Lomu 6

Mosinge mukeleninenge no anu soli noxou Iesua

1Laso axova? Nenge talavu lexe iaiama ne uua'ulixu susu axone. Laso nenge tasusu tasususi so u'oxonu iaiama noxou Mosinge utelai? 2Uasi to! Nenge tesoli la tekalipala no anu susu mukalu. Laso nenge taxolu mo tasusu xo ma'ia? 3Xo axova, ngingi ngalamana no anu laxu latilovo e ilixo so kelele uao? Xo tamitema mikeleninenge no lexa mukalu, la anu axone kalumo Mosinge mukeleninenge no anu soli noxou Kalaisiti Iesua. 4Mukeleninenge no anu soli noxou axone laso no voxo e mi'asixu la nenge kalumo loxo teai no lulu ne. Xe mune'e xe no anu xavi tatila noxou Mosinge anu Maminge la anu mutulusou Kalaisiti no anu soli. Laso axone la nenge kalumo tetulu mo tamomomo so taxolu no anu mauli alavua. 5Laso anu ane. Loxo nenge tepita noxou no anu soli noxou, la axone kalumo temauli no voxo ane Mosinge mupamaulinula.

6Xo aloxo 'o. Nenge telavu lexe no voxo Kalaisiti mulili musoli no ovu valautu la tava'u susu no vasimenge mulili ne kalumo. Mulili ne la xavi no anu susu no vasimenge a musoli mo mukalu ne. Laso nenge tamitemaou susu mo so upalupalusinge vitanisila uasi. 7Xo itema aneva musoli mukalu la anu susu ukasou uasi, uxolu lalavulusi.

8Ioxe, loxo nenge nenge'a Kalaisiti tesoli la nenge talavu manina lexe nenge nenge'a tamauli aloxo ne. 9Mo nenge talavu lexe Mosinge mutulusou Kalaisiti no anu soli la umomomo so usolila uasi. Soli ne umomomo so ukasoula uasi. 10Anu musoli la no anu vote'i anene la anu muua'ulixu susu avile. Mo mi ne muxali alaxu vilesisi ane, usolila uasi, umaulisi. Xe no anu mauli noxou ne, la uxoxolu oponu vilesisi noxou Mosinge. 11Xe axone kalumo la ngingi opongengi ututulu lexe ngesoli mo ngekalipala no anu susu mukalu. Ia no anu mauli noxinge, la ngingi ngaxolu noxou Kalaisiti Iesua laso opongengi vilesisi noxou Mosinge. 12La mamu so ngapilixingengi so susu u'uli laxungengi mo upamupamuxanu vasimenge no anu masamasaxa masua. 13Mo mamu so nga'italonu vasimenge pa'upa'usou no anu susu so uxalixu ili'ilixo masua no anu. Nga'oxo axone uasi, nga'oxo aloxo 'o. Ngapilixingengi noxou Mosingesi xo anu molu mupamaulingengi no anu soli. Ngapilixingengi noxou so anu molu upamuxanu vasimenge pa'upa'usou so uxalixu ili'ilixo malemalenga no anu.

Susu u'uli laxunengela uasi

14Vaimomo 'o ne susu anu tatanangengi uasi, xo ngingi ngaxolu no laxu lo uasi. Ngaxolu no anu iaiamasi. 15Ia axova, nenge taxolu no laxu lo uasi taxolu no anu iaiama, laso nenge tanava? Tasususi? Uasi to! 16Loxo ngavikala axone la ngalavu laixe uasi ane. Xo aloxo 'o. Loxo tamitema ipilixine'i noxou itema vile so imulinu vaikalaou kitukitu la ane'i tamitemaou ane. Mo axone kalumo loxo tamitema ipilixine'i so imulimulinu susu la anu upamuxane'i mo ili'i la ulaixi'a no anu soli. Ia loxo ipilixine'i mo ilomuxu Mosinge la ane'i ixali tamalemalenga no iou.

17Ia eni a'itinu Mosinge ualasou noxinge, xo tatei la ngingi ngexolu tamitemaou susu mo so mupamuxangengi. Ia mune'e xe Mosinge mupala'anixu vaikalaou noxinge la ngingi opongengi mukasou lexe manina. 18Laso anu mu'umengengi no anu xavinu susu. Mu'umengengi axone laso vaimomo 'o ilixo malemalengasi u'uli laxungengi.

19O tamaula, eni a'oxonu vaikala latilovo aloxo 'o xo vaikala ano'o u'asi'asi mo ngingi pakia'inge uao. Ia ngalomu. Tatei la ngepilixinu vasimenge pa'upa'usou no anu susu so mu'uli laxungengi. Mu'uli laxungengi laso ilixo noxinge mukilikalu mulolutu. Tei la nge'oxo axone, ia vaimomo 'o ngapilixinu vasimenge pa'upa'usou no anu ilixo malemalengasi. Nga'oxo axone xo Mosinge molu mukalipalangengi lexe ngingi tamitemaou mu'isalili. 20Xo tei la susu mukasinge mo mu'uli laxungengi laso ilixo malemalenga umomomo so upamuxangengi uasi. 21Susu mukasinge laso maixene ngamamaila no anu ilixo noxinge ne. Xo manina, ili'ilixo anene nene'axu axova? Mimi anene uxalixu soli noxi'a tamitemasi. 22Ia vaimomo 'o Mosinge mu'umengengi no anu xavinu susu mo muxalixinge tamitemaou. Vaimomo 'o anu molu upamuxangengi so nga'oxonu ili'ilixo ane no anu masaxa noxou mu'isalili. Laso nene'axu axova? Aloxo 'o. Anu molu ulosinge mauli kaluxu uasi. 23Laso anu ane. Loxo itema uxaxai no anu susu, la lapesou ane solisi. Ia Mosinge uiaiama noxinge so lexe taxolu noxou Kalaisiti Iesua anu Tatananenge, la tano'u mauli kaluxu uasi.

Currently Selected:

Lomu 6: ATA

Highlight

Compare

Copy