Mupala'a 22

Tioni mumaisou lexa so mauli ilou ovu so mauli

1Ioxe, emaisou mimi ne mukalu la angelo mulosoielixu lexa vile. Anu lexa so mauli ane. Anu lamana e lamana loxo laxalasi 'o. Lexa ne molu no anu sia kingi noxou Mosinge ilou Sipisipi Ilie. 2Molu no anu sia kingi la mupolo no anu tainu vote'i tatila so taoni ne. No anu pa'umolu lexa, xalevile xe xalevile la ovu so mauli a mutulu. Anu unene'a umulinu so'ioso'io vilevilesi. Laso axone la uxalixu ngiangiaxu iou 12 u'isalili no anu so'ioso'io ne. Xe volovoloxu la anu loxo lamalasini so upaipoune'i tatemanu xale tuatuala. 3La tu'utu'umaxu ane mukasi'a tamitema no lialia tatei ne uxolula uasi. Xe sia kingi noxou Mosinge ilou Sipisipi Ilie uxolu ne. Mo ane'i tamitema so xaixai noxou ixolu i'itinu ualasou. 4Ixolu i'itinu ualasou la ane'i imaisou iou mo no anu alaiie'i la ualasou uxolu no anu. 5La olovoxola uasi. Mo tava'u so ilexexu lalamo xe tava'u so aso uiieila uasi xo Tatananenge anu Mosinge molu uxolu so ulosi'a lamanaxu. Ixolu axone no anu tanixu kingi ulai ulai xo mole kaluxu uasisi.

Lailivuxu Iesua a unene'e

6La angelo muvikalaleli aloxo 'ola, “Vaikala ano'o uxalixu nene'axu mo anu maninasi. Tatananenge anu Mosinge ulavusou u'avutinoxu ulene'i tapolopeti so ilanu vaikalaou. Anusi a mupalusou angelou so upela'a tamitema so xaixai noxou no anu mimi ane a so uxali. 7Laso ngalomu. Iesua muvikala aloxo 'o, 'Eni a so apalea ane'e noxinge 'o.' Xe itema ane ulomuxu vaikala so pela'a no lavuku 'o la uxalisou osa'ilasi.

8La eni Tioni a elomusou mo emaisou mimi ano'o. Elomusou xe emaisou sila no tava'u angelo ane mupala'anixu noxilo la elalusi so atangatuluou mo a'itinu. 9Ia anu muvikalaleli aloxo 'o, “Ai, na'oxo axone mamu. Eni kalumo amitema so xaixai aloxo ngingi ngoli'a tavivine tamitema so pela'a xe ane'i ane ilomuxu vaikala no anu lavuku 'o. Na'itileli uasi, na'itinu Mosingesi.” 10La muvikalaleli aloxo ola, “Vaikala so pela'a ano'o mamu so na'apisou xo voxosou nene'axu uxali a mune'e alai mukalu 'oe. 11Laso ane. Ta'ei ane isususu la isususi. Xe ta'ei ane i'oxonu ilixo nuni'u la i'oxonusi. Ia ta'ei ane i'oxonu mimi ulapusi la i'oxonusi. Xe ta'ei ane Mosinge musosovosi'a lexe tanoxou mu'isalili la ikalipalane'i lexe ane'i tanoxousi ane.”

12La Iesua vaikalaou aloxo 'o, “Ngalomu, eni so apalea ane'e noxinge 'o. Ane'e la ano'u lakolisou ili'ilixo noxi'a tamitema vilevilesi so apilixinu noxi'a. 13Eni ane tei xe eni kaluxu uasi a. Tei loxo mi vile uxali uao la eni exolu ane. Xe ulai ili'i mimi ukalu la eni axolu axonesi. Eni tava'u mimi mukalusi xe mi ma'ia la asivitanoxu avilesi.

14Ioxe, ane'i ane mi'uinu lavulutii'a la i'osa'ilasi xo ane'i imomomo so i'ani no anu ovu so mauli. Mo ane'i imomomo so i'unalai no anu aitengaxu taoni, evile u'apixa'a uasi. 15Ia noxi'a ane'i ane ilixone'i loxo ta'a'a xe ane'i so ta'uluxu masua xe ane'i so ilixo nuni'u olele xe ane'i ane ive'a tamitema isoisoli xe ane'i ane i'itinu momosi'a kalavoi xe ane'i ane utotomu ikalakalavoisi, tamitema axone imomomo so i'unalai no taoni uasi manina, ixolu noalesi. 16Eni Iesua a. Eni ane epalusou angeloxeli une'e noxinge. Mune'e la pelototosi'a tatemanu pitapita la muvulunu noxinge. Eni e vuvulu'u kingi Teviti mo eni a ilusunu a. Eni taoto ane uiei tatila no maxasesela.”

17La Ulenu olie Sipsipi Ilie semau mivikala aloxo 'o, “Nane'e 'o.” Xe ta'ei loxo ilomuxu vaikala ano'o la ane'i kalumo ivikala lexe, “Nane'e 'o.” Laso ena'ei usolixu lexa la une'esi. Une'e uie no anu lexa so mauli xo anu lapesou uasi.

Pelototo pakia'u lexe tamitema ilomuxu vaikala no lavuku 'o

18Noxi'a tamitema ta'ei ilomusou vaikala so pela'a no lavuku 'o la avikala manina aloxo 'o. Loxo evile umulaxu no latanu la tu'utu'umaxu ane ulemolu no lavuku 'o, Mosinge upilixinu noxou ane. 19Xe loxo evile uxexenu vaikala sevile no anu lavuku so pela'a 'o la Mosinge u'apixu no anu mimi lailaixe e lavuku 'o ua'aloxu. U'apixu laso itema ne u'ani no anu ovu so mauli uasi mo u'unalai no anu taoni noxou Mosinge u'isalili uasi.

20La anu ane mupala'anixu mimi mukalusi 'o a uvikala aloxo 'o, “Ani, eni so apalea ane'e noxinge ane.” Uo manina misevile, Tatananenge Iesua nane'esi. 21La amasaxau lexe ngingi mukalusi ngaxamulinu iaiama noxou Tatananenge Iesua. Manina misevile. Anu anesi.

Currently Selected:

Mupala'a 22: ATA

Highlight

Copy

Compare