2 Tesalonaika 3
3
Poluena mivikalane'i lexe, “Ngingi ngapilixinexi noxou Mosinge”
1Mo tavivixe, mi vile aloxo 'ola. Ngingi ngalingau su'ulisixe noxou Tatananenge mo so vaikalaou upalea so ulailai no tuatuala. Laso axone la anu vaikalasou utitila a loxo muxali no taingengi ne. 2Mo kalumo la ngavikala noxou so u'oxo latolosixe noxi'a tamitema tamasua so xilili. Xo ngelavu, tavu'alo ilopala to uasi!
3Ia ilixou Tatananenge aloxo 'o. Loxo talopalanu la ulapau vitanisi uasi. Laso anu molu u'oxonu pakia'inge mo uutululungengi noxou Uluaou. 4La no oponexi nexi talavu manina lexe Tatananenge usu'ulingengi mo so no anu pelototo noxixe la ngingi a ngamulinu vaimomo 'o xe ili'i kalumo. 5No anu masaxa noxixe lexe Tatananenge upamuxanu opongengi mo so ngalavu laixe no anu sexela noxou Mosinge mo so ngatulu pumungenge so ngatavulenu tu'utu'umaxu a loxo Kalaisiti.
Mamu so Mosinge ta'olu ipaupauxe
6Ioxe tavivixe, no anu ualasou Tatananenge Iesua Kalaisiti tavikala pakia'u noxinge aloxo 'o. Loxo tavivinge se'i xoluxoluxa'a vuluvulusi mo ilomuxu vaikala ane tevulunu noxinge uasi la ngakalipalangengi sevile noxi'a. 7Xe ngelavusou ilixomexi texolu no taingengi lexe xoluxolunexe vuluvulusi uasi. La ngamulinexi axone. 8Xo texolu no taingengi la taloxu la'ilali no avonge uasi, mi ma'ia teno'u la telotonusi. Laso tetavulenu tu'umaxu mo sasaiexi so texaxai aso olovoxo. Te'oxo axone mo so navungenge so ngavu'ulinexi uasi. 9Loxo nexi tamasaxau la nexi laiti so tano'u su'uli noxinge no anu vasimexe. Ia uasi, tano'u uasi xo temasaxau taxali pikisa laixe no ienge so ngamulinu ilixo noxixe.
10Xo ngelavu, nexi texolu no taingengi la pelototo e telemolu aloxo 'o. Itema loxo upauxesi la utama no avolusi, nga'itixu ani'ani uasi. 11Ia nexi telomu lexe se'i no taingengi ixoxolu vuluvulusi, i'oxonu xaixai vile uasi. Xaixai noxi'a anesi so ixixao ilexalexa vitanisi. 12Laso nexi tapelototo mo tavikala pakia'u no anu ualasou Tatananenge Iesua Kalaisiti noxi'a tamitema anene aloxo 'o. Ngingi ngaxolu se'isisi no anu xaixai noxinge mo so nga'ani'ani no anu nene'axu avongesi.
13Mo tavivixe, mamu so kalakalangenge no anu ili'ilixo laixe. 14Xe loxo vile no taingengi ulomuanu pelototo noxixe no anu lapasi 'o la ngatongonu laixe mo ngavaitami noxou itema ne uasi mo so umailamulinu ilixou ne. 15Ngavaitami noxou uasi, ia nga'oxo noxou loxo uluamengi uasi. Anu vivinge ane, laso ngapelototosou laixe.
Polu muvikala aso noxi'a
16Tatananenge anu tava'u xoluxolu lalavulusi molu usu'ulingengi mo so mi ma'ia uxali la opongengi uai se'isisi. Tatananenge ne a uxoxolu noxinge vilevilesi ne. 17Eni Polu a akaukavunu vaikala aso noxinge no avolo 'o. Xo ano'o sosovo noxilo so uxolu no anu lapasi noxilo mukalusi. Ngamaisou kaukavu noxilo ano'o.
18Iaiama noxou Tatananenge Iesua Kalaisiti a uxoxolu noxinge mukalusi. Anu anesi.
Currently Selected:
2 Tesalonaika 3: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
