1 Timoti 4
4
Vaikala kalakalavoi uxovulaulaunixi'a tamitema mose'i
1Ioxe, Ulenu Laixe muvikala lamana lexe no anu voxovoxo unene'e la se'i ixiunu tumali'aou vaikala manina e talopalanu. Xo ane'i ilomuxu mo imulinu vaikala so kalavoi noxi'a ta'angelo tamasua. 2Vaikalai'a ta'angelo tamasua ne upolo uxali no anu anaxa'a tamitema so kalakalavoi. Ane'i ne tane'i papatuou susu noxi'a lexe uto'ome'a uasi a loxo velamolu no vasimenge uxamulinu navunavula uasi. 3Xo tamitema ane xo ne ivikala lexe tatavunenge no anu taula'i mo no anu la'ilali iouiou. Ia la'ilali anene Mosinge mukoinu mo so nenge ta'ei talavusou mo talopalanu vaikala manina la tavikala laixe noxou ka ta'ousi. 4Xo mimi mukalusi Mosinge mukoinu ne anu la'ilali laixe to. Tatavunu vile no anu uasi, tano'usi mo tavikala laixesou. 5Laso loxo ta'ou la nenge tavikala laixe noxou tei. Xo no anu vaikalaou muvikala lexe mimi mukalusi ne laixe no iousi.
Polu mupelototosou Timoti lexe u'oxonu xaixai noxou Kalaisiti laixe
6Laso naxolu napela'a tavivinge ne so mimi elemolu 'o. Xo axone la nini namitema so xaixai laixe noxou Kalaisiti Iesua ane. La naxolu na'ani'ani no anu vaikala so lopala na'a nenge mo taneniou lavulavu pumuxu ane a namulinu ne so nano'u xavi no anu. 7Naxiunu tumalineou sitoli vitavitanisi a loxo tatiatila milavusou mi'oxonu. Mo na'oxo aloxo 'o. Na'isalilinoxu xoluxoluxene no anu masaxa noxou Mosingesi. 8Xo loxo ta'ekisasaisi so vasimenge uno'u xavi la anu usu'ulinenge sevile. Ia loxo ta'isalilinoxu xoluxolunenge no anu masaxa noxou Mosinge la nenge tano'u su'ulisou tatila. Su'uli anene so xoluxolu vaimomo 'o xe no anu ane ili'i kalumo. 9Vaikala ano'o ne manina mo laixe so tamitema latala ilomuxu. 10Mosinge anu a umamauli xe anu mosou pamauli noxi'a tamitema latala. Ia tamitema ane upamauline'i ne, ane'i ane ilopalanusi. Mo loxo nenge, la tetulusou lopala noxinge noxousi. Tetulusou lopala noxinge noxou laso maixene xavinenge mo sasaiengeou xaixai noxou.
11Ioxe vaikala ano'o napilixinu noxi'a Mosinge ta'olu mo napelototosi'a lexe imulinu. 12Manina, nini namaulusi ia mamu so tamitema itaxaneni uasi no anu mi anene. Nini naxali loxo pikisa noxi'a talopala no anu vote'i aloxo 'o. Vaikalameni ilou muamua'ixene ulapusi. Xe sexela ilou lopala noxine pakia'usi. Xe xoluxolu noxine malemalengasi. 13No anu pita noxinge ne la nga'itisou vaikala no anu lavukuou Mosinge mo ngavotovoto mo ngapelototo. Eni ane'e noxinge ia ngatalo no anu mimi anene uasi, nga'oxonu xo mo axali noxinge. 14Xe loxo nini Timoti, Ulenu molu mulosine lavulavu so xaixai noxine ne laso kalakalaxene uasi. Mulosine mala'o loxo milemolu vaikala so pela'a so xoluxolu noxine mo tamitema so saxila'u mimulaxu avo'a no kisine. 15Kalakalaxene uasi, oponeni utuluou mo nasoa no anu xaixai noxine mo so tamitema latala imaisou lexe uiave laixe. 16Nini nalaxa'i laixe no anu muamua'ixene mo votovoto noxine. Xo loxo natalo uasi la naxalisou nene'axu laixe no anu xoluxolu noxine xe noxi'a ane'i ane ilomuxu vaikalameni.
Currently Selected:
1 Timoti 4: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
