Ta'aposeli 24

Tatiatila noxi'a Taiuta mikotixu Polu

1Ioxe, Polu muxolu mukalavusu voxoxu ta'uve xo xe ili'i la ane'i e so itulusou no lakoti a mixali ne Sisalia. Ane'i ne, tila noxi'a tapilisiti e Ananaiasi xe tatiatila se'i noxi'a Taiuta. Xe kalumo la itema so lavulavu no anu lo noxi'a Talomu oli'a mine'e. Anu ualasou lexe Tetulusi. Ane'i mixali ne Sisalia la mipela'u tila so xamani no vaikala e so ikotixu Polu no anu. 2Ioxe, mi'avalou Polu mu'unae laso Tetulusi musoko'u so uto'omolu no anu vaikala. La muvikalanu tila so xamani e Peliki aloxo 'o, “Ai, nini ne'uli laxunexi la xoluxolu noxixe laixe manina mo tu'umaxu vile uxali no tainexi uasi. Xo mi ma'ia so uxalixu tu'umaxu no tualasixe 'o la nelovonixu lumamo. 3Nexi utotomu temalei axone la tavikala laixe manina noxine Peliki. 4Ia masi kalakalaxene laso alapuneni maxuveni uasi. Ia mi vilesisi, na'alaunasixe mo nalomusou vaikalamexi sevile 'o. 5Xo aloxo 'o. Itema 'o temaisou lexe anu itema so uxalixu tu'utu'umaxu. Loxo ulai no xale lia ne'ei Taiuta ixolu no anu la anu u'avutinoxu oto vitanisi no taine'i. Anu tila noxi'a laili ane ileme'a lexe Tanasaleti. 6Mo anu mutovonu so u'oxonu mi se'i no tasou Mosinge so uxali nuni'u no iou Mosinge laso maixene nexi tetetelisou. Nexi tamasaxau takotixu no anu lo noxixe. 7Ia tila noxi'a ta'ami e Lisiasi oli'a ta'amiou mine'e ka misousounexi mo milapu noxixe sila mi'umenu Polu no avoxe. 8La Lisiasi muvikala lexe tamitema ta'ei so ikotixu Polu la ine'e no anu lakoti noxine 'osi.#24.8 Tamitema so lavulavu se'i ixavutala lexe mosou Xaixai noxi'a Ta'aposeli molu ukaukavunu vaikala ane uxolu no anu 24:6-8 uasi, itema vilemo masi mukaukavunu. Vaikala e ilemolu ne aloxo 'o, Nexi tamasaxau takotixu no anu lo noxixe. 7 Ia tila noxi'a ta'ami e Lisiasi oli'a ta'amiou mine'e ka misousounexi mo milapu noxixe sila mi'umenu Polu no avoxe. 8 La Lisiasi muvikala lexe tamitema ta'ei so ikotixu Polu la ine'e no anu lakoti noxine 'osi. Laso nini mene natali'i noxou so nalavu manina no anu mi ane tatulusou no anu 'o.” 9Muvikala axone la Taiuta kalumo mipitanu anaxa'aou Polu mo mivalaxu vaikalaou Tetulusi e muto'omolu Polu no anu.

Polu mulanu vaikala noxou Peliki

10Taiuta mivikala mukalu la tila no anu xamani mulosi lexe Polu uvikala. La Polu muvikala aloxo 'o, “Eni elavu lexe tau ie tavu'alo nini itema so netongonu tu'utu'umaxu no xale lia ano'o. Laso eni opoleli laixe so akolinu vaikalai'a no laxuneni. 11Loxo natali'isi'a tamitema la anu masi upalasi noxine lexe eni elai ne Ielusalemo so a'itinu Mosinge ualasou mala'o se'osi, anu voxo 12 'osi. 12Mo ane'i tamitema a itulusilo no anu vaikala 'o, ane'i mixalisilo no tasou Mosinge la eni axalixu tu'umaxu vile uasi. Apelesou anaxo noxi'a tamitema uasi mo a'avutinoxu tu'umaxu no anu tatasou lavuloto o no anu tuala ne Ielusalemo uasi. 13Ane'i ito'omelo no anu vaikala aloxo 'o la ane'i ikalavoisi. Ane'i vote'i so ivalaxu vaikalai'a to uasi. 14Xe aloxo 'o. Ane'i ivikala lexe eni vile noxi'a ane'i e i'itinu Mosinge ualasou no vote'i nexi mexe texalixu. Manina lexe a'itinu no anu Vote'i alavua, ia Vote'i ne, anu molu mulosinge. Eni alavusou a'itinu Mosinge e Mosi'a ta'ilusunexi. Eni opoleli vilesisi no anu lo noxou Mosinge mo vaikalai'a tapolopeti. 15Eni lopala noxilo iou vilesisi noxi'a tamitema ano'o, lexe ili'i la ane'i ane misoisoli la imaulila, tamitema tamalemalenga xe tamitema tamasua kalumo. 16Laso utotomu opoleli ututulu pakia'u lexe a'oxonu mi vile so amaila no ie'i tamitema o no iou Mosinge uasi.”

17Polu mukolinu vaikala axone mukalu la mua'alo aloxo 'o, “Eni exolu tau ie se'i no tuatuala. Exolu xo xe mukalu la elivu ene'e no anu laili noxilo. Ene'e la ene'enu lamoli xe mimi se'i so usu'uline'i ane'i ane xoluxolu noxi'a masua. La exalixu mi se'i no tasou Mosinge so emulinu ilixo so navu. 18Elai no tasou Mosinge axone ia tei la emulinu ili'ilixo so malemalenga. No voxo e tamitema mixalisilo xe mitetelisilo la exolu no anu matamataunaxu tasou Mosinge so e'oxonu ili'ilixo anene. Mixalisilo axone la nexi noxi'a se'i uasi, eni enisisi. Mi vile tu'umaxu so e'una no anu uasi. 19Exoxolu la Taiuta se'i so Esia polovinisi mine'e sila mitetelisilo. Loxo ane'i tamosou u'isalili vaikala vile so ito'omelo no anu la ane'i me'a ine'e so ivikalanenixu. 20Ia ixolu 'o uasi laso ane'i ano'osi ipala'anixu lexe mitongonu susu ma'ia noxilo no voxo e etulu no laxune'i tatiatila noxi'a Taiuta. 21Masi mi vilesisi aloxo 'o. Mala'o e etulu no laxune'i ne la evikala lexe, 'Ane'i ane isoisoli, la imaulila. Vaikalanesi ngato'omelo no anu 'o.' Ane'i opone'i masi ialuxuou vaikalaxeli nesi.”

22Ioxe, Polu muvikala axone mukalu, la Peliki muvikala lexe lakoti utalo. Anu mutalosou axone xo anu mulamana no anu vaikalai'a tamitema ane imulinu vote'i e noxou Iesua mukalu. Mo mulamana lexe tava'u ma'ia Taiuta ito'omolu Polu ne. Laso muvikala lexe, “Tila noxi'a ta'ami e Lisiasi uxali 'oe, laso eni avikala lamana lexe mi ano'o vaikalasou ulapau axova.” 23Mukalu la muvikalanu tila noxi'a ta'ami 100 so ukalavusunu Polu. Muvikalanu lexe ukalavusunu ia u'okinu malamenge malaxo uasi. Mu'oxo lexe loxo tamenexu Polu ilosou la'ilali o isu'ulinu la mi vile uasi.

Polu mukalavusu tau ie tameila

24Xe mune'e xe voxo vile la Peliki olie semau Talusila mixali. Talusila ne ane Iuta. Ilou mixali la mu'avalou Polu so une'e noxi'a. Polu muxali noxi'a la muvikalane'i no anu vote'i so lopala noxou Iesua. 25La anu Polu muvikalasou mimi tavu'alo. Muvikalasou ilixo laixe xe so oponenge utulu no anu ilixo ulapusi xe voxo so Mosinge utongonenge. Peliki mulomusou vaikalaou Polu la mu'avutinoxu ume noxou. Sila muvikalanu Polu lexe, “Ai natalo, mumomomo ane. Nini nalai. Ili'i xe voxo laixe la eni a'avalinela.” 26Xe ili'i la anu utotomu mu'avalou Polu so ilou ivivikalala anu umasaxa lexe Polu ulosou lamoli so u'italonu ula no lakalavusu. 27Muxoxolu muxoxolu xo mo tau ie tamei mulai mukalu. Peliki ne anu mumasaxau uxilisi noxi'a Taiuta so i'osasou laso anu upilixinu Polu ula no lakalavusu uasi. Xe mune'e la itema vilela muno'u tanixu Peliki so mutulu tila no anu xamani, ualasou lexe Posiusi Vesitusi.

Currently Selected:

Ta'aposeli 24: ATA

Highlight

Compare

Copy