Ta'aposeli 25

Vesitusi mutongonu Polu no anu lakoti

1Ioxe, Talomu mitulusou Vesitusi so anu tila no anu xamani so Iutea polovinisi. Mitulusou xe mune'e muxali ne Sisalia la muxolu ne voxo tatalu xe mukalu la mutelai ne Ielusalemo. 2Mulutu xe muxali la tatiatila noxi'a Tapilisiti xe tatiatila noxi'a Taiuta mipita noxou so milanu vaikala ane so ito'omolu Polu no anu. 3Mo milinga pakia'u noxou lexe, “Ai, nini masi na'oxonu mi vile so nexi ta'osasinexu, navulanu Polu une'e ne Ielusalemo 'o.” Ane'i mivikala axone xo milalaxi lumamo lexe iloxu Polu no anu vote'i so ivau usoli. 4Ane'i mivikala axone ia Vesitusi mukoline'i lexe, “Polu ukalavusu ne Sisalia mukalu mo eni so alivu alai ne kalumo. 5Laso ngingi tatiatilasinge se'i noxi'a talailai mo so loxo itema ne mususu la ngingi ngalanu vaikalasou susu ne.”

6La anu Vesitusi oli'a mixolu ne voxo se'ila, loxo 8 o 10. Mukalu laso anu mulai ne Sisalia. Xe loxo ne'ielae la mukisinu lakoti mo muvikala lexe ine'enu Polu so utulu no laxunu. 7Mixalixu Polu no lakoti mukalu, laso ane'i Taiuta me'a ne Ielusalemo mitulutulu no pa'umolu. La ane'i mito'omolu no anu vaikala tu'utu'umaxusi. Mito'omolu vitanisi, mi vile o itema vile so uvalaxu vaikalai'a uasi. 8Ane'i mivikala mivikala xo xe mukalui laso Polu mukolinu vaikalai'a aloxo 'o. “Eni asusunoxu lo noxixe Taiuta uasi o tasou Mosinge o Kingi Sisa uasisi.”

9Ia Vesitusi mumasaxau so u'oxonu mi vile so Taiuta i'osasouxu, laso mutali'isou Polu lexe, “Axova? Nenge talai ne Ielusalemo so atongoneni no lakoti lai ne? Laso axone la vaikala a ilemolu 'o la atilovosou lai olele. Ne?” 10Ia Polu mu'oxo lexe, “Eni vaimomo 'o atulu no anu lakoti noxinge nenge Talomu. Nenge tamitemaou Sisa laso anu aloxo 'o la laixe. Nini nelavu lexe eni a'oxonu susu vile noxi'a Taiuta uasi. 11Xe loxo ngatongoleli lexe susu vile noxilo so ngaveloxu, la ngaveloxusi. Ia loxo vaikala ane Taiuta ito'omelo no anu 'o manina uasi, la umomomo so itema vile upilixileli no avo'a uasi. Eni amasaxau aloxo 'o. Kingi noxinge Sisa molu utongoleli no lakoti.” 12Polu muvikala axone mukalu la Vesitusi muvikala noxi'a tamitema e so isu'ulinu no anu lavulavu. Muvikala noxi'a mukalu la muvikalanu Polu lexe, “Ioxe, nevikala lexe Sisasi utongoneni laso anu uxali axone. Eni apalusine nalai noxousi.”

Vesitusi mutali'isou Polu noxou Axilipa

13Ioxe, voxo se'i mulai mukalu la Kingi Axilipa olie vimou Venaisi mine'e ne Sisalia so ivikala laixe noxou Vesitusi ne. 14La ilou mixolu ne Sisalia maxuveni sevile laso Vesitusi mua'aloxu vaikala ane tamitema mito'omolu Polu no anu noxou kingi ne. La mua'aloxu aloxo 'o, “Ai, itema vile Peliki mukalavusunu mala'omo anu a uxolusio. 15No voxo e elai ne Ielusalemo la tatiatila noxi'a tapilisiti xe tatiatila noxi'a Taiuta mito'omolu itema ne no anu vaikala se'i. Mito'omolu no anu vaikala mo milinga noxilo lexe tavauxu susu noxou. 16Ia eni ekoline'i lexe anene ilixo noxixe Talomu uasi. Nexi tavau itema vile vitanisi axone uasi. Utotomu talosou voxo so ukolinu vaikala ane ito'omolu no anu no lakoti tei. 17Evikalane'i ne Ielusalemo axone xe no voxo loxo elivu lai 'o la ane'i mimulileli mine'e 'o. Nexi texali la avovoxo uasi, no voxo loxo ne'ielasi la ekisinu lakoti mo evikalane'i ta'ami lexe i'unanu itema ne. 18La tamitema e mito'omolu no anu vaikala, ane'i mitulu so ilemolu susu noxou. Eni ekalavoi lexe ane'i ilemolu lo vile anu muxola'u ane. Ia uasi. 19Mito'omolu no anu vaikala se'i so lalotu noxi'asi. Xe kalumo anu Polu oli'a mipelesou anaxa'a so itema vile musoli mukalu, ualasou lexe Iesua. Itema ne musoli ia Polu uvikala lexe anu mumaulila. 20Eni etovonu so akamulinu tava'u tu'umaxu anene ia xavutalaxeli lamana no anu uasi. Laso etali'i noxou lexe umomomo so anu utulu no lakoti ne Ielusalemo. 21Ia Polu muvikala lexe Sisa molu utongonu no anu lakoti laso eni ekalavusunu ia akamulinu vote'i so apalusou ulai noxou Sisa.” 22Vesitusi mua'alo axone mukalu la Axilipa mu'oxo lexe, “Ai, eni amasaxau alomusou vaikalaou itema anene.” Laso Vesitusi mukolinu lexe, “Ioxe, ne'iela laso nalomusou.”

23Xe mune'e xe loxo ne'ilaie la Axilipa olie Venaisi mimulaxu lavuluti mo tokolomo lailaixe. Mukalu la mi'unalai no anu ngiou so vaivaikala. La oli'a tatiatila noxi'a ta'ami xe tatiatila so tuala mipita ne. Mipita mukalu la Vesitusi mu'ava lexe Polu une'e noxi'a. 24Polu mu'una mukalu la Vesitusi muvikala lexe, “Kingi Axilipa xe ngingi tatiatila e ngaxoxolu 'o, ngamaisou itema ano'o. Taiuta mukalusi mito'omolu itema ano'o ne Ielusalemo xe lai 'o no anu vaikala. Mo ane'i milinga pakia'u noxilo lexe itema ano'o umaulila uasi, usolisi. 25Ia eni atongonu lexe anu u'oxonu susu vile so usoli no anu uasi. Ia anu molu muvikala lexe Sisa molu utongonu no lakoti laso apalusou ulai noxou ne Lomu. 26Ia eni alavu no anu vaikalasou so akaukavunu ulai noxou tatilasinge uasi. Tu'umaxu ano'o ialuxu so alulusou noxou laso maixene ene'enu Polu no laxuneni nini Kingi Axilipa u'isalili xe ngingi latala 'o. Ene'enu so ngalomu laixe no anu vaikalaou mo so ngasu'uleli lexe akaukavunu lapasi ne axova. 27Xo loxo apalusou lakalavusu vile ulai ia alulusou tava'u lakoti noxou uasi, la axamuli lexe axone la masua.”

Currently Selected:

Ta'aposeli 25: ATA

Highlight

Compare

Copy