1 Timoti 1
1
1Eni Polu a. Eni aposeliou Kalaisiti Iesua. Mosinge e mosou pamauli ilou Kalaisiti Iesua ane talopalanu taxomaiou me'a mipalusilo so exali aposeli aloxo 'o. 2Eni akaukavunu lapasi ano'o ulai noxine Timoti. Nini loxo alixeli manina no anu lopala xo eni melo evotoneni. Eni amasaxau lexe nini naxamulinu iaiama mo mamatola mo xoluxolu lalavulusi noxou Mosinge anu Maminge ilou Kalaisiti Iesua anu Tatananenge.
Se'i noxi'a Mosinge ta'olu ne mipolo va'axu no anu votovoto
3Ioxe, mala'o loxo eni so alutu ne Epesusi so ane'e ne Masetonia polovinisi la epelototosine, mo a alemolu 'ola. Naxoxolu ne Epesusisio mo so napelototosi'a tamitema se'i ne mo na'apixa'a lexe mamu so imulaxu xavutala se'i iouiou no latanu votovoto. 4Mo laixe so ipilixinu ilixo so ingalo mo inana kakau olovoxo ne. Xo loxo 'o io uxalixu tu'utumaxu no taine'i tamitema. Vaivaikala axone usu'uline'i tamitema so ilopala no anu xaixai noxou Mosinge no taine'i uasi. 5Ia loxo votovoto noxinge la anu tava'u aloxo 'o. Tava'u e so u'avutinoxu sexela no opone'i tamitema. Isexela axone xo opone'i malemalenga mo tane'i uai laixe mo lopala noxi'a maninasou. 6Xo se'i la mipolo va'axu no anu votovoto ne ka mi'una mo a ipune'i no anu vaikavaikala ane nene'axu uasi ne. 7Ipune'isi xo me'a imasaxau lexe ixali tatisa so lo noxou Mosinge. Mo itulu ivikala pakia'u lexe, “Lo uvikala aloxo 'o, mo aloxo 'o.” Ilanu vaikala pakia'u axone ia ane'i me'a ilavusou laxu to uasi!
8Ia nenge talavusou laxu. Lo ne anu mi laixe. Ia mi ane mutiatila, a so ta'isalilinoxu ulovo no anu tava'u e so Mosinge mulosinge. 9Tava'u ne aloxo 'o. Nenge talavu lexe Mosinge muxalixu lo so si'a tamitema tamalemalenga uasi. Anu muxalixu so si'a tamitema so ilixo masumasua mo xililisi. Tamitema anene imama'u noxou Mosinge uasi, opone'i utulu no anu sususi. Lo noxou Mosinge ne si'a tamitema ane ilixo mo vaikalai'a nunu'iusi mo ane'i ane ive'a tamami'a taneni'a xe tamitema isoisoli. 10Xe noxi'a tamitema so ilailai noxi'a tasema vitanisi mo tamulu ane ilai noxi'a tamulu. Xe noxi'a ane'i ane ipakaline'i tamitema xe tamitema so kalakalavoi xe ane'i ane i'oxo loloxa'a tamenexi'a. Anu axone, lo ne anu si'a tamitema ane ilixo noxi'a upolo va'axu no anu vaikalaou Mosinge. 11La ta'itinu Mosinge ualasou xo vaikalaou ne laixe mo iaxu. Anu molu mulosilo vaikala laixe ne so alanu.
Polu muvikala laixe xo Mosinge tanuxu misevile
12Eni alemolu laixe noxou Kalaisiti Iesua anu Tatananenge. Anu mutilovosilo lexe xaixai ma'ia upilixinu noxilo la eni opoleli ututuluousi. Laso anu molu mu'oxo pakia'ilo mo mumulaxo no anu xaixai noxou. 13Xo manina, eni tatei la etovonu so amasuanu pita noxou mo exililiou vaikalaou mo epupuiou. E'oxo axone ia eni alavu uasi, alopala noxou uao. Laso anu tanuxo misevile mo ukolinu ilixo noxilo ne avile uasi. 14Tatananenge ukolinu ilixo noxilo ne uasi mo iaiama noxou noxilo mulolutu e mulolutu. Xo Kalaisiti Iesua ne anusisi tava'u lopala mo sexela la anu mu'avutinoxu no opoleli. 15Eni alemolu vaikala vile manina mo laixe so tamitema mukalusi ilomuxu. Aloxo 'o. Kalaisiti Iesua mulu'e no lialia 'o so upamauline'i tamitema so susu. Xe no taine'i tamitema so susu ne la eni loxo a'uli'uli avile. 16Mo anene tava'u so Iesua Kalaisiti mupala'anixu iaiama noxou noxilo. Anu ukolinu susu noxilo avile uasi, muxomaieli muxomaieli xo xe elopalae, laso anu oponu so sexela ne mupala'a. Exali loxo pikisa so ulapune'i tamitema mo so ane'i kalumo ilopala noxou mo ixalisou mauli kaluxu uasi. 17Laso ta'itinu ualasou Mosinge xo anu vilesisi ane. Anu kingi na'a nenge mo uxolu no tanixu ne avile. Anu kaluxu uasi. Nenge tamitema tasaxisou no ienge uasi, ia taxolu ta'itinu ualasou no anu mauli noxinge ulai ulai utalo uasi. Vaikala ano'o maninasi.
Polu mupelototosou Timoti lexe usoa pakia'u no anu lopala
18Ioxe, alixeli Timoti, eni apelototosine u'isalili no anu vaikala so pela'a milemolu tatei so ma'ia uxali no anu xoluxolu noxine. Natulu pakia'ine no anu oto so ulenenge mo nasoa so naua'ulixu mi ma'ia uxililiou lopala noxine. 19Natetelisou lopala noxine ne mo taneni uai laixe xo nalavu lexe susu noxine muiasi mukalu. Xo se'i milopala aloxone ia mune'e la mixiunu tumali'aoula. La no anu lopala noxi'a ne la mimamulo aloxo lasipi umamulo no lipi. 20Xo Imeniusi ilou Alekisana mi'oxo axone. Laso eni epilixine'i ilou noxou Uluaou so upamuxane'i no anu masaxa noxou. Mo so loxo itavulenu navunavu no anu xoluxoluxa'a la masi ino'u lavulavu lexe i'oxonu masua no anu ualasou Mosinge mamu.
Currently Selected:
1 Timoti 1: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
