2 Pita 3

Anu manina lexe Tatananenge ulivu une'ela

1Laso tavivilo ane asexelangenge, ano'o lapasixeli tameisou akaukavunu ulai noxinge so u'avutinixinge mo ulivunoxu xavutalamengi so uxolu ulapusi. 2Eni emasaxau lexe tangengiou vaikala e tapolopetiou Mosinge milemolu tatei so lexe mi ma'ia uxali. Xe so ngaxavutalanu votovoto malemalenga noxou Tatananenge anu Itema so Pamauli e ngelomusou noxi'a ta'aposeli ane mine'e noxinge.

3Ia mi vile mutiatila so ngalamana no anu aloxo 'o. No anu kaluxusou voxovoxo tamitema so imolo suku ixali mo imulinu masaxa masua no opone'isi. Ane'i imolo suku aloxo 'o. 4I'oxo lexe, “Anu muvavalima lexe ulivu une'e, ne? Ioxe, laso muxali mo a uxolu ne'ei? Xo lasililixa'a tamaminge misoisoli mukalusi ia mi vile uxiu to uasi. Mimi uxolu iou vilesisi loxo mukoi tatei mo mune'e avile axone vaimomo 'osi.” 5Ivikala axone xo ane'i me'a ixavutala no anu mi vile aloxo 'o uasi. Tei manina la Mosinge muvikalasi ka loxotolo mupa xe no anu vaikalaou la lialia mukalipala no anu lexa mo muxali no anu lexa nesi. 6Xe no anu vote'i anenesi la lialia mumamulo tatei xo lexa munononusi. 7Mo no anu vaikalaousi la utetelisou loxotolo ilou lialia vaimomo 'o xo a mulalaxinusou navusi. Mulalaxinu mimi axone so uxomaiou voxo so utilovosi'a tamitema tamasua ka umamulone'i.

8Tavivilo ane asexalangenge, tangengivulusiou mi vile aloxo 'o uasi. Noxou Tatananenge la voxo soxu vilesisi ne anu loxo tau ie tauseni vile. Xe tau ie tauseni vile la anu loxo voxo soxu vilesisi. 9Tava'u ma'ia so Tatananenge uxalixu nene'axu vavalima noxou ne uao? Xo anu uvovoxo vitanisi aloxo tamitema se'i ilemolu 'o? Uasi to, anu uxomaiengi se'isisi xo masaxa noxou lexe vile noxinge umamulo uasi. Oponu lexe ngingi mukalusi ngaxiunu opongengi so susu noxinge mo nga'isalilinoxu noxou.

Mosinge muvavalima lexe uxalixu loxotoxo ilou lialia alavua

10Ia voxo noxou Tatananenge uxali alaxu vilesisi aloxo itema so pakali uxali ukulukene'i tamitema. La voxo ne luluxu toxoxu ka loxotolo umamulosi xe aso mo so'io mo tataoto xe lialia ilou mimi no anu u'ela mole kavukunoxusi. 11Ioxe, laso loxo mimi mukalusi ukavuku no anu vote'i axone la ngaxavutala lexe ngingi vaimomomo 'o xoluxolungenge axova? Ngingi masi ngaxolu no anu malemalengasi mo opongengi ututuluou ili'ilixou Mosingesi. 12Laso ngaxolu axone so ngautitiou voxosou Mosinge mo opongengi u'oxoxu so lexe upaleasi. Laso ane, no voxo ne loxotolo u'elasi xe mimi mukalusi no anu ialuxu mole usiali loxo lexasi ka tasiauxusi. 13Ia vavalima noxou Mosinge lexe anu uxalixu loxotolo alavua ilou lialia alavua mo so anu tanixu xoluxolu mulapusi. Laso mi anenesi a taxolu taxomaiou 'o.

Talopala ilaxa'i laixe so ixomaiou Tatananenge

14Tavivilo ane asexelangenge, ngingi a ngaxomaiou voxo ne laso ngaxolu tangengi malemalenga mo tu'umaxu vile no taingengi uasi. Mo so axone loxo Tatananenge uxali la umaisou susu vile noxinge uasi. 15Xe ngamalei, Tatananenge uxolu se'isisi uxomaii'a tamitema, xo oponu ututuluou pamaulisi'a. Mi ne mulosou lavulavusou noxou Polu kalumo xo vivinge e tasexelaxu manina ne mukaukavunu mulai noxinge ne. 16Mimi ne ulemolu no anu lapalapasiou mukalusi ia vaikala mose'i ne mu'asi'asi misevile mo tano'u laxu palea uasi. Laso maixene tamitema ane ino'u votovotosou laixe uasi mo tane'i mamalaxusi la ino'u vitanisi mole ixiunu laxu. Ane'i i'oxonu axone no anu Mosinge vaikalaou mukalusila, la no vote'i anene ixalixu mamulosi'asi.

17Ioxe tavivilo ane asexelangenge, ngingi a ngalavusou mimi ne lumamo, laso ngalaxa'ingengi laixe. Xo loxo 'o io kalavoi noxi'a tamitema so xilili ulapungengi mole ngatulu pumungenge no anu lopala noxinge la ua'. 18Ngingi ngexalisou iaiama noxou Iesua Kalaisiti anu Tatananenge xe mosou pamaulisinge mo ngingi a ngelavusou, ia amasaxau lexe iaiama mo lavulavu ne uleme noxingesi. Nenge ta'itinu ualasou vaimomo 'o xe voxo ili'i ulai ulai kaluxu uasi. Vaikala ano'o maninasi. Anu anesi.

Currently Selected:

2 Pita 3: ATA

Highlight

Copy

Compare