2 Timoti 4
4
Pelototo lexe Timoti xavinu so ulanu vaikalaou Mosinge
1No voxo ili'i loxo Kalaisiti Iesua une'e upala'a so ukingi la anu utongone'i tamitema mukalusi, ane'i ane imamauli xe ane'i ane misoisoli. Laso no ie'i Mosinge ilou Kalaisiti Iesua la eni apelototosine pakia'u aloxo 'o. 2Xavineni so navotovotosou Mosinge vaikalaou. Mamu so nakalipalanu voxo se'i lexe taimusou u'isalili xe voxo se'i lexe taimusou uasi. Naxolu nalalaxi so nalanu no anu voxovoxo mukalusi. La nalemolu vaikala ane so uto'omolu opone'i tamitema so susu noxi'a mo ane so uxiunu opone'i. Naxolu oponeni se'isisi manina noxi'a so napelototosi'a mo na'isalilinoxu Mosinge vaikalaou noxi'a. 3Xo nalomu, voxo une'e la tamitema latala ilomuanu vaikala ane pumuxu mo manina. Ane'i imasaxau vaikala ane ukikisou sangali'a xo ixamulinu sixisou no anu vaikala iouiou. Ixamulinu axone laso i'ava'avalia tamitema so ine'e ipilixinu vaikala ane i'osasou so ilomusousi. 4Laso itomunu sangali'a no anu vaikala manina ka ikisinu so ilomuxu a'alo e tamitema me'a mixalixusi. 5Ia loxo nini, la xavutalameni lamana so natilovosou mimi mukalusi. Loxo naxalisou navunavu la natavulenusi mo na'oxonu xaixaimeni e so nalanu vaikala laixe. Xaixai ane Mosinge mupilixinu noxine ne, namomoxu avilesi.
Polu mulemolu soli noxou lexe alaimanasi
6Ioxe, voxo mune'e alai mukalu so sialuxo unixi ula aloxo uaini e inixi'u so lexe noxou Mosinge. Voxo so alutu a so uxali 'oe. 7Eni eiave xavileli no anu lesisi so mauli 'o mo exali avile no anu sosovo no telexu. Xe no anu lopala na'a nenge la elaxa'inu laixe. 8La palaisi na'a xeli so itema uuini no anu lesisi a mulalaxi muai mukalu xo Mosinge mumoxo'ilo lexe eni alapu no iou. Xe Tatananenge e mosou tilovo mulapusi, la ulosilo palaisi ne no anu voxo olele. Ia enisi uasi, anu ulosi'a ane'i mukalusi ane opone'i u'oxoxu voxo so pala'axu kalumo.
Vaikala lexe Timoti upalea une'e noxou Polu
9Laso nini napalea nane'e noxilo 'o. 10Xo Temasi mu'osasou xoluxolu so lialia 'osi la muxexesilo mo mulai no taoni Tesalonaika. Xe Kelesenisi mulai ne Xalesia polovinisi. Xe Taitusi la mulai no xale lia ne Talimesia. 11Anu Lukusi noxou taxolu 'o. Laso loxo nane'e la nano'u Maki une'e kalumo xo anu itema laixe so usu'ulileli no anu xaixai. 12Noxou Tikikusi la epalusou mulai ne Epesusi.
13No voxo loxo nane'e la nano'u saketi veveni ane e'italonu no tasou Kalipusi ne Toloasi. Xe nataxusou lavulavuku mukalusi, ia lavulavuku ane mi'oxonu no anu tamisoposi sosoie'i la taneniou u'isalili so nane'enu kalumo.
14Alekisana anu itema so u'oxonu mimi no anu valasi anu muxalixu tu'umaxu iouiou noxilo. Anu Tatananenge molu ukolinu u'isalili no anu ilixo noxou. 15Laso nini kalumo nalaxa'i laixe noxou itema ne xo anu xavinu so muxililiou votovoto noxixe.
16No anu alaxu tei so etulu ekolinu vaikala no lakoti la evile so uvalaxo uasi, ane'i mukalusi mipaxelesilo. Eni amasaxau lexe Mosinge ulosi'a lakolisou ilixo ne uasi. 17Ia mi vile uasi, xo Tatananenge molu muveisa'ileli mo mu'oxo pakia'ilo. Laso maixene eni emomomo so elanu vaikala laixe loloni avile so tamitema noale'ale 'o milomusou. Xe anu mu'umeleli aloxo no anu laioni anaxu. 18La anu axonesi Tatananenge upamaulileli no anu mimi masumasua a so i'oxonu noxilo. Upamaulileli mo ulaxa'ileli laixe so u'unalaixilo axolu no anu ane so molu u'uli laxune'i tamitemaou. La nenge ta'itinu ualasou ulai ulai mole utalo uasisi. Vaikala ano'o maninasi.
19Nalemolu aso noxilo noxi'a Pilisila ilou Akuila xe noxi'a tatemanu tasou Onesivolusi. 20Elasitusi a uxoxolu ne Kolini ia Tolovimusi musiki laso e'italonu muxolu ne Miletusi. 21Xavineni so naxali tei no anu tau lelemesou. Ane'i Iuvulusi xe Putenisi xe Linusi xe Kolotia oli'a tavivinge talopala lai 'o mukalusi mikalanu aso noxine.
22Tatananenge a uxolu no anu uleneni xe iaiama noxou usu'asinge ne mukalusi. Anu anesi.
Currently Selected:
2 Timoti 4: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
