प्रतिनिधि 13
13
पूरे धरती अन्तर उगाही देण
(13:1—28:31)
बर्नबास त शाऊल नियुक्त करण
1अन्ताकिया शेहरे सतसंग अन्तर केहि भविष्य वक्ते त शिचालणे बाड़े थिए: जीं बर्नबास, शाऊल, शमियोन जेस जे “नीला” बि बोतेथ; होर कुरेन शेहरे लूकियुस, त राजा हेरोदेसे मठड़ियारी साथी मानहेम। 2जपल से ब्रत रख कइ प्रभु पूजा अराधना करण लगो थिए, त शुची आत्माई बोलु, “मेईं बर्नबास त शाऊल कुछ खास कमे लिए भिहो असे। त तेन्हि तेस कम करण जे लंघाए।” 3तोउं तेन्हि ब्रत रखे त प्रार्थना दुआ कर कइ बर्नबास त शाऊल पुठ हथ रखा त से तेस कमे लिए लंघाई छड़े।
खुश खबरी प्रचार करणे पौलुसे पेहला सफर
कुप्रस टापु जादूगर पौलुसे खिलाफ भुण
4ईं भोई कइ बर्नबास त शाऊल शुची आत्माई ताकते बेलि भरी कइ सिलूकिया शेहरे बंदरगाह जे गे; त तठिआ जहाज पुठ बिश कइ कुप्रस टापु जे गे। 5तोउं सलमीस शेहर#13:5 सलमीस शेहर कुप्रस टापु खास शेहर थिआ, जेठि सुआ यहूदी मेह्णु बिशतेथ। पूज कइ, से परमेश्वरे वचन यहूदी मेह्णु के अराधनालय अन्तर शुणाण लगे। यूहन्ना जेस जे मरकुस बि बोतेथ, तेन्हि जोई साते बिश कइ तेन्के मदत कताथ।
6से तेस पूरे टापु हंट कइ पाफुस शेहर#13:6 पाफुस शेहर कुप्रस टापु राजधानी थी। पुजे। तठि तेन्हि “बर-यीशु” नओएं यक यहूदी जादूगर मेआ, जे झूठा भविष्य वक्ता बि थिआ। 7से राज्यपाल सिरगियुस पौलुस जोई बिश्ताथ, जे सुआ अक्लदार मेह्णु थिआ। राज्यपाले बर्नबास त शाऊल अपु भेएड़ भिआई कइ परमेश्वरे वचन शुणुण चहा। 8पर से जादूगर जेस जे यूनानी भाषा अन्तर “एलीमास” बोते, तेन्के खिलाफ भुआ, किस कि से ना चहन्ताथ कि राज्यपाल परमेश्वरे वचन पुठ विश्वास करे। 9तपल शाऊले जेस नओं पौलुस#13:9 “शाऊल” यक यहूदी नओं असु। होर “पौलुस” रोमी नओं असु। मठड़ियारी केआं ईं शाऊले ईये बोउए तसे रोमी नओं बि रख छो थिउ, किस कि से बि रोमी नागरिक थिए। बि असु, शुची आत्माई बइ भरी कइ तसे कना जे यक टख हेर कइ बोलु, 10“ए शैताने कोईया! तु जे सोब कपट त बुराई बइ भरिए असा त धरमे बैरी असा, कि तु प्रभु सच्ची बथ कैनी-बोरी करीण न छता ना? 11अब हेर, प्रभु तें खिलाफ सज्जा शुणाओ असी। तु किछ टेम तकर अन्हा भोई घेन्ता त तोउ दिस बि ना केतु।” तिखेईंए तसे टीरी अगर अन्हु खिरक गोउ। त से इएर-ओवर हथ देण लगा, ताकि कोउं तसे हथ टाइ कइ नियाल। 12ई सोब घटना हेर कइ राज्यपाले विश्वास किआ। से प्रभु शिक्षाई बइ हैरान भोई गो थिआ।
पिसिदिया राज्ये अन्ताकिया शेहर अन्तर पौलुसे घेण
13पौलुस त तसे साथी पाफुस शेहर केआं जहाज पुठ घेई कइ पंफूलिया राज्ये पेरगे शेहर अन्तर पुजे। तठिआ यूहन्ना मरकुस तेन्हि छड़ दी कइ यरुशलेम शेहर जे वापस घेई गा। 14पेरगे शेहर केआं अगर घेई कइ से पिसिदिया राज्ये अन्ताकिया शेहर अन्तर पुजे; त भक्ति करणे रोज अराधनालय अन्तर घेई कइ बिश गे। 15नियमे कताब त भविष्य वक्ती के कताब पढ़ण केआं पता अराधनालय मुखिये बर्नबास त पौलुस जे बोलु, “ए भाईओ, अगर मेह्णु हिम्मत देणे तुं मन अन्तर कोई बोक असी त बोले।” 16त पौलुस खड़ भुआ त मेह्णु चुप बिशुण जे हथे बइ भाश कर कइ बोलु, “ए इस्राएले मेह्णुओ त परमेश्वरे भक्ति करणे बाड़िओ, में शुणे! 17इस्राएले मेह्णु के परमेश्वरे हें बाव दादु चुण छड़े। जपल से मिस्र देश अन्तर परदेशी बण कइ बिशे, त परमेश्वरे तेन्के तरक्की की त अपु सुआ बोडी ताकते बइ तेन्हि मिस्र देशे गुलामी केआं बाहर घिन आ। 18परमेश्वरे कोई चढ़ी साल तकर अरुणि धार अन्तर तेन्के बरताब सेहन्ते रिहा। 19तोउं तेन कनान देशे सत जाति खतम कर कइ तेन्के देश हें बाव दादु धे विरासते ईं दिता। ई सोब भुण जे लगभग सढ़े चोउर सौ साल लग गई। 20तढ़िया पता तेन शामुयेल भविष्य वक्ते टेम तकर तेन्हि पुठ पंच बणो थिए। 21तढ़िया पता इस्राएली मेह्णु यक राजा मगा: तोउं परमेश्वरे बिन्यामीन ऊड़ी, कीशे कुआ, शाऊल राजा बणुण जे दिता, जेन चढ़ी साल तकर राज किआ। 22तोउं परमेश्वरे से तसे जगाया घराई कइ दाऊद तेन्के राजा बणा; जेसे बारे तेन उगाह दिता कि ‘मोउं जिशे कुआ दाऊद अन्तर यक ईं मेह्णु मेओ असा, जे में मने हेसाब जोई असा; सेईंए में सोब इच्छा पूरी कता।’#1 शामु 13:14 23परमेश्वरे अपु जुबाने हेसाब जोई एसेरी ऊड़ी अन्तरा इस्राएली मेह्णु के लिए यक बचाणे बाड़ा लंघा, मतलब यीशु। 24तसे एण केआं पेहलाई चुसुणे बाड़ा यूहन्ने सोबी इस्राएली टज अपु मन बदल कइ पुओणि अन्तर चुसुणे खुश खबरी शुणाई छो थी।#मत्ती 3:1-6; मरकुस 1:1-15; लूका 3:1-6 25जपल यूहन्ना अपु सेवा पूरी करण पुठ थिआ, त तेन बोलु, ‘तुस मोउं जे समझते, अउं से न भो! हेरे, मोउं केआं पता यक एणे बाड़ा असा, अउं जेसे खुरे प्युले खोलणे लेएक बि नेईं।’”#यूहन्ना 1:27
26“ए भाईओ, तुस जे अब्राहमे पीढ़ी भो; होर तुस जे परमेश्वरे भक्ति कते, असी सोबी जे ए बचणे समाचार लंघाओ असा। 27किस कि यरुशलेम शेहरे मेह्णु त तेन्के मुखिये, ना त यीशु मसीह पिछाणा, ना तेन्हि भविष्य वक्ती के बोके समझी, जे हर भक्ति करणे रोज पढ़ीन्ती।#यशायाह 53:1-12 तेन्हि अणजाण अन्तर यीशु पुठ दोष लाई कइ तेन्हि भविष्य वक्ती के बोके पूरी की। 28तेन्हि तेस अन्तर मारणे लेएक कोई दोष न मेआ, तोउं बि तेन्हि राज्यपाल पिलातुसे छनेअरे की कि तेस मार छड़। 29जपल तेन्हि तसे बारे धरमे कताब अन्तर लिखो हर यक बोके पूरी की, तोउं तसे लाश तसे चेले क्रूस पुठा भीं किढ़ कइ कब्र अन्तर छइ। 30पर परमेश्वरे से मरो तेन्हि अन्तरा दुबारी जीआई छड़ा। 31होर से तेन्हि सुआ रोज तकर केता रेहा जे तेस जोई साते गलील राज्य केआं यरुशलेम शेहर अओ थिए। मेह्णु के समाणि अब सेईंए तसे उगाह भिन्थ। 32अस तुसी जे ई खुश खबरी शुणान्ते कि जे जुबान परमेश्वरे हें बाव दादु कें धे दुतो थी, 33तेन यीशु दुबारी जीआई कइ से जुबान तेन्के गभुर लिए मतलब हें लिए पूरी की। ए यकदम तिहांणि भु, जीं धरमे कताबे दोके भजन अन्तर लिखो असु,
‘तु में कुआ भो;
आज मेईं तु जमाणा।’#छुआंरी 2:7
34परमेश्वरे से मरो तेन्हि अन्तरा ईं दुबारी जीआ कि से होर कदी मर कइ ना शड़ियाल। तोउं त, तेन ईं बोलु,
‘अउं तोउ से सोब शुची त कदी ना बदलीणे बाड़ी अशुश देन्ता,
जेसे जुबान मेईं दाऊद राजे धे दुतो थी।’#यशायाह 55:3
35तोउं त तेन धरमे कताबे यक होरे भजन अन्तर बि बोलो असु,
‘तु अपु शुचा मेह्णु
शड़ण न देन्ता।’#छुआंरी 16:10; प्रतिनिधि 2:27
36किस कि दाऊद त अपु जीणे टेम परमेश्वरे इच्छा पूरी कर कइ मर गा। से अपु बाव दादु जोई कब्र अन्तर छेई गा त शड़ बि गा। 37पर जे यीशु परमेश्वरे दुबारी जीआ, से न शड़ा।”
38“तोउं त ए भाईओ! जे खुश खबरी अस तुसी शुणाण चहन्ते, तस तुस सुसुर समझीण दिए। से ई भो कि एस यीशु बेलिए ईं तुसी पापी के माफी मेती। 39मूसे नियम असी एन्हि पापी केआं कदी ना बचाई सकतेथ। पर हर यक जेईं, जे तेस यीशु पुठ विश्वास कता, से पापी केआं छुड़काइ घेन्ता। 40तोउं त चौकाने बिशे, ईं न भो कि भविष्य वक्ते बोलो ई बोक, तुसी पुठ पूरी भोई घियेल कि
41‘ए बुराई त हसाड़ करणे बाड़िओ, हेरे!
हैरान भुए, होर खतम भोई घिए;
किस कि इन्हि दिनि अन्तर अउं से कम करणे बाड़ा असा,
जेसे बारे अगर कोउं तुसी जोई बोक करियाल,
तोउं बि तुस कदी विश्वास न करियेल।’”#हब्ब 1:5
42तोउं, जपल पौलुस त बर्नबास तठिआ बाहर निसण लगे त मेह्णु तेन्के छनेअरे कर कइ बोलु कि से होरे भक्ति करणे रोज बि एस बोकी बारे बताए।
43जपल सभा मुक गई त सुआ यहूदी मेह्णु त यहूदी धरम मानणे बाड़े होरे जाति मेह्णु पौलुस त बर्नबासे पता एई गे। तोउं तेन्हि बोक कर कइ से समझाए त हिम्मत दिती कि परमेश्वरे जोई बण बिशे।
गैर यहूदी मेह्णु के बुछ सतसंग बधण
44होर भक्ति करणे रोज परमेश्वरे वचन शुणुण जे शेहरे मेह्णु के हुसुड़ा लग गा। 45पर केहि यहूदी मेह्णु एत बोडा हुसुड़ा हेर कइ जड़ण लगे, त पौलुसे बोकी पुठ बेहसेईण लगे त तसे बुराई बि की। 46तोउं बि पौलुसे त बर्नबासे नडर भोई कइ बोलु, “जरूरी थिउ कि परमेश्वरे वचन पेहले तुसी शुणाओ भुन्ताथ। पर तुसी से ना मान कइ हराला कि तुस अमर जीवने लेएक नेईं। त हेरे, अस तुसी छड़ दी कइ गैर यहूदी के बुछ घेन्ते। 47किस कि प्रभु असी जे ईं निआंग दुतो असी,
‘मेईं तुस गैर यहूदी मेह्णु लिए टगड़ियारी ईं बड़ाओ असे,
ताकि मतोके यक कुणे केईआं होर कुणे तकर सोब मेह्णु बच घियेल।’#यशायाह 49:6”
48त ईं शुण कइ गैर यहूदी मेह्णु खुश भोई गे, त परमेश्वरे वचने गुणगान करण लगे; होर जतर जेईं अमर जीवने लिए ठीक किओ थिउ, तेन्हि विश्वास किआ। 49त प्रभु वचने तेस राज्य अन्तर पूरु हू भोई गोउ।
50पर यहूदी मेह्णु तेस शेहरे खास खास भक्त जिल्हाणु त मड़द उकसाए, होर मेह्णु पौलुसे त बर्नबासे खिलाफ कर कइ भुंजाण लगे त से अपु शेहर केईआं बाहर किढ़ छड़े। 51त अखिर अन्तर पौलुस त बर्नबास तेन्के समाणि अपु प्युली के जन ठुटक कइ इकुनियुम शेहर जे घेई गे। 52पर अन्ताकिया शेहरे विश्वासी खुश त शुची आत्माई बइ भरी थिए।
Currently Selected:
प्रतिनिधि 13: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
