Mupala'a 6

Sipisipi Ilie mulokelokesou sosovo ane muteinoxu lavuku

1Ioxe, emaleila la Sipisipi Ilie mulokenu sosovo vile e muteinoxu lavuku ane mutetelisou ne. La elomusou vile noxi'a tamimi tami'a muvikala lexe, “Nane'e 'o.” La xolinu loxo lele'e upau 'o. 2Xe emalei loxo 'o sila emaisou osi kea vile la evile mutalupexa no anu. Mutalupexa la mutetelisou pasiko mo milosou ati iou vile ane so umaxa'u lexe anu mosou oto. La anu mulutu so uua'uli no anu oto'oto.

3Mukalu la Sipisipi Ilie mulokenu sosovo tameisou e muteinoxu lavuku ne. Xe elomusou tameisi'a tamimi tami'a muvikala lexe, “Nane'e 'o.” 4Sila osi vilela mupa la vasimolu lauoinu loxo navu latoxonu. La noxou ane mutalupexa no anu la milosou xavi so umamulonu xoluxolu lalavulusi. Mo so axone la tamitema ive'ave'a tamenexi'a isoisoli. La milosou laviso so oto toxoxu so uxalixu mi ne.

5Mukalu la Sipisipi Ilie mulokenu sosovo tatalusou e muteinoxu lavuku ne. Xe elomusou tatalusi'a tamimi tami'a ne muvikala lexe, “Nane'e 'o.” Xe emalei loxo 'o sila emaisou osi su'inu vile. La anu ane mutalupexa no anu mutetelisou lasixeli so tatilivosou mi vile lexe tu'umaxu axova. 6Xe elomusou xoli vile molu no taine'i tamimi tami'a muvikala aloxo 'o, “Nini nalai na'oxonu xaixai noxine so vitolo. Laso loxo itema uxaxai aso loloni xe uxalisou lapesou la ulotonu uiti malaxo uasi. Umomomo no anu lasopeni se kitua sesi. Xe loxo vali ngiaxu la lasopeni tatalu kitukitusi. Ia no anu ovu olivi xe lamota uaini la namamulonu mamu mo so tamitema ino'u lexaxusio.”

7Mukalu la Sipisipi Ilie mulokenu sosovo tami'asou e muteinoxu lavuku ne. Xe elomusou tami'asi'a tamimi tami'a ne muvikala lexe, “Nane'e 'o.” 8Xe emalei loxo 'o sila emaisou osi vasimolu loxo lia mixovulo 'o. La anu ane mutalupexa no anu ualasou lexe Soli xe emaisou tanixa'a tamitema misoisoli a mumulinu. La milosi'a ilou xavi so ivelunu tamitema laili tami'a mo so no anu laili vile la i'oxonu aloxo 'o. Noxi'a se'i la ive'ave'a no anu laviso so oto. Xe noxi'a se'i la ive'ave'a no anu vitolo. Xe noxi'a se'i la ive'ave'a no anu pipiena. Xe noxi'a se'i la ipalupalusi'a tamisoposi tavova so ive'ave'a.

9Mukalu la Sipisipi Ilie mulokenu sosovo ta'uvesou e muteinoxu lavuku ne. Xe emalei loxo 'o sila no tava'u tanixu navu emaisou ulene'i ane'i ane tamitema mive'ave'axu vaikalaou Mosinge. Xo ane'i ne pakia'a so mitetelisou mo milanu vaikalou laso taxilili mive'axu. 10Mixolu la mikatu tatila aloxo 'o, “Tatananexi. Nini na'uli'uli no anu mimi mukalusi. Mo ilixomeni malemalenga mo maninasi. Xe nexi 'o tatemanu lialia mivexe mo sialunexe munixi. Laso nakolinu sialunexe a talu?” 11Mivikala axone ia milosi'a lavuluti kea veveni noxi'a vilevilesi mo mivikalane'i aloxo 'o, “Ngaxolu mo ngama'ila sevile 'o. Ngaxolu xo taxilili a ive'ave'a tavivinge tamitema so xaixaisio. Xo xe navasi'a umomomo no anu sosovosoui laso ane, Mosinge u'oxonu loxo ngekatu no anu.”

12Mukalu la Sipisipi Ilie mulokenu sosovo 6-sou e muteinoxu lavuku ne. Xe emalei loxo 'o sila uni'uni toxoxu e toxoxu muxali no lialia. La aso muxiu muxali su'inu loxo tiva teinu 'o. Xe so'io kalumo muxiu muxali lauoinu loxo sialu. 13Xe tataoto no loxotolo kalumo milapalapau mulu'e no lialia. La a loxo ovu viki ngiangiaxu ununu ulapau mi ne sivo tatila uilisou. 14Xe loxotolo muxexe a loxo mo'e ilokenu so ipipinu. Xe la'ola'olu mo ailani no luaki kalumo muvula muxexe no anu tanitanixu. 15La takingi so tuatuala no lialia xe taluluai xe tatiatila noxi'a ta'ami xe tamosou mimi xe tamitema xavine'i xe ane'i ane ixaxai loxo tasilevi xe tamitema ane ixolu vitanisi, ane'i mukalusi mi'ume so italume no maia taxataxanu xe no anu lavolavo'o so la'olu tava'u. 16Mi'ume'ume la mi'ava no anu la'ola'olu xe lavolavo'o lexe, “Auo, ngane'e ngasu'asixe mo ngatalumeixe noxou anu ane utalupexa no anu sia kingi. Mo ngautululunexi no anu la'ia noxou Sipisipi Ilie. 17Xo voxo tatila so la'ia noxi'a ilou a muxali 'oe. Laso tamaxalexu mo taxolu laixe uasisi a.”

Currently Selected:

Mupala'a 6: ATA

Highlight

Copy

Compare