1 Kolini 2

Polu mulanu vaikala so soli noxou Iesuasi

1Ioxe tavivilo, mala'o loxo ene'e noxinge la elanu Mosinge vaikalaou. Elanu la avikala tila o alexa vitanisi loxo takeleva uasi. 2Mo elalaxi lumamo lexe loxo axolu no taingengi la opoleli mo anaxo ulai no anu mi vilela uasi. Ulai noxou Iesua Kalaisiti mo soli noxou no ovu valautu u'isalilisi. 3Xe nenge'a texolu la pelesilosi xe e'ume mo e'olo'olo to. 4Xe evotovoto la atovonu so axiunu opongengi no anu vaikalaxeli lailaixe o no anu lavulavu noxilosi uasi. Evotovotosi, sila Ulenu Laixe molu mupalasinoxu vaikala ne noxinge no anu xavi noxousi. 5Mo so axone la lopala noxinge tava'u no anu lavulavu noxi'a tamitema uasi. Tava'u no anu xavi noxou Mosingesi.

Ulenu Laixe upelototosinge so tano'u lavulavu u'asi'asi noxou

6Manina, ia loxo taxolu no taine'i tamitema ane pakia'a no anu lopala la nexi talanu vaikala so lavulavu. Xo lavulavu anene mi so lialia 'o uasi. Mo anu loxo lavulavu noxi'a tatiatila so lialia uasi, xo ane'i ne tamitema e so imamulo. 7Xo lavulavu noxou Mosinge u'asi'asi ne, a mutalume tatei. Loxo tautau ie usoko uao la anu mulalaxinu vote'i so xoluxolunenge iaxusi lumamo. Mulalaxinu lumamo ia muxolu mutalumesi. 8Laso maixene lavulavu mu'asi'asi ne tatiatila so lialia 'o ilavusou uasi. Xo loxo ilavusou la ane'i ivau Tatananenge so Iaxu no anu ovu valautu uasi. 9Ane'i imomomo so ilavusou uasi. Ia loxo Mosinge vaikalaou ulemolu lexe, “Tamitema ane isexelaxu Mosinge la anu mulalaxinu i'a mimi lailaixe. Mimi anene tamitema imaisou no ie'i o ilomusou no sangali'a o ixavutalanu no opone'i uasi.” 10Mimi anene mutalume ia Mosinge mupala'anixu noxinge noxou Ulenu Laixe. Xo Ulenu Laixe utongonu mimi mukalusi. Mimi e mu'asi'asi noxou Mosinge kalumo la Ulenu utongonu ane.

11Xo aloxo 'o. Itema vile umomomo so ulavusou tamenexu opone'i uasi, ia itema ne anu molu ulenu ulavusou oponu u'isalilisi. Xe axone kalumo la evile umomomo so ulavusou oponu Mosinge uasi, Mosinge anu Ulenusi ulavusou. 12Xe loxo noxinge nenge'a la taxalisou xavuxavutala so lialia 'o uasi. Mosinge molu mupilixinu Ulenu so talavusou mimi ane mulosinge no anu iaiama noxou. 13Mulosinge mimi anene xe loxo nexi tapela'ingexu la talemolu no anu lavulavu noxinge tamitema uasi. Ulenu Laixe molu upalasinoxu no anu xavutalamexi laso loxo talemolu la u'isalili no anu vaikalaousi. 14Ia tamitema ane Ulenu Mosinge uxolu noxi'a uasi la ane'i ixililiou mimi lailaixe noxou ne xo ilavusou uasi. Ane'i i'oxo lexe mi xovulaulausi ane. Ia nenge tamitema ane Ulenu uxolu noxinge la ta'osasou mimi lailaixe noxou xo anu usu'ulinenge so tatongonu laixe. 15Xe itema ane Ulenu uxolu noxou la utongonu mimi mukalusi. Ia noxou itema ne, la tamitema imomomo so itongonu uasi. 16Xo no anu Mosinge vaikalaou la mulemolu aloxo 'o, “Ena'ei mulavusou xavutalaou Tatananenge mo so u'oxo lexe, 'Eni apelototosou Tatananenge'? E uasi.” Ia nenge, la oponu Kalaisiti a uxolu noxinge.

Currently Selected:

1 Kolini 2: ATA

Highlight

Compare

Copy