Lomu 5

La'ia no tainenge nenge'a Mosinge a mukalu ne

1Ioxe, nenge telopala mukalui la Mosinge mumoxo'inge lexe nenge tamalemalenga. Xo Tatananenge Iesua Kalaisiti molu mupitanenge so nenge'a Mosinge oponenge vilesisi. 2Xe anu mu'oxonu vote'isinge so loxo telopala, laso nenge te'unalai mo a taxoxolu no anu iaiama noxou Mosinge 'o. Taxoxolu mo taxomaiou voxo ane Mosinge uno'inge so nenge'a taxolu no tualasou lailaixe. Nenge talavusou lexe voxo ne a une'e laso osa'ilasou misevile. 3Ia ta'osasou voxo anenesi uasi, ta'osasou tu'utu'umaxu ane tatavulenu 'o. Ta'osasou xo ma'ia? Ta'osasou xo tu'utu'umaxu anene so u'oxonu pakia'inge. 4U'oxonu pakia'inge mo so loxo tu'umaxu ma'ia uxali la nenge utotomu tapilixinengesi. Tapilixinenge noxou Mosingesi laso nenge talopala taxomaiou voxosou ne. 5Xo lopala noxinge anu umomomo so ulapau vitanisi uasi, nene'axu uxali ane. Xo Mosinge mulosinge Ulenu Laixe mukalu. Mo no anu vote'i anenesi munixi'u sexela noxou no oponenge.

6Xo aloxo 'o. Tei la nenge pakia'inge uasi so talu'enu Mosinge tanu. Nenge texolu va'axu avile mo ta'oxonu ilixo vile laixe no iou uasi. Ia no voxo loxo Mosinge molu musosovosou, la Kalaisiti musolisinge. 7Xo axova? Loxo nenge tamaisou menexinge laixe vile so usoli, la nenge ta'italonu mauli noxinge so tapamaulinu? Mane vilevilesi noxinge imomomo so i'oxo axone. Ia loxo itema vile masua la umomomo uasi manina, tanengexu uasi ane. 8Anene ilixo noxinge, ia noxou Mosinge iou vilemo manina. Anu musexelanenge misevile. Xo no voxo loxo oponenge mututulu no anu sususio, la anu mupalusou Kalaisiti musoli so mupamaulinenge. 9Kalaisiti musoli xe sialuxu munixisinge laso Mosinge mumoxo'inge lexe nenge tamitema talapusi. Xe ili'i no anu voxo noxou Mosinge e so mamulo la nenge tamamulo uasi, tamaulisi xo taxolu noxou Iesua. 10Tei la nenge tauluaou Mosinge mo la'ia noxou muxolu noxinge. Ia Olu musoli no taninenge laso la'ia no tainenge nenge'a Mosinge a mukalu ne. Xe Olu mumaulila, laso nenge texalisou pamauli loloni no anu mauli noxou. 11Mo mi vilela aloxo 'o. Tatananenge Iesua Kalaisiti mupitanenge so nenge'a Mosinge oponenge vilesisi. Mupitanenge axone laso ta'itinu Mosinge ualasousi.

Atamu anu tava'u soli ia Iesua anu tava'u mauli

12Ioxe, nenge talavu lexe itema vilesisi tava'u susu muxali. Susu muxali laso soli uxalisinge nenge tamitema mukalusi. Uxalisinge mukalusi xo nenge mukalusi tasusu. 13Ia axova no anu voxo loxo lo uxali uao? Xo lo uasi laso Mosinge utilovosi'a no anu lo uasi. Ia no voxo anene susu muxolu kalumo. 14Xo musoko'u noxou Atamu mune'e avile muxali noxou Mosisi, la soli ne mukasi'a tamitema mukalusi. Xe ane'i ne la ixola'u lo loxo Atamu uasi, xo ilavusou lo vile uasi. Ia ane'i kalumo soli mu'uli laxune'i.

Anu axone. Atamu ne anu tava'u mi vile musu'asi'a tamitema latala. Xe itema ane Mosinge muvavalimasou lexe une'e ili'i la anu tava'u mi vile so usu'asi'a tamitema latala kalumo. 15Ia mi ane Mosinge ulosinge ne anu uua'ulixu susu noxou Atamu avile. Xo noxou Atamu la tamitema latala mixalisou soli. Ia noxou Iesua Kalaisiti la Mosinge mu'oxonu iaiama toxoxu noxinge. Mo iaiama noxou ne munixinixi mo musu'asinge tamitema tavu'alo. 16Xe mi ane Mosinge ulosinge uua'ulixu susu noxou Atamu aloxo 'ola. Susu noxou Atamu muxalixu la'ia noxou Mosinge ane ukolinu noxi'a latala. Anene nene'axu susu soxu vilesisi. Ia nenge, la susu mulolutusi. Ia Mosinge muiaiama so anu muxalixinge talapu no iou mo so ukolinu susu noxinge uasi. Anene nene'axu mi laixe ane mulosinge noxou Iesua. 17Xo itema vilesisi ne mulomuanu Mosinge vaikalaou laso soli mu'uli laxunenge tamitema mukalusi. Ia axova noxinge nenge ane texalisou iaiama tatila noxou Mosinge mo so umoxo'inge tamalemalenga no iou? Xoluxolu noxinge axova? Aloxo 'o. Nenge taxolu la taxolu noxou Iesua Kalaisiti laso nenge ta'uli'uli avile ane.

18Ioxe, laso nenge taxavutalanu aloxo 'o. Voxo vile la Atamu mulomuanu vaikala noxou Mosinge laso la'ia noxou Mosinge musu'asinge tamitema mukalusi. Xe Iesua, la voxo vile mulomuxu vaikala noxou Momusi laso mu'oxonu vote'i so taxali malemalenga mo taxalisou mauli. 19Itema vile ne mulomuanu vaikalaou Mosinge laso nenge latala texali tamitema so susu. Xe itema vile ne mulomuxu vaikalaou Mosinge laso nenge tamitema tapiena texali tamalemalenga no iou Mosinge.

20Ioxe, no anu lo, la Mosinge mumulaxu mo so susu upala'a u'oki avile. Susu mupala'a mu'oki axone, ia iaiama kalumo mupala'a mo mu'oki avile. 21Xo susu muxalixu soli laso mu'uli laxunenge. Ia vaimomo 'o iaiama noxou Mosinge anu mu'uli'uli avile. Xo no anu ilixo malemalenga noxou Iesua anu Tatananenge la Mosinge muxalixu mauli kaluxu uasi.

Currently Selected:

Lomu 5: ATA

Highlight

Compare

Copy