Ipilu 3

Iesua u'uli'uli noxou Mosisi

1Ioxe tavivilo, Mosinge muxolu no tualasou la mu'avalinge so ukalipalangengi lexe ngingi tanoxou mu'isalili. Laso ngaxolu tangengi utaxunu Iesua. Anu aposeli xo anu musosovosou Mosinge noxinge. Xe anu Pilisiti Tatila xo anu usosovosinge noxou Mosinge mo so no anu lopala noxinge talemolu, la anu uvalaxu. 2Xo Mosinge mutulusou no anu xaixai anene la muxalixu nene'axu ane. Xe noxou Mosisi la anu axonesi. Xo laili noxou ane'i loxo tasou Mosinge. Laso loxo mutulusou Mosisi so usaxila'u la mu'oxonu laixesi. 3Ia loxo telavu. Loxo tamaisou tani vile uxali laixe la tavikalasou tani ne malaxo uasi, ta'itinu mosou ualasou, xo anu molu muxalixu. Laso axone kalumo noxou Iesua. Xo Mosinge mu'osasou Mosisi ia uala ane mu'itinu avile a noxou Iesuasi. 4Tatani mukalusi uxali no avolu mosousi, ia mimi mukalusi Mosinge molu muxalixu. 5Ioxe, Mosisi ne anu itema so xaixai mo loxo Mosinge mupilixinu xaixai ma'ia so u'oxonu no tasou la mumulinu laixesi. Mo kalumo anu mu'oxonu xaixai so mulemolu mimi ane so Mosinge upalasinoxu ili'i. 6Ia noxou Kalaisiti la anu Mosinge Olu mo loxo Mosinge mutulusou so u'uli laxunu tasou la anu mu'oxonu lailaixe manina. Tasou ma'ia ne? A nenge ta'ei loxo oponenge utulu pakia'u no anu mi e ananenge ulemolu lexe talopalanu. Xe mi ane ta'oxo lexe talopalanu taxomaiou la oponenge pumuxu no anusi.

Tamitemaou Mosingesi ixalisou ma'ila

7Laso loxo Ulenu Laixe mulemolu aloxo 'o, “Vaimomo 'o ngalomuxu vaikalaxeli. 8Nga'oxonu opongengi pakia'u a loxo ta'ilusungengi tatei uasi. Xo no voxo loxo mixolu no anu xale lia esi'esi la ilomuanu vaikalaxeli mo mitovotovoleli. 9Xe mixolu ne mitovotovoleli umomomo no tau ie 40 ia mimaisou mimi tatila exalixu no taine'i. 10Laso maixene opoleli la'iaxui'a laili anene mo evikala aloxo 'o, 'Ane'i ano'o ne opone'i upolo va'axu noxilo avile. Mo ane'i ilavusou vote'isilo uasi manina.' 11La'iaxo axone laso evavalima no opoleli lexe umomomo uasi manina so i'una no anu xale lia so ma'ila.”

12Laso tavivilo ngalaxa'ingenge laixe xo loxova, masi se'i no taingengi isusu no opone'i so ilopala uasi mo ixiunu tumali'aou Mosinge e umamauli. 13Tamaisou voxo vilevilesi uxaxali mo talemolu lexe vaimomo xo anu voxo na'a nengesio. Ia talavusou telexu uasi, laso utotomu ngapelototosinge mo nga'avutinixinge ngato'o. Xo loxo 'o io susu uxolu xe uxali pakia'u no opongengi la ulapungengi avile ane. 14Ia nenge ane lopala na'a nenge manina musoko'u no tava'u mo uxolu avile umomomo no anu telexu olele, la nenge tamitemaou Kalaisiti maninasou ane. 15Xe loxo telavu, vaikalaou aloxo 'o a uxolu, “Ngalomusou vaikalaxeli vaimomo 'o mo nga'oxonu opongengi pakia'u uasi. Xo tatei ta'ilusungengi mi'oxo axone la mi'avutinoxu la'ia noxilo.” 16Xo ane'i ta'ei milomusou Mosinge vaikalaou tei ia ilomuxu uasi mo mi'avutinoxu la'ia noxou ne? A tamitema e Mosisi mu'uli laxune'i milala ne Isipi to! 17Xe Mosinge la'iaxui'a ta'ei mumomomo no anu tau ie 40? A ane'i tamitema ane misusu ka vasime'a muta'olu vitanisi no xale lia esi'esi, ne? 18Xe muvavalima no oponu lexe ane'i tavu'alo i'unalai no anu xale lia so ma'ila uasi. So u'apixa'a ta'ei ne? A ane'i e milomuanu vaikalaou, ne? 19Laso ane, nenge tamaisou lexe i'unalai no anu xale lia so ma'ila uasi ne xo tava'u vilesisi ane so ilopala uasi.

Currently Selected:

Ipilu 3: ATA

Highlight

Copy

Compare