Ipilu 4

Ane'isi loxo ilopala la ixalisou ma'ila

1Ioxe, vavalima noxou Mosinge lexe ane'i ane ilopalasi i'unalai no anu tanixu ma'ila a ututulusio. Laso nenge tamama'u xo anu masi upala'a lexe se'i noxinge mane i'unalai la uasi, mitulu mitutulosi. 2Xo manina nenge telomusou votovoto so vaikala laixe a loxo ane'i tatei ne. Ilomusou vaikala laixe, ia usu'uline'i uasi xo ipitanu no anu lopala so ilomuxu uasi.

3Ia nenge ane telopala la ta'unalai no anu tanixu ma'ila. Xo loxo Mosinge mulemolu, “Eni la'iaxo laso evavalima no opoleli lexe ane'i i'unalai no anu tanixu ma'ila noxilo uasi.” Muvikalasou xale lia e mulalaxinu si'a tatei ane. Xo loxo anu la musivitanoxu xaixai noxou tatei mi ne muxalixu lialia. 4A loxo mulemolu so voxo ane 7 no anu vaikalaou pa'usou vile aloxo 'o, “Mosinge mukalusou xaixai noxou avile laso no anu voxo 7 la muma'ila.” 5Xe no anu pa'usou e telemolu mukalu 'o lexe, “Ane'i i'unalai no anu tanixu ma'ila noxilo uasi.” 6Laso ane. Ane'i ane milomusou votovoto so vaikala laixe tatei ne i'unalai no anu tanixu ma'ila noxou Mosinge uasi xo ilopala uasi. Ia ma'ila ne a uxoxolusi laso vote'i uxolu so tamitema mose'i i'unalai no anu vaimomo 'o. 7Mi ne telavusou xo Mosinge mupela'ingexu voxo ane so ta'unalai. A mulemolu no anu anaxu Teviti ili'i manina no anu vaikala e telemolu se mukalu 'oe. Aloxo 'o, “Ngalomusou vaikalaxeli vaimomo 'o mo nga'oxonu opongengi pakia'u uasi.”

8Xo loxo Iosua u'unalaixi'a no anu tanixu ma'ila tatei ne, la tava'u uasi so Mosinge mulemolu voxo vilela aloxo 'ola. 9Laso maixene telavu lexe tamitemaou Mosinge i'unalai no anu ma'ila iou vilesisi aloxo Voxo so Ma'ila. 10Xo loxo itema u'unalai no anu ma'ila noxou Mosinge la uma'ila no anu xaixai noxou ane. Anu iou vilesisi loxo Mosinge mukalusou xaixai noxou mo muma'ila. 11Laso laixe so oponenge u'oxoxu tanixu ma'ila so ta'unalai. Xo loxo 'o io se'i noxinge imulinu ilixone'i ane'i tatei so ilomu uasi. Xe axone la i'unalai uasi ane, ilapau ilivusi.

12Ioxe, vaikalaou Mosinge anu umamauli xe anu xavinu musuku. La anaxu e anaxu misevile uua'ulixu laviso so oto e anaxu tamei. Xe loxo uto'omenge la u'unalai avile no anu uxalixu kalipalasou tanenge xe ulenenge. Anu utilovosou xavutala mo masaxa no oponenge mukalusi, mi vile utalume uasisi. Anu loxo ukalikalipalanu xinenge vo'uvo'uxu mo u'unalai no anu xinenge temanu avile. 13Xo mi vile ane uxoxolu umomomo so utalumexu Mosinge uasi. No iou ne mimi mukalusi upalasisi, uai no tani keakeasi. Mo anu molu utilovosou ili'ilixo aneva ta'oxonu.

Iesua anu pilisiti tatila na'a nenge u'uli'uli avile

14Ioxe, pilisiti tatila na'a nenge u'uli'uli avile ne mu'unalai no anu tasou Mosinge mukalu. Anu Iesua e Mosinge Olu. Laso lopala na'a nenge talemolu la tatetelisou pakia'u. 15Xo loxo tovotovo uxalisinge la nenge taxamulinu lexe pelesingesi. Ia anu laixe xo pilisiti tatila na'a nenge ukalipalanu va'axu no anu tu'umaxu tatavulenu uasi. Anu oponu upita no anu mo uxamulinu xo tovotovo ma'ia uxalisinge ne la muxalisou tatei kalumo. Ia loxo anu la ususu no anu uasi. 16Laso ta'ume uasi, talai alai no anu sia kingi noxou Mosinge xo anene tanixu iaiama. Talai axone laso taxamulinu lexe anu tanunenge ane. Mo loxo mi ma'ia uxalisinge la uiaiama so usu'ulinengesi.

Currently Selected:

Ipilu 4: ATA

Highlight

Copy

Compare