Xalesia 1
1
1Eni aposeli Polu a. Tamitema ipalusilo aloxo 'o uasi xe itema vile utulusilo no anu xaixai ano'o uasi. Eni exali a aposeli xo noxou Iesua Kalaisiti ilou Mosinge anu Maminge e mutulusou Kalaisiti no anu soli. 2Nexi noxi'a tavivinge mukalusi e taxolu 'o takalanu lapasi ano'o ulai noxinge tatemanu pitapita ne Xalesia polovinisi.
3Eni amasaxau lexe ngaxoxolu no anu iaiama ilou xoluxolu lalavulusi noxi'a Mosinge anu Maminge ilou Tatananenge Iesua Kalaisiti. 4Anu Kalaisiti mumulinu masaxa noxou Mosinge anu Maminge la molu mupilixinu mauli noxou so ukalusou tina'unenge so susu. Mo so axone la anu u'umenenge no anu xoluxolu so susu no lialia 'o. 5Laso nenge ta'itinu ualasou Mosinge ulai ulai mole kaluxu uasisi.
Se'i mixiuxiunu vaikala laixe
6Ai, eni akuluke manina noxinge. Xo no anu iaiama noxou Kalaisiti la Mosinge mu'avalinge ka ngexali tamitemaou. Ia ngingi to ne ngepalea so nga'ume'umesou mo ngalomuxu vaikala vilemo ane upolo va'axu no anu vaikala laixe. 7Xo se'i no taingengi itovonu so ixovulaulaunixinge mo ixiuxiunu vaikala laixe so Kalaisiti. Ia vaikala laixe uxiuxiu uasi, anu uxolu axonesi. 8Vaikala laixe ne, nexi tevotongengixu mala'o. Laso loxo nexi o angelo vile so tualasou Mosinge une'e uxiunu vaikala laixe ne so uvotongengixu la anu laixe so umamulo no navu avilesi. 9Aloxo telemolu noxinge mukalu, mo a alemolu 'ola, loxo itema vile ulanu vaikala ane upolo va'axu no anu vaikala laixe ngexalisou mukalu, la anu laixe so umamulo no navu avilesi.
10Xo axova, nga'oxo lexe alemolu vaikala ano'o so tamitema i'osasilo o so Mosinge u'osasilo? Eni sasaieli so axilisine'i tamitema, ne? Uasi to, xo loxo eni opoleli ututulu lexe tamitema i'osasilosi, la vote'i so axolu amitema so xaixai noxou Kalaisiti uasisi.
Polu mua'alo lexe muxali aposeli axova
11Xo tavivilo, eni avikalangengi manina lexe vaikala laixe e evotongengixu mala'o ne anu mu'avuti noxi'a tamitema uasi. 12Eni ano'u noxou itema vile uasi mo tamitema ipela'iloxu uasi. Anu Iesua Kalaisiti molu mupala'anixu vaikala laixe ne noxilo.
13Ngingi ngelomusou a'alosou xoluxolu noxilo tatei so emulinu ili'ilixo no anu lopala noxi'a Taiuta. Xe elolutu so elosi'a tatemanu pita noxou Mosinge tu'utu'umaxu mo etovonu so epaxelelene'i. 14La opoleli mututuluou mo mu'oxoxu ili'ilixo noxi'a tatiatila noxixe Taiuta so lexe amulinusi. La no anu vote'i anene eni e'uli noxi'a tamaulu Taiuta ane lasililinexe vilesisi.
15Ia loxo atie ivo'oleli uao la Mosinge musosovosilo mukalu. Mo no anu iaiama noxousi la mu'avalilo xo exolu xo xe no voxo loxo Mosinge musosovosou laso ane. 16Anu mupala'anixu Olu noxilo mo so eni alanu vaikala laixesou noxi'a tamitema noale'ale. Xe no voxo e mupala'anixu noxilo ne la etatali'i noxou itema vile so upela'iloxu uasi. 17Mo eni alai avile ne Ielusalemo so axalisi'a ane'i ane mixali ta'aposeli tei noxilo uasi. Eni elai exolu no anu xale lia ne Alevia. Exolu xo xe mukalui laso elivu ene'e ne Tamasikusi.
18Ioxe, tau ie tatalu mulai mukalui laso elai Ielusalemo so ano'u lavulavu noxou Pita. La noxou texolu umomomo no anu voxo 15. 19Ia no voxo anene amaisi'a ta'aposeli se'ila uasi. Anu Tiemisi e Tatananenge vimou anusisi a emaisou. 20La no anu vaikalaxeli e alemolu 'o avikalangengi no iou Mosinge lexe akalavoingengi uasi.
21Xe mune'e la exixaosou polovinisi tamei ne Silia xe Silisia. 22Ia tamitemaou Kalaisiti so pitapita ne Iutea ilavusou ieli to uasi. 23Ane'i milomusou a'alosilosi lexe, “Mosou e mulavusou ulosinge navunavu tatei a vaimomo 'o ulanu vaikala laixe so lopala e molu mutovonu so umamulonu.” 24Milomusou a'alosou mimi ane Mosinge muxalixu noxilo axone la mi'iti'itinu Mosinge ualasouxu.
Currently Selected:
Xalesia 1: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
