प्रतिनिधि 11

यरुशलेमे सतसंग अन्तर पतरसे अपु कमे साफ ब्योरा देण

1तोउं यहूदिया राज्य अन्तर प्रतिनिधि त विश्वासी भाई भेणि शुणु कि गैर यहूदी मेह्‍णु बि परमेश्वरे वचन मन छड़ा। 2तोउं त, जपल पतरस यरुशलेम शेहर वापस आ, त यहूदी विश्वासी मेह्‍णु तेस जोई बेहसेईण लगे। 3“तु किस गैर यहूदी के गी गा जेन्के खतना नेईं भो त तेन्हि जोई साते खउ पिउ?”

4एस पुठ पतरसे तेन्हि शुरु केआं खड़ सोब बोके शुणाई, 5“अउं जोपा शेहर अन्तर प्रार्थना करण लगो थिआ, त मोउं यक दर्शण भुआ कि यक बोडु चादुर उडुरतु, अम्बर केआं में भेएड़ आउ। 6जपल में ध्यान तेस पुठ गा, त तेस अन्तर मतोके हर किस्मी जानवर, कीड़ी के ईं घिशकिण देणे बाड़े जानवर त अम्बरे चड़ी चखुरु थिए। 7त मेईं ईं बि शुणु, ‘ए पतरसा, खड़ भो! इन्हि बणाई कइ खाण दे!’ 8मेईं बोलु, ‘ना प्रभु, कदी ना; किस कि मेईं कदी बि कोई जुठी त अशुची चीज नेईं खओ।’ 9एसे जवाब अन्तर अम्बर केआं दोके लिंगि अवाज आई, ‘जे किछ परमेश्वरे अपफ शुचु किओ असु, तेस जे तु जुठु न बोल।’ 10टाई लिंगि इहांणि भु; तोउं फि सोब अम्बर अन्तर नी छउ। 11तोउं शुणे, तिखेईंए कैसरिया शेहर केआं मोउं केईं जे लंघाओ टाई मेह्‍णु तेस गी पुजे, जेठि अस थिए। 12तोउं शुची आत्माई मोउं बगैर किछ बोले, तेन्हि जोई साते घेण जे बोलु। तोउं ए छेहो भाई बि मोउं जोई साते भोई गे; त अस कुर्नेलियुसे गी गे। 13तेन मेह्‍णु असी जे बोलु कि तेन अपु गी यक स्वर्गेदूत खड़ खड़ काआ, जेन तेस जे बोलु, ‘जोपा शेहर अन्तर मेह्‍णु लंघाई कइ शमौन, जेस जे पतरस बोते, भिआण दे। 14जे बोक से तुसी जे बोता, तसे बेलिए तु त तें टब्बरा बच घेन्ता।’”

15“जीं अउं बोक करण लगा, त शुची आत्मा तेन्हि पुठ तेस रीत जोई आई जेस रीत जोई शुरु अन्तर असी पुठ अओ थी। 16तपल मोउं प्रभु यीशु तेस वचने चेता आ; जे तेन बोलो थिआ, ‘यूहन्ने त पाण अन्तर चुसे, पर परमेश्वर तुसी शुची आत्माई अन्तर चुसता।’ 17होर जपल परमेश्वरे तेन्के धे बि सेईंए शुची आत्माई वरदान दिता, जे तेन असी प्रभु यीशु मसीह पुठ विश्वास करणे बेलि दुतो थिआ; त अउं कोउं भुन्ता, जे परमेश्वर रोक बटताथ?”

18ईं शुण कइ यरुशलेम शेहरे यहूदी विश्वासी चुप भोई गे, त परमेश्वरे गुणगान कर कइ बोलुण लगे, “तोउं त, परमेश्वरे गैर यहूदी मेह्‍णु जे बि अपु अपु मन बदलाई कइ अमर जीवन जीणे दान दुतो असा।”

अन्ताकिया शेहर अन्तर सतसंग शुरुवात करण

19यरुशलेम शेहर अन्तर स्तफनुस घोड़िआई कइ मारण केआं पता सतसंग पुठ जे अशी अओ थी, तसे बझई जोई विश्वासी मेह्‍णु इएर-ओवर खिल्हिर गो थिए। से हंटते-फिरते फीनीक राज्य, कुप्रस नओएं टापु त अन्ताकिया शेहर पुजे। होर से यहूदी मेह्‍णु छड़ दी कइ होर केसे जेईं बि तेस परमेश्वरे वचन न शुणान्तेथ। 20पर तेन्हि अन्तर कुछ कुप्रस टापु त कुरेन शेहरे मेह्‍णु अन्ताकिया शेहर एई कइ, गैर यहूदी मेह्‍णु जे बि प्रभु यीशु खुश खबरी बोक शुणाण लगे। 21प्रभु यीशु शक्ति तेन्हि जोई थी। त सुआ मेह्‍णु विश्वास कर कइ प्रभु कना जे अपु मन खिरकाण लगे।

22जपल तेन्के चर्चा यरुशलेम शेहरे सतसंग अन्तर शुणी, त तेन्हि बर्नबास अन्ताकिया शेहर लंघा। 23जपल से तठि पुजा त परमेश्वरे कृपा हेर कइ खुश भोई गा। तोउं तेन तेन्हि सोबी जे हिम्मत दी कइ बोलु कि पूरे मन जुओई प्रभु भक्ति करे। 24बर्नबास यक भला मेह्‍णु थिआ, त शुची आत्माई त विश्वास बेलिए भरिए थिआ; ईं भोई कइ सुआ मेह्‍णु प्रभु कना जे पैटे। 25त से शाऊल तोपुण जे तरसुस शेहर जे घेई गा। 26होर जपल से तेस जोई मिआ त तेस अन्ताकिया शेहर जे घिन आ। तोउं भु ईं कि से दुहिए यक साल तकर सतसंग जोई मी कइ सुआ मेह्‍णु शिचालण लगे। त विश्वासी सोबी केआं पेहले अन्ताकिया शेहर अन्तर “इसाई” बोलुण लगे।

यरुशलेम शेहरे विश्वासी जे मदत

27तेन्हि दिनि कुछ भविष्य वक्ते यरुशलेम शेहर केईआं अन्ताकिया शेहर आए। 28तेन्हि अन्तरा अगबुस नओएं यक जेईं खड़ भोई कइ शुची आत्माई बेलिए भरी कइ बोलु कि पूरे धरती अन्तर बोडा अकाल घेन्ता। (ए अकाल तपल गा जपल रोमी सम्राट कैसर क्लौदियुस राज कताथ।) 29तिखेईं अन्ताकिया शेहरे विश्वासी भाई भेणि ठीक किउ कि हर यक जेईं अपु अपु कमाई हेसाब जोई यहूदिया राज्य अन्तर बिशणे बाड़े विश्वासी के मदत करण जे किछ न किछ लंघान्ते। 30तेन्हि तिहांणि किउ; तोउं बर्नबास त शाऊले केईआं से दान सतसंगे स्याणी केईं लंघाई छड़।

Currently Selected:

प्रतिनिधि 11: pgg

Highlight

Compare

Copy