2 Kolini 13
13
Kaluxusou pelototo noxou Polu
1Ioxe, eni a so ane'e noxinge la anu alaxu tatalusou 'o. Laso ngalaxa'i laixe xo loxo Mosinge vaikalaou mulemolu lexe, “Vote'i vilesisi so talovonixu susu, a so tamitema tamei o tatalu isaxisou ka ilemolu susu noxou menexi'a.” 2Mala'o exolu noxinge no anu alaxu tameisou, la epeletotosi'a ane'i ane misusu tei oli'a leviani. Mo vaimomo 'o axolu nopaxa 'o mo vaikala anene a alemolu lumamo 'ola. Aloxo 'o. No voxo loxo ane'ela, la alovonixi'a ane'i ta'ei ixoxolu no anu susu, ieli uvaxaou vile noxi'a vitanisi uasi. 3Xo ngingi ngamasaxau ngalavu lexe Kalaisiti a uvikala no anaxo 'o o uasi. Laso loxo ane'e alovonixinge la anu upala'a lexe eni axaxai no anu xaviou Kalaisitisi. Xo vote'i so uxaxai no taingengi la pelesou uasi, anu xavinusi ane. 4Xo tatei loxo mililixu no ovu valautu so usoli la anu pelesousi. Ia vaimomo 'o anu a uxolu umauli xo no anu xavi tatila noxou Mosingesi. Xe nexi pelesixe kalumo a loxo anu tei ne ia xo taxolu noxou vaimomo 'o laso xaviou Mosinge upala'a no anu xaixai noxixe no taingengi.
5Xo ngingi menge ngatilovosinge, ngingi ngaxolu no anu lopala manina? Ngingi menge ngatongongengi laixe lexe axova. Menge ngatilovosinge lexe Iesua Kalaisiti uxolu noxinge o uasi. Xo loxo uxolu noxinge uasi la ngingi ngepungengi vitanisi ane. 6Ngatilovosinge axone, la eni alopalanu Mosinge so ngatongonu lexe nexi tepunexi noxinge uasi. 7La nexi talavusou talingau su'ulisinge noxou Mosinge so ngasusu uasi. Ia anu tava'u so ilixomengi uvalaxu xaixai noxixe no ie'i tamotu uasi. Xo loxo opone'i lexe nexi tapunexisi, la anu mi vile uasi. Mi ane oponexi ututuluou ane so ngingi nga'oxonu ilixo mulapusi. 8Xo nexi ta'oxonu mi vile so uxililiou vaikala manina uasi, xaixai na'a nexi so tavalaxusi. 9La nexi ta'osa loxo nexi taxolu pelesixesi ia ngingi ngaxolu pakia'ingesi. Xe nexi tapilixingengi noxou Mosinge utotomu so xoluxolu noxinge uxali laixe loloni. 10Laso axolu va'axu aloxo 'o mo akaukavu u'uli mo so loxo ane'e noxinge la tava'u so a'okingengi uasi. Xo Mosinge mulosilo xavi no anu xaixai noxou aloxo 'o so a'oxonu pakia'u lopala noxingesi, anu so amamulonu uasi.
Kaluxusou vaikala Polu so u'italone'i
11Ioxe tavivilo, telexu aloxo 'o. Ngingi nga'osa xe xoluxolungenge laixe loloni xe ngaxamulinu mamatola xe opongengi vilesisi mo lexa noxinge ngato'osi. La Mosinge e mosou sexela ilou xoluxolu lalavulusi a uxolu noxinge ne. 12Ngamulinu ilixomenge nenge Mosinge ta'olu so ngamaxa'u sexelasinge ngato'o. 13Ane'i tamitemaou Mosinge u'isalili lai 'o mukalusi ivikala aso noxinge.
14Eni amasaxau lexe ngingi mukalusi ngaxamulinu iaiama noxou Tatananenge Iesua Kalaisiti xe sexela noxou Mosinge. Mo amasaxau lexe Ulenu Laixe u'oxonu opongengi uxolu vilesisi. Anu anesi.
Currently Selected:
2 Kolini 13: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
