रोमी 11
11
इस्राएल पुठ परमेश्वरे दाह
1तोउं कि अउं ई बोल सकता ना कि परमेश्वरे अपु टज इस्राएल छड़ दुतो असी? ना, कदी ना! अउं अपफ बि त यक इस्राएली भो; अब्राहमे पीढ़ी त बिन्यामीने ऊड़ी भो। 2परमेश्वरे अपु टज जेन्हि से पेहलाई दी जाणताथ, छड़ नेईं दुतो। तुसी त जरूर पता भोल कि एलिय्याह भविष्य वक्ते इस्राएली मेह्णु के खिलाफ परमेश्वर जे कीं प्रार्थना किओ थी। तसे बारे धरमे कताब अन्तर की लिखो असु? 3लिखो असु
“ए प्रभु हेर, तेन्हि तें भविष्य वक्ते मारे, तें कुण्ड ढाई छे।
अउं अकेला बचो असा, त से मोउं बि मारण चहन्ते।”#1 राजा 19:10; 14
4पर परमेश्वर केईआं तेस की जवाब मेईंया? तेन बोलु,
“तु अकेला नेईं बचो।
मेईं अपु लिए सत हजार मेह्णु रख छो असे,
जे बआल देवते#11:4 “बआल” कनान देशे, मेह्णु के बड़ाओ यक देवते नओं असु। मेह्णु तसे पूजा कतेथ। पर परमेश्वरे इस्राएली मेह्णु मुर्तिपुजा करण केआं ठाको थिए। पूजा अराधना करण जे उन्न नेईं कुशिए।”#1 राजा 19:18
5त तिहांणि इस टेम बि कुछ मेह्णु बचो असे, जे परमेश्वरे अपु कृपाई बेलि चुणो असे। 6पर अगर परमेश्वरे ए अपु कृपाई बेलिए किओ असु त एस पुठ मेह्णु के कमी के कोई असर नेईं। अगर असर भुन्ताथ त तसे कृपा, सच्ची कृपा ना रेहन्तीथ।
7एसे मतलब ई भुआ कि इस्राएली मेह्णु धर्मी भुणे जे तोपुण लगो थिए, से तेन्हि ना मेईंया। सिर्फ तेन्हि मेआ जे परमेश्वरे चुणो थिए, पर होरे मेह्णु नकठर भोई गे। 8एसे बारे ईं धरमे कताब अन्तर लिखो असु,
“परमेश्वरे आजकण रोज तकर से घोश्कि उंघाण छो असे,
त तेन्के धे ईं टीर दुतो असे जे ना हेर बटियेल,
होर ईं कन दुतो असे जे ना शुणियेल।”#विधि 29:4; यशायाह 29:10
9होर राजा दाऊद बि बोता,
“तेन्के खाण तेन्हि जे जाले त छिड़ढापे ईं भोल,
से तेन्के उछुट घेणे त सज्जाई बझह बण घियेल।
10तेन्के टीर अन्ही गो लौते कि से हेर ना बटियेल,
होर तु तेन्हि दुख दी कइ हमेशा लिए कुबड़ेर छड़।”#छुआंरी 69:22-23
परमेश्वर गैर यहूदी मेह्णु बि बचाण
11तोउं कि अउं ई बोल बटता ना कि में जाति मेह्णु मसीह पुठ विश्वास करण अन्तर तोउं उछुट गे कि हमेशा लिए विश्वास ना करियेल? कदी ना! पर तेन्के उछुट घेणे बझई जोई गैर यहूदी मेह्णु बच गे, ताकि तेन्हि हेर से जड़ियेल। 12त यहूदी मेह्णु मसीह पुठ विश्वास ना करणे बेलि अगर धरती होरे जाति मेह्णु जे सुआ अशुश मेईं, होर तेन्के आत्माई नुकसाने बेलिए अगर परमेश्वरे होरे जाति मेह्णु खरी अशुशी जुए भर छड़े, त तेन्के मसीह पुठ विश्वास करणे बेलिए कि घट अशुश मेती ना?
13अब अउं तुसी गैर यहूदी मेह्णु जे बोता। जपल तकर परमेश्वर अउं गैर यहूदी मेह्णु के लिए मसीहे प्रतिनिधि बणाओ असा, तपल तकर अउं अपु सेवाई कमे रोभ लान्ता, 14ताकि जीं तीं कइ अपु जाति मेह्णु अन्तर जड़ा पैदा कर कइ तेन्हि अन्तरा केहि जेईं विश्वास करवाई कइ बचाई बटुं। 15किस कि अगर तेन्के मसीह छड़ देणे, धरती होर मेह्णु के परमेश्वर जुए मिइणे बझह बणि, त तेन्के मसीह मनण जीं कोई से मरो तेन्हि अन्तरा दुबारी जीणे ईं भुन्ति। सच्चे बि से सुआ अशुश बाड़ी बोक भुन्ति!
16जपल वेदी पुठ चढ़ो आटे पेहला दियार परमेश्वरे समाणि शुचा असा, त गुन्हो पूरा आटा बि शुचा असा। होर जपल बुटे सीरे शुची असी, त डाई बि तिहांणि असी।
17पर अगर तेस बुटे कुछ डाई टूट गई, जीं कुछ इस्राएली मेह्णु मसीह पुठ विश्वास ना कर कइ भुओ असे, होर परमेश्वर तुं जंगले जैतुने ईं तेन्के जगाई कलीम की, ताकि तुस सीरी के रसे हेस्से बण घियेल,#11:17 इठि पौलुस यहूदी मेह्णु मसीह पुठ विश्वास ना कर कइ परमेश्वर केईं दूर भोई घेण त गैर यहूदी मेह्णु तस पुठ विश्वास कर कइ अब्राहमे गभुर भोई कइ जुबाने हकदार भुणे बारे बोलुण लगो असा। 18त तुसी अपु डाई पुठ घमण्ड ना करण। अगर तुस घमण्ड कते त याद रखे कि तुस सीरी ना, पर सीरे तुसी पाड़ती।
19फि मोखयाल कोउं जेईं बोलियाल, “जीं मेह्णु होरी बुटी के कलम लाण जे डाई कटते, तिहांणि परमेश्वरे इस्राएली मेह्णु तोउं छड़ दिते, ताकि तेन्के जगाई मोउं जोड़ाल।” 20अउं बोता कि तुसी सही बोलु। से त विश्वास ना करणे बझई जोई तेस बुटे केआं कटी गे। पर तुस विश्वास करणे बझई जोई जुड़ बिश्ते। तोउं त, घमण्ड ना करे, पर डर कइ बिशे। 21किस कि जपल परमेश्वरे सक्के इस्राएली ना छड़े, जे खरी डाई के ईं थिए त तुसी बि ना छता। 22तोउं त, तुस परमेश्वरे कृपा त सक्ति ध्यान जोई हेरे! जे मसीह पुठ विश्वास ना कर कइ उछुट गे, तेन्हि जुए तेन सक्ति कइ बरताब किआ। पर तुसी जुए से अपु कृपा जोई बरताब किआ, किस कि तुसी मसीह पुठ विश्वास किआ। त तुस विश्वास कते रिहे, ना त तुस बि तेन्हि इस्राएली मेह्णु के ईं कटी घेन्ते। 23से इस्राएली मेह्णु बि अगर मसीह पुठ विश्वास करियेल, त परमेश्वर तेन्हि दुबारी जोड़ता, किस कि परमेश्वर केईं तेन्हि दुबारी कलमी लाण जे ताकत असी। 24किस कि अगर परमेश्वर तुस, जे तेस जंगली जैतुने डाई के ईं असे, काट कइ कुदरते खिलाफ खरे जैतुन जोई कलीम लाई छइ, त इस्राएले मेह्णु जे कुदरती खरे जैतुने डाई के ईं असे, तेन्के अपफ झट कलम ना लेईन्ति ना?
परमेश्वर सोबी बचणे मौका देन्ता
25ए ट्यारेओ! ईं ना लौतु भो कि तुस अपु अपफ सुआ अक्लदार समझियेल। तोउं त, अउं न चहन्ता कि तुस इस राज केईआं अणजाण रिहे। जपल तकर परमेश्वरे ठीक किओ सोब गैर यहूदी मेह्णु मसीह पुठ विश्वास ना करियेल, तपल तकर इस्राएले कुछ मेह्णु इहांणि नकठर रेहन्ते। 26तोउं परमेश्वर पूरे इस्राएल जाति केईआं अपु मेह्णु बचान्ता। धरमे कताब अन्तर बि इहांणि लिखो असु,
“छुड़काणे बाड़ा सिय्योन#11:26 मतलब “यरुशलेम शेहर” केईआं एन्ता,
त इस्राएली मेह्णु के सोब अधर्म दूर कता।”
27“जपल अउं तेन्के गलती त पाप माफ कइ छउं,
तपल तेन्हि जे में एईएं जुबान असी।”#यशायाह 59:20-21
28खुश खबरी हिसाब जोई तुं भलाई लिए त इस्राएली मेह्णु परमेश्वरे बैरी भुए, पर चुणुणे हिसाब जोई विश्वासे पुरखे#11:28 पुरखे: अब्राहम, इसहाक त याकूब असे। बझई जोई से परमेश्वरे ट्यारे असे। 29किस कि परमेश्वरे वरदान त भिआण कदी न टलतु, से अटल असु। 30जीं तुसी पेहले परमेश्वरे निआंग ना मनी, पर अभेईं तसे निआंग मानणे बेलिए तुसी पुठ परमेश्वरे कृपा भो असी, 31तिहांणि तेन्हि बि अब निआंग ना मनी, ताकि जीं तुसी पुठ परमेश्वरे कृपा भो असी, तिहांणि तेन्हि पुठ बि कृपा भोल। 32किस कि सोबी जेईं परमेश्वरे निआंग ना मनी त से कैदी के ईं बण गो असे, ताकि परमेश्वर सोबी पुठ कृपा करियेल।
पौलुस परमेश्वरे गुणगान करण
33में बोउआ! परमेश्वरे बुद्धि त ज्ञाने कोई हेसाब नेईं? तसे विचार हें समझ केआं बाहर असे, होर तसे कम सोच केआं बि दूर असे! 34धरमे कताब बि बोती
“प्रभु मने भियो केन जाण बटा?
तसे मन्त्री कोउं बणा?”#यशायाह 40:13
35“होर केन तसे धे कुछ दुतो असु कि
जेसे बंटि से तसे धे वापिस दिआल?”#अयुब 41:11
36किस कि सोब किछ तसेरी कनारा, तसेरी बेलिए, होर तसेरी लिए असु। तेस परमेश्वरे महिमा जुग जुग भुन्ति रिहे।
आमीन।
Currently Selected:
रोमी 11: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
