2 Timoti 3
3
Ilixone'i tamitema no anu kaluxusou voxovoxo
1Ia nalavu aloxo 'o. No anu kaluxusou voxovoxo la tu'utu'umaxu iouiou uxali. 2Xo no voxo ne la tamitema me'a imasaxai'amo xe opone'i u'oxoxu lamolisi xe i'itine'i no anu vaivaikalai'a xe itoxa'a xe ipupui. Ane'i ilomuxa'a tamami'a taneni'a uasi xe loxo tamitema isu'uline'i axova la ilemolu laixesou uasi xe imatapianu mimi ane Mosinge u'osasou. 3Mo ilavusou vote'i so isexelaxa'a leviani uasi xe vote'i uasisi so isolixu tu'umaxu loxo uxali no taine'i. La imunumunuxa'a tamenexi'a so ilu'ene'i xe masamasaxa no vasime'a upamuxane'isi. Ane'i ikasi'a no anu otosi xe imatapianu ili'ilixo aneva laixe. 4Mo aloxo 'ola. Loxo vaimomo 'o ivaitami noxou evile la masi ne'iela ixiunu tumali'aou. Ane'i ipalea ilai no anu xavutala vuluvulusimo xe ikalavoi lexe ane'i tatiatila manina. La imasaxau xalo u'ela no anu osa vitanisi, ia Mosinge, la isexelaxu to uasi. 5Tamitema ane xo ne isaxi lexe imulinu ili'ilixo ane Mosinge u'osasou, ia mi ne no anu sosousi, temanu to uasi. Xo xavi manina no anu vaikalaou Mosinge la ixiunu tumali'aou. Laso na'umenu vasimene mo naxolu va'axu noxi'a tamitema ane xo ne.
6La tamitema axone ikamulinu vote'i so i'una'una no tatani so ixalisi'a tasema ane itilovo laixe uasi ka iuauoixa'a no anu vaikala. Ane'i tasema ne ixamulinu tane'i uto'otome'axu susu la'olu noxi'a mo masamasaxa noxi'a upalupalusi'asi. 7Tasema ne opone'i ututuluou lavulavu so imolo, ia vaikalaou Mosinge temanu anu manina, la upalasi noxi'a uasisi. 8Anu tatei la Tianesi ilou Tiamivilesi mixililiou Mosisi la anu axonesi noxi'a tamitema ano'o so ixililiou vaikala temanu anu manina. Tamitema ne xavutalai'a xalusousi mo ixolu va'axu avile no anu lopala na'a nenge. 9Ia mi vile uasi, ane'i imomomo so isolonu avile uasi. Xo anu masi upalasi no ie'i latala lexe ane'i ixovulaulausi aloxo tamitema mitongone'i Tianesi ilou Tiamivilesi lexe mipune'isi.
Pelototo lexe Timoti ukamakulunu vaikalaou Mosinge
10Ia nini la nemulileli no anu vote'isou epela'axu Mosinge vaikalaou noxi'a tamitema xe no anu ili'ilixoleli xe no anu mi ane taleli u'oxoxu so a'oxonu. Mo neutitiieli no anu lopala ilou sexela noxilo xe no anu vote'i so opoleli pakia'uou xaixai mo loxo tu'umaxu uxali la atavulenusi. 11Mo nelavusou xilili xe navunavu e etavulenu no avo'a tamitema ne Anitioki xe Aikoniamu xe Lisitila. Auo, xilili etavulenu no tuatuala ne mu'oki manina, ia Tatananenge mu'umeleli no anusi. 12Xo manina, tamitema mukalusi ta'ei ane ipita noxou Kalaisiti Iesua mo imasaxau xoluxoluxa'a ulovou masaxa noxou Mosinge, la itavulenu xililisousi. 13Ia tamitema tamasua xe ane'i ane so ikalavoi kaio itulu no anu tanitanixa'a toxonesi, la isusu xo mole utila avilesi. Ane'i ikakalavoine'i leviani xe ane'i kalumo imalukusou kalakalavoi.
14Ia loxo nini, la mimi ane nexalisou lavulavu no anu mo nemulaxu pakia'u no taneni, la naxolu no anu anenesi. Xo nini nelavusou xoluxolunexe nexi ane tepela'inexu ne. 15Mo tatei mi ne molomoloxenesio la nesoko'u so nalavulavu no anu lavuku so Mosinge vaikalaou mu'isalili. Lavuku ne xavinu so mulosine lavulavu u'asi'asi ane mulosoienixu vote'i so nalopala noxou Kalaisiti Iesua ka nexalisou pamauli noxou. 16Vaikala e uxolu no anu lavukuou Mosinge loloni la mu'avuti no anu tauxu. Mo anu laixe manina no anu xaixai so tapela'a tamitema xe so tatalosi'a loxo ipolo va'axu xe so talovonixi'a xe so tapamaxune'i no anu ilixo mulapusi. 17Laso axone, la itema so xaixai noxou Mosinge la umomomo no anu xo mimi so xaixai laixe mukalusi a muai no avolu mukalu ne.
Currently Selected:
2 Timoti 3: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
