धरमे कताब ई बोती कि
“तोउ अपु मन अन्तर ईं ना बोलुण कि
स्वर्ग तकर कोउं जेईं चढ़ता”#विधि 30:12
(मतलब कि मसीह उन्न धरती पुठ जे अण्हियेल।)
7या “काल खपर अन्तर कोउं जेईं घेन्ता?”#विधि 30:13
(मतलब कि मसीह मरो तेन्हि अन्तरा दुबारी जीआई कइ खड़िया अण्हियेल।)
8पर मसीह पुठ विश्वास कर कइ धर्मी बणो मेह्णु ई बोता जीं मूसे लिखो असु,
“परमेश्वरे वचन तुं भेएड़ असे,
से तुं मुंह अन्तर त
तुं मन अन्तर असे।”#विधि 30:14
ए विश्वासे से समाचार भो, जेसे अस प्रचार कते। 9तोउं त, अगर तु अपु मुंहे बइ यीशु जे “प्रभु” बोलाल, होर अपु पूरे मने बइ विश्वास करियाल कि परमेश्वरे से मरो तेन्हि अन्तरा दुबारी जीआ, त तु जरूर बचता। 10किस कि धर्मी भुण जे मने बइ विश्वास करिए लौता, होर बचणे लिए मुंहुए बइ बोलिये लौतु। 11धरमे कताब अन्तर ईं लिखो असु,
“जे कोउं तेस पुठ विश्वास करियाल, से कदी लजेईन्ता नउ।”#यशायाह 28:16
12यहूदी त गैर यहूदी मेह्णु अन्तर कोई केहर-बेहर नेईं, किस कि यीशु सोबी के प्रभु भो त जे बि तसे नओं नी कइ प्रार्थना कते, तेन्हि सोबी जे से खुल कइ अशुश देन्ता। 13किस कि धरमे कताब अन्तर लिखो असु,
“जे कोउं प्रभु नओं नी कइ प्रार्थना करियेल,
से बच घेन्ते।”#जोएल 2:32
14पर जेस पुठ तेन्हि विश्वास ना किआ, से तसे नओं नी कइ कीं प्रार्थना कते? होर जेसे बारे तेन्हि कदी शुणोरु नेईं, तेस पुठ कीं विश्वास कते? होर से शुणते बि कीं, अगर कोई शुणाणे बाड़ा ई ना भोल? 15होर अगर लंघाल नउ, त कोई कीं कइ शुणान्ता त प्रचार कता? धरमे कताब अन्तर एसे बारे लिखो असु,
“तेन्के एण कतु शुभ असु,
जे खुश खबरी शुणान्ते!”#यशायाह 52:7
16पर सोबी से खुश खबरी ना मनी: जीं यशायाह भविष्य वक्ता बोता,
“ए प्रभु, केन हें समाचार पुठ विश्वास किओ असा?”#यशायाह 53:1
17तोउं, एसे मतलब भुआ ईं कि मेह्णु मसीह पुठ विश्वास करण लगो असे, किस कि तेन्हि तसे समाचार शुणो असे। से तोउं शुणते किस कि होरे मेह्णु मसीहे बारे प्रचार करण लगो असे।
18पर मोखयाल कोउं जेईं पुछाल, कि मेह्णु सच्चे तसे समाचार न शुणा ना? अउं बोता कि तेन्हि जरूर शुणो असा; किस कि धरमे कताब अन्तर लिखो असु,
“शुणाणे बाड़ी के बोके पूरे धरती पुठ,
होर तेन्के समाचार धरती यक मुख केईआं होर मुख तकर पूज गो असा।”#छुआंरी 19:4
19होर मोखयाल कोउं जेईं पुछाल, कि इस्राएली मेह्णु ना समझे ना? एसे बारे पेहले त मूसा बोता,
“जे तुं जाति न भो, तेन्के बेलिए अउं तुं मन अन्तर जड़ा लवान्ता;
होर मुर्खी के जाति बेलिए अउं तुसी लेहरारता।”#विधि 32:21
20तोउं परमेश्वरे बोलो बोक यशायाह भविष्य वक्ता बि खरी हिम्मत जोई लिखो असु,
“जे मोउं ना तोपतेथ, तेन्हि अउं मेई गा,
होर जे मोउं धरान्तेथ बि नउ, तेन्के सामणि अउं निस गा।”#यशायाह 65:1
21पर इस्राएली मेह्णु के बारे परमेश्वर ईं बोता,
“सुआ टेम केआं यक निआंग ना मानणे बाड़ी त मुहाबला करणे बाड़ी टजे कना जे,
मेईं अपु हथ टड रखे कि से मोउं केईं एईयेल।”#यशायाह 65:2
Currently Selected:
रोमी 10: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
