Mupala'a 7

Ta'isilaeli 144,000 mixalisou sosovo noxou Mosinge

1Ioxe, mukalu la emaisi'a ta'angelo tami'a mitulu no anu lialia teletelexu tami'a. Ane'i mitanutanuxu sivo molu no anu lialia teletelexu tami'a ne. Mitanuxu mo so sivo uilisou lialia xe luaki xe ovu ovu uasi. 2Xe emaleila sila angelo vile molu loxo no aso uxali mune'e. Anu mutetelisou sosovo vile. Sosovo ne anu noxou Mosinge e umamauli. Mune'e la mu'ava tatila noxi'a ta'angelo tami'a e Mosinge mulosi'a xavi so imamulonu lialia ilou luaki. 3Mu'ava lexe, “Ngingi ngamamulonu lialia ilou luaki xe ovu ovu kolokolo uasi. Ngaxolu xo nexi tamulaxu sosovo noxou Mosinge no alaie'i tamitema so xaixaiou teio.” 4La elomusi'a ilemolu navasi'a tamitema so ixalisou sosovo ne lexe 144,000. Isosovosi'a no anu laili noxi'a Ta'isilaeli mukalusi. 5Laso misosovosi'a tamitema aloxo 'o. Tamitema 12,000 no anu laili noxou Iuta. Xe 12,000 no anu laili noxou Lupeni. Xe 12,000 no anu laili noxou Xati. 6Xe 12,000 no anu laili noxou Asa. Xe 12,000 no anu laili noxou Napitali. Xe 12,000 no anu laili noxou Manase. 7Xe 12,000 no anu laili noxou Simioni. Xe 12,000 no anu laili noxou Livai. Xe 12,000 no anu laili noxou Isakali. 8Xe 12,000 no anu laili noxou Sevuluni. Xe 12,000 no anu laili noxou Iosepu. Xe 12,000 no anu laili noxou Peniamini. Tamitema ano'o mukalusi mino'u sosovo noxou Mosinge ne.

Tamitema tavu'alo e tavu'alo mipitanu anaxa'a so mi'itinu Mosinge ualasou

9Ioxe, mukalu xe emaleila la emaisi'a tamitema tavu'alo e tavu'alo, ta'itisi'a uasisi. Tamitema ne so xale tuatuala mukalusi xe no anu lailaili latala xe vaikalai'a vilevilesi xe vasime'a iouiou. Ane'i mukalusi mitulu no laxunu sia kingi mo no laxunu Sipisipi Ilie. Xe no vasime'a la lavuluti kea veveni mukalusi. Xe no avo'a la mitetelisou mi loxo xolou voloxu 'o. 10La mipatanu anaxa'a so mi'ava tatila lexe, “Mosinge e uxoxolu no anu sia kingi noxou ilou Sipisipi ilie, ane'i ilousi tamosou pamauli.”

11Xe ta'angelo mukalusi mixolu mixixaosou sia kingi mo mixolu mixixaosi'a tatiatila xe tamimi tami'a. La ta'angelo mukalusi milalusi so mitangatulu no laxunu sia kingi mo mi'itinu ualasou Mosinge. 12La mivikala lexe, “Manina misevile, nenge ta'itinu ilixou laixe mo ualasou mo lavulavuou u'asi'asi xe talemolu laixe noxou. Xe tatoxu xo anusisi xavinu mo anu u'uli laxunu mimi mukalusi. Anu uxolu Mosinge ulai ulai kaluxu uasi. Vaikala ano'o maninasi.”

Xoluxoluxa'a Mosinge ta'olu ili'i ne laixesi

13Ioxe, laso vile noxi'a tatiatila ne mitali'isilo lexe, “Ane'i ane lavuluti kea no vasime'a 'o ne ane'i ta'ei? Ane'i so tuala ne'ei?” 14La eni ekolinu lexe, “Tatila, nini nelavusi'a ane.” Sila anu muvikala aloxo 'o, “Ane'i tamitema ano'o me'a no anu voxo so ulua. Ane'i mi'uinu lavulutii'a no anu sialuxu Sipisipi Ilie laso muxali muvalukeasi. 15Laso maixene ane'i itulu no laxunu sia kingi noxou Mosinge. La aso mo olovoxo ane'i ixolu i'oxonu xaixai noxou no anu tasou. Mo Mosinge uxolu no anu sia kingi noxou alai noxi'a axone so usaxila'a. 16Laso ane'i isolixa'a so la'ilali o lexala uasi. Mo aso uve'a uasi mo mi vile u'oxonu sasaie'ila uasi. 17Xo Sipisipi Ilie uxolu nonixi manina no anu sia kingi. La anu usaxila'a a loxo itema usaxila'a tasipsipi. Mo upamuxane'i so ilai iie no anu lexa so mauli no luxu. Xe ie'i lexaxu la Mosinge uiasou mo so itamala uasi.

Currently Selected:

Mupala'a 7: ATA

Highlight

Copy

Compare