1 Timoti 3
3
Pelototo so xoluxoluxa'a tamitema so saxila'u
1Ioxe, vaikala alemolu 'o anu maninasi. Loxo itema vile oponu ututulu so uxali itema vile so uvu'ulinu pita la xaixai umasaxau ne lailaixe. 2Laso itema so uvu'ulinu ne la xoluxoluxu aloxo 'o. Anu ilixo noxou lamanasi mo so mi vile so tamitema ito'omolu no anu uasi. Loxo utaula'i la semau vilesisi. Anu uxolu mo xavutalaou uiave laixe mo uxolaxola uasi, xoluxoluxu ulapu no ie'i tamitemasi. Xe loxo tamitema ine'e no tasou la usaxila'a laixe. Mo lavulavuou no anu vote'i so ulanu Mosinge vaikalaou noxi'a tamitema. 3Mo aloxo 'o kalumo. Anu itema so usipaki uasi. Xe anu itema so la'iaxu palea uasi, uxolu oponu lexa noxi'a tamenexu mo uxalixu tu'utu'umaxu uasi. Xe anu itema so oponu ututulu no anu lamoli uasi. 4Xe anu itema so usaxila'u pamili noxou laixe. Usaxila'u la upamuxane'i ta'olu so ilai no anu masamasaxa noxi'asi uasi, imulinu pelototo noxousi. 5Xo loxo itema usaxila'u pamili noxou laixe uasi la usaxila'u pita noxou Mosinge axovae? 6Loxo itema ane alavuaxu no anu lopala la utulu itema so saxila'u palea uasi. Xo masi u'itinu no anu la Mosinge ukusaou no anu xaixai noxou aloxo mukusaou Uluaou. 7Xe aloxo 'o. Itema so saxila'u ne anu itema so ualasou laixe noxi'a tamitema noale no anu pita kalumo. Xo loxo mi se'i no anu xoluxoluxu so tamitema isu'anu anaxa'aou la anu u'amo no anu uoi noxou Uluaou ane.
Pelototo so xoluxoluxa'a tamitema so su'uli
8Mo axone kalumo noxi'a tamitema so su'uli. Xo itema so su'uli ne anu uxolaxola uasi, anu oponu utulu no anu xaixai noxousi. Anu itema so uxiuxiunu vaikalaou uasi. Xe anu itema so usipaki uasi mo uisuisuxu lamoli uasi. 9Xe anu ukasou pakia'u vaikala mu'asi'asi so lopala na'a nenge mo tanu uai laixe lexe utetelisou susu vile no oponu uasi. 10Ia tamitema so su'uli ne ngatulusi'a kolokolo uasi. Ngaxolu ngatilotilovosi'a xo xe ngamaisou xoluxoluxa'a lamanasi laso ane, i'una no anu xaixai anene. 11Xe tasemai'a kalumo, ixolaxola uasi. Xe ixixao mo imunumunu uasi, ixolu xavutalai'a uiave laixesi mo so xaixai ma'ia so i'oxonu la opone'i ututuluousi. 12Itema so su'uli ne utaula'ixe sema vilesisi mo usaxila'u pamili noxou laixe. 13Loxo tamitema so su'uli i'oxonu xaixai noxi'a laixe la tamitema ivikalasi'a laixe. Mo axone la ane'i imama'u uasi so ipala'anixu lopala noxi'a noxou Kalaisiti Iesua.
Pita noxou Tatananenge anu tava'u vaikala manina
14Ioxe, eni axolu akaukavunu mimi ano'o ulai noxine, ia alopala lexe maxuveni uasi la eni melo alai noxine. 15Ia talavu uasi, masi mi vile utanuxo so axali palea noxine uasi. Laso maixene ekaukavu 'o so nalavu lexe xoluxoluxa'a Mosinge ta'olu laixe axova. Xo tamitemaou Mosinge ne ane'i tasou ane. Mo pita noxou Mosinge ane umauli ne anu utulu pakia'usi xo anu loxo posi so utavulenu vaikala manina. 16Mo nenge mukalusi talavu lexe vaikala manina noxou ne anu mi mutiatila. Vaikala ne aloxo 'o. Kalaisiti mupala'a no anu vasimolu loxo itema no ie'i latala. Ulenu Laixe mupala'anixu ilixo noxou lexe malemalengasi. Ta'angelo misaxisou xoluxolu noxou. Tamitemaou mia'aloxu no xale tuatuala. Tatemanu lialia mose'i milopala noxou. Mosinge muno'u mutelaixu no tualasou iaxu.
Currently Selected:
1 Timoti 3: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
