प्रतिनिधि 15

अन्ताकिया शेहर अन्तर बेहसेईण

1तोउं कुछ मेह्‍णु यहूदिया राज्य केआं अन्ताकिया शेहर एई कइ विश्वासी भाई भेणि ईं शिचालण लगे कि “जपल तकर मूसे रीत जोई तुं खतना ना भोल तोउं तकर तुस ना बच सकते।” 2इस बोक पुठ पौलुस, बर्नबास त से मेह्‍णु अपणी अपणी लाण लगे त तेन्हि बुछ सुआ बेहेस भोई गई। तोउं तठियाणि सतसंगे मेह्‍णु ई खरु समझु कि पौलुस, बर्नबास त सतसंग अन्तरा कुछ मेह्‍णु एस बोकी बारे बोक विचार करण जे प्रतिनिधि त सतसंगे स्याणी केईं यरुशलेम शेहर जे लंघाए।

3तोउं अन्ताकिया शेहरे सतसंग बाड़ी से लंघाई छड़े। से फीनीके त सामरिया राज्ये बइ हंट कइ गे। बत तेन्हि विश्वासी भाई भेणि जे बताउ कीं कइ गैर यहूदी मेह्‍णु परमेश्वर कना जे अपु मन खिरका। तेन्के बोकी बेलि सोब विश्वासी सुआ खुश भोई गे। 4जपल से यरुशलेम शेहर पुजे, त तठियाणि सतसंगे मेह्‍णु, प्रतिनिधि त स्याणे तेन्हि जोई खुश भोई कइ मिए। तोउं पौलुस त बर्नबासे बताउ कि परमेश्वरे तेन्हि जोई साते बिश कइ कीं कीं कम किए।

यरुशलेम शेहर अन्तर सभा

5फरीसी दले कुछ मेह्‍णु जेन्हि विश्वास किओ थिआ, खड़ भोई कइ बोलुण लगे, “गैर यहूदी विश्वासी खतना कराण चहिए त मूसे दुतो नियम मानणे निआंग देण चहिए।” 6तोउं प्रतिनिधि त स्याणे एस बोकी बारे बोक विचार करण जे किठे भुए। 7सुआ बेहेस भुण केआं पता पतरसे खड़ भोई कइ तेन्हि जे बोलु: “ए भाईओ! तुस जाणते कि शुरुवाती दिनि अन्तर परमेश्वरे तुसी बुचा अउं चुणा कि में मुंहे बइ गैर यहूदी खुश खबरी शुणे त विश्वास करे। 8मन परखणे बाड़े परमेश्वरे तेन्के धे बि हें ईं शुची आत्मा दिती त तेन्केरी कना अपु उगाही दिती 9होर विश्वासे बेलिए तेन्के मन साफ कर कइ असी त तेन्हि अन्तर कोई फरक नेईं रखो। 10त नियम मानणे, जे जूंण ना त हें बाव दादु, होर ना असी ढीड़ बटु, तस विश्वासी के कियाड़ी पुठ किस रखणे सोचते? होर ई कर कइ किस परमेश्वर परखते? 11आं, हें ईं मनुण असु कि से त अस बि प्रभु यीशु कृपाई बेलिए ईं बच घेन्ते।”

12तपल पूरी सभा चुप बिश कइ बर्नबासे त पौलुसे बोक शुणुण लगी। तेन्हि परमेश्वरे तेन्के बेलिए गैर यहूदी मेह्‍णु बिचा कीं चमत्कारे कम त निशाणी हराली, तसे बारे बोलुण लगो थिए।

13जपल तेन्हि बोल बटु त यरुशलेम सतसंगे मुखिया याकूब बोलुण लगा, “ए भाईओ, में शुणे। 14शमौन पतरसे असी बताउ कि कीं कइ परमेश्वरे शुरुवाती दिनि अन्तर गैर यहूदी मेह्‍णु के बुछ अपु टज बणाण जे कृपा किओ असी। 15ए भविष्य वक्ती के बोके हेसाब जोई ईं असी, किस कि धरमे कताब अन्तर लिखो असु,

16‘इस केआं पता अउं फि वापिस एन्ता,

त दाऊदे उजड़ो खानदान दुबारी बसान्ता।

अउं तसे बरबाद भुओ जगाह दुबारी बणान्ता, त

तस खड़ेरता,

17ताकि जे बचो मेह्‍णु असे, मतलब सोब जाति मेह्‍णु,

जेन्हि अपणाणे लिए मेईं अपु नउ दुतो असु,

से प्रभु तोपियेल।

18ईं सेईंए प्रभु बोक भो, जे धरती शुरुवात केईआं ईं

अन्हि बोकी बोते अओ असा।’#अमोश 9:11-12; यशायाह 45:21 ”

19“तोउं त, ए ट्यारेओ! में विचार ईं असा कि असी तेन्हि गैर यहूदी मेह्‍णु पुठ नियमे बेमतलब भरोठ ना छाण, जे परमेश्वरे कना जे अपु मन खिरकान्ते। 20पर अस तेन्हि जे चिट्ठि लिख कइ ई चोउर नियम मनण जे बोते।

मुर्ति केआं जुठा भुण केआं अपफ बचाई रखे,

लछबन भुण केआं बचुण,#निसुणे 20:14

कियाड़ी केआं घोप कइ मरो जानवरी के मासुं ना खाण,

त लहु ना खाण पीण।”#पुजारोठि 17:12; विधि 12:23-24

21“किस कि पेहलकण जमाने केआं मूसे नियमे हर शेहर अन्तर प्रचार भुन्ता अओ असा, त हर भक्ति करणे रोज अराधनालय अन्तर पढ़ीन्ते अओ असे।”

सतसंगे स्याणी गैर यहूदी जे चिट्ठि लंघाण

22तोउं सोब प्रतिनिधि, सतसंग त सतसंगे स्याणे राजि भोई कइ ठीक किउ कि अपफ बुचा कुछ मेह्‍णु चुण कइ तेन्हि पौलुस त बर्नबास जोई साते अन्ताकिया शेहर जे लंघाए। तेन्हि दुई मेह्‍णु चुणे जे विश्वासी के बुछ खास थिए। से थिए यहूदा जेस जे बरसब्बास बोतेथ, होर सीलास। 23तेन्हि तेन्के हथ ईं चिट्ठि लिख कइ लंघाई: “ए सोब गैर यहूदी विश्वासी भाई त भेणिओं! जे अन्ताकिया शेहर, सीरिया त किलिकिया राज्य अन्तर असे! तुसी जे यरुशलेम शेहरे सतसंगे स्याणी त प्रतिनिधि के नमस्ते। 24असी शुणो असु कि असी बुचा कुछ मेह्‍णु, जेन्के धे असी कोई हक नेओथ दुतो, तेन्हि तुं अठि घेई कइ तुस अपु बोकी बइ परेशान कइ छड़े; त तुस दुमने कइ छो असे। 25तोउं त, असी सोबी राजि भोई कइ ई ठीक समझु कि हें कुछ मेह्‍णु चुण कइ हें ट्यारे भाई बर्नबास त पौलुस जोई तुसी केईं जे लंघा। 26एन्हि भाई हें प्रभु यीशु मसीहे नओएं लिए अपु जान खतरे अन्तर छओ असी। 27त असी तुसी केईं यहूदा भाई त सीलास भाई लंघाओ असे। से बि अपु मुंहे बइ सोब बोक बोल छते। 28शुची आत्माई त असी ठीक लगु कि लिखो इन्हि जरूरी बोकी छड़ दी कइ, तुसी पुठ होर कोई भार न छड़ण:

29तुस मुर्ति केईं भकत चढ़ो जानवरी के मासुं ना खाए,

लहु ना खाए, ना पिए,

कियाड़ी केआं घोप कइ मरो जानवरी के मासुं ना खाए

त लछबन भुण केआं दूर बिशे।

अन्हि केआं दूर बिशियेल त तुं भलु भुन्तु। तुसी शान्ति मेती रिहे।”

अन्ताकिया शेहर अन्तर प्रतिनिधि पुजुण

30तोउं से तठिआ घेई कइ अन्ताकिया शेहर पुजे, त सतसंगे सभा भिआई कइ चिट्ठि तेन्के धे दिती। 31सतसंगे विश्वासी से चिट्ठि पढ़ कइ तेस उपदेशे बोकी बइ खुश भोई गे। 32यहूदा त सीलास जे अपफ बि भविष्य वक्ते थिए, सुआ बोकी बइ विश्वासी भाई भेणि जे हिम्मत दिती त विश्वास अन्तर पक्का भोई बिशुण जे बोलु। 33से कुछ रोज तठि बिश कइ, शान्ति जोई अपु लंघाणे बाड़ी केईं जे यरुशलेम शेहर घेई गे। 34[पर सीलास तठि बिशण अब्बल लगु, त यहूदा अकेला यरुशलेम शेहर जे घेई गा।] 35पर पौलुस त बर्नबास अन्ताकिया शेहर बिश गे, होर सुआ मेह्‍णु जोई साते प्रभु वचन शिचालते त खुश खबरी शुणान्ते रिहे।

पौलुस त बर्नबासे अणबण

36किछ रोजे पता पौलुसे बर्नबास जे बोलु, “जेन्हि जेन्हि शेहरी असी प्रभु वचन शुणाओ थिए, चले, फि घेई कइ अपु भाई भेणि हेरते कि से कीं असे।” 37बर्नबास चहन्ताथ कि यूहन्ना जेस जे मरकुस बोते, अपफ जोई साते नेण। 38पर पौलुस तेस मेह्‍णु नेण खरु न लगु, जे पंफूलिया शेहर अन्तर तेन्हि केआं बखरा भोई गो थिआ, त तेन्के कम अन्तर साथिओठ नेओथ दुतो।#प्रतिनिधि 13:13 39इस बोकी पुठ तेन्के बुछ अति अणबण भोई गई कि से बखरे भोई गे; त बर्नबास, मरकुस नी कइ जहाज पुठ कुप्रस टापु जे घेई गा। 40पर पौलुसे सीलास चुणा, होर विश्वासी भाई भेण, तेन्हि प्रभु कृपाई हवाले कइ छड़े त से तठिआ घेई गे। 41से सीरिया देश त किलिकिया इलाके बइ गे त सतसंग पक्का कते गे।

Currently Selected:

प्रतिनिधि 15: pgg

Highlight

Compare

Copy