प्रतिनिधि 14
14
इकुनियुम शेहर अन्तर खुश खबरी प्रचार भुण
1इकुनियुम शेहर अन्तर भु ईं कि पौलुस त बर्नबास यहूदी मेह्णु के अराधनालय अन्तर घेई गे, त ईं ईं बोके की कि यहूदी मेह्णु त गैर यहूदी मेह्णु अन्तरा सुआ जेईं विश्वास किआ। 2पर जेन्हि यहूदी मेह्णु विश्वास ना किआ, तेन्हि गैर यहूदी मेह्णु उकसाए त तेन्के मन अन्तर अपु विश्वासी भाई भेणि के खिलाफ जेहेर मिआई छड़ा।
3पौलुस त बर्नबास सुआ रोज तकर तठि बिशे, त प्रभु पुठ भरोसा रख कइ त नडर भोई कइ प्रभु वचन शुणान्ते रिहे। होर प्रभु बि तेन्के बेलि निशाण त चमत्कारे कम करवाई कइ तेन्के बोलो अपु कृपाई वचन साबित कताथ।
4पर एसे बेलि भु ईं कि शेहरे मेह्णु बुछ फूट भोई गई। कुछ मेह्णु यहूदी के कना त कुछ मेह्णु प्रतिनिधि के कना भोई गे। 5पर जपल गैर यहूदी त यहूदी मेह्णु अपु अपु मुखिये जोई मी कइ पौलुस त बर्नबास भुंजाणे त घोड़िआणे कोशिश करण लगो थिए, 6त पौलुस त बर्नबास एस बोकी पता लग गा, त से लुकानिया इलाके जे नश गे। तोउं लुस्त्रा त देरबे शेहरे त औत-कोती इलाकी जे घेई गे, 7त तठि यीशु खुश खबरी शुणाण लगे।
लुस्त्रा त देरबा शेहर अन्तर खुश खबरी प्रचार भुण
8लुस्त्रा शेहर अन्तर यक मेह्णु बिशो थिआ, जेसे खुर न चलतेथ। से जमोरा टूंटा थिआ त कदी हंटोरा नेओथ। 9से पौलुसे बोके शुणुण लगो थिआ। पौलुस यक टक तसे धे हेरी बिशा त लगु कि तेस अन्तर ठीक भुणे विश्वास असा। 10त तेन तेस टूंटा जे जोरी जोई बोलु, “अपु खुरी के बल सुसुर खड़ भो।” तेन टाउ दिता त हंटण-फिरण लगा।
11जपल मेह्णु पौलुसे ईं कम हेरु त तेन्हि लुकानिये भाषा अन्तर हुशेरि दी कइ बोलु, “देवते मेह्णु के वेश अन्तर हें भेएड़ एई गो असे।” 12तेन्हि बर्नबासे नओं अपु मुख्य देवता नओं पुठ जयूस रखु त पौलुसे नओं देवती के निआंगीयारी नओं पुठ हिरमेस रखु, किस कि पौलुस मुख्य वक्ता थिआ। 13जयूसे देवते देहेर शेहरे बाहर थिआ। त तठियाणि पुजारा फियुड़ु माड़ा त जानवर घिन कइ दुआर केईं पुजी गा। से हसुड़े जोई साते तेन्हि इज्जत देणे खातिर भकत चढ़ाण चहन्ताथ। 14पर प्रतिनिधि बर्नबास त पौलुस जपल ईं शुणु, त सुआ दुखी भोई कइ अपु झिणे चीरे त हुसुड़े अन्तर घेई कइ जोरी जोरी बोलुण लगे, 15“ए मितरों! तुस ईं ना करे। किस कि अस बि त तुं ईं मनख भो। त अस तुसी ई खुश खबरी शुणाण जे अओ असे कि तुस इन्हि बेकार चीजी केआं मुंह फेर कइ तेस जीन्ता परमेश्वरे कना जे अपु मन खिरकाए, जेन स्वर्ग, धरती, समन्दर त तेथ अन्तरी सोब किछ बड़ाओ असु। 16पेहलकण जमाने अन्तर तेन सोबी जाति अपु अपु मने हेसाब जोई हंटण दिते। 17तोउं बि से अपु बारे साफ साफ उगाह देन्ता रिहा। से भलाई कते-कुते अम्बर केआं मेघे त होरे होरे ऋते हेसाब जोई तुन्धे फसल देन्ते रिहा। त तेन रज्जि रौठि त सुख दी कइ तुं मन खुशी जुए रज्जाणो असे।” 18ईं बोल कइ तेन्हि हुसुड़ा बोडे मुश्किल जोई रोका कि तेन्के लिए कोई भकत ना चढ़ाए।
19पर कुछ यहूदी मेह्णु अन्ताकिया त इकुनियुम शेहर केआं एई कइ मेह्णु अपु कना कर छड़े। तेन्हि पौलुस पुठ घोड़िआ दिती, त मरो समझ कइ तेस ढीड़ कइ शेहर केआं बाहर घिन गे। 20पर जपल विश्वासी एई कइ तसे चोहरो कना किठि गे, त से खड़ी कइ शेहर गा त दोके रोजे बर्नबास जोई साते देरबे शेहर जे घेई गा।
पौलुस त बर्नबास सीरिया राज्ये अन्ताकिया शेहर जे वापस घेण
21तेन्हि देरबा शेहरे मेह्णु खुश खबरी शुणाई त सुआ विश्वासी बण गे। तढ़िया पता से लुस्त्रा, इकुनियुम त अन्ताकिया शेहर जे वापस एई गे। 22बत से विश्वासी के मन टकाई कइ, विश्वास अन्तर पक्का भोई बिशुण जे हिम्मत देन्तेथ, त ईं बोतेथ कि “असी सुआ दुख तकलीफ सेही कइ परमेश्वरे राज्य अन्तर घेण असु।” 23तोउं तेन्हि हर यक सतसंग अन्तर सतसंगे स्याणे नियुक्त किए। तोउं ब्रत त प्रार्थना कर कइ से प्रभु हथ छड़े, जेस पुठ तेन्हि विश्वास किओ थिआ। 24तोउं पिसिदिया राज्य पार कर कइ से पंफूलिया राज्य अन्तर पुजे। 25फिर पेरगा शेहर अन्तर वचन शुणाई कइ अत्तालिया शेहर आए। 26तठिआ से जहाज पुठ सीरिया राज्ये अपु अन्ताकिया शेहर अन्तर पुजे, जेठि सतसंगे मेह्णु पौलुस त बर्नबास तेस कमे लिए परमेश्वरे कृपाई हवाले कइ छोओ थिए, होर जे कम तेन्हि अब पूरु किओ थिउ। 27तठि पूज कइ तेन्हि सतसंगी के सभा की त बोलु कि परमेश्वरे तेन्हि जोई साते बिश कइ की की कम किए, त कीं कर कइ गैर यहूदी मेह्णु जे विश्वासे दुआर खोल छड़े। 28होर से तेन्हि विश्वासी जोई साते सुआ टेम तकर बिशे।
Currently Selected:
प्रतिनिधि 14: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
