1 Kolini 1

1Eni Polu a. Eni aposeliou Iesua Kalaisiti a xo Mosinge mu'avalilo no anu masaxa noxou. Nexi noxou vivinge Sosotenisi taxolu 'o mo oponexi vilesisi no anu lapasi 'o. 2Lapasi ano'o so ulai noxinge no anu pita noxou Mosinge no tuala ne Kolini. Ngingi ane mu'avalinge mo mupitangengi noxou Kalaisiti Iesua. Mupitangengi laso mukalipalangengi lexe ngingi tanoxou mu'isalili. Ngingi ngoli'a tatemanu tuatuala aneva ilavusou i'itinu ualasou Tatananenge Iesua Kalaisiti. Anu Tatanane'i xe Tatananenge. 3Eni amasaxau lexe ngingi ngaxamulinu iaiama noxou Mosinge anu Maminge ilou Tatananenge Iesua Kalaisiti mo so ngaxolu opongengi uai se'isisi.

Polu muvikala laixe noxou Mosinge

4Eni alavusou axavutalangengi mo avikala laixe noxou Mosinge utotomu. Avikala laixe so iaiama mulosinge no anu vote'i e noxou Kalaisiti Iesua. 5Xo ngaxolu noxou laso ngepalava no anu mimi noxou mukalusi. Xo anu Kalaisiti musu'ulingengi no anu lavulavusou mo no anu vaivaikalasou mukalusi. 6Mi ne ngalavu lexe maninasou, xo nexi tea'alomengixu xe opongengi mukasou, laso maixene nene'axu muxali no anu xoluxolu noxinge ne. 7Ngingi ngasoti no anu mi vile laixe so Ulenu ulosinge uasi. Laso vaimomo 'o ngingi ngaxolu opongengi u'olo'olou voxo so Tatananenge Iesua Kalaisiti upala'a. 8Anu molu utetelisinge pakia'u umomomo no anu kaluxusou voxosinge. Xo no anu voxo so lailivu noxou la itema vile umomomo so uto'omenge uasi. Ngingi ngaxolu tamalemalenga noxou ane. 9Xo talavu lexe Mosinge uxiunu oponu uasi. Mo mi ne noxoumo, xo anu molu mu'avalinge so ta'una no anu xoluxolu noxou Olu Iesua Kalaisiti anu Tatananenge.

Tu'umaxu muxali no taine'i Mosinge ta'olu ne Kolini

10Tavivilo, eni atama pakia'u noxinge no anu ualasou Tatananenge Iesua Kalaisiti lexe ngingi mukalusi ngaxolu opongengi vilesisi. Ngingi ngakalipalangengi no taingengi ngato'o uasi. Ngaxolu xavutalamengi vilesisi mo ngatilovo vilesisi. 11Xo tavivilo no anu laili noxie Koloe mia'aloxeli lexe ngingi mose'i ngakusukusuinge ngato'o. 12Vaikala so kusukusu ne aloxo 'o. Se'i noxinge ivikala lexe, “Eni amitemaou Polu.” Xe se'i lexe, “Eni amitemaou Apolosi.” Xe se'i lexe, “Eni amitemaou Pita.” Xe se'i lexe, “Eni amitemaou Kalaisiti.” 13Xo axova? Kalaisiti mukalikalipala? Xe eni Polu esoli no ovu valautu so apamaulingengi? Xe mi'oxonu ilixo so kelele noxinge la no anu ualasilo eni Polu? Uasi to! 14No taingengi ne eni e'oxonu ilixo so kelele noxi'a Kilisipusi ilou Xaiusisi, se'ila uasi. No anu anene la a'osasou Mosinge. 15A'osasou xo itema vile umomomo so uvikala lexe eni e'oxonu ilixo so kelele no anu ualasilo Polu uasi manina. 16E uasi, exavutalanu. Eni ekelenixa'a se'ila kalumo, ane'i laili noxou Sitevanasi. Masi ekelenixa'a se'ila o uasi, talelivulusi. 17Kalaisiti upalusilo so a'oxonu ilixo so kelele uasi, mupalusilo no anu xaixai so alanu vaikalasou laixesi. Mo loxo alanu la axilisi mo avilasinu vaikalaxeli uasi, xo loxo 'o io soli noxou Kalaisiti no ovu valautu uxali loxo mi vitanisi.

Vote'i so xavi noxou Mosinge mupala'a a noxou Iesua

18Avikala aloxo 'o. Tamitema so imamulo loxo ilomusou vaikalasou soli noxou Iesua no ovu valautu, la i'oxo lexe anene vaikala xovulaulausi. Ia nenge tamitema ane Mosinge a upamaulinenge la talopalanu lexe manina ane. Talopala axone laso maixene vaikala anene vote'isou xavi noxou so upamaulinenge. 19Xo no anu Mosinge vaikalaou muvikala aloxo 'o, “Lavulavui'a tamitema so lavulavu la axalixu lexe mi vitanisi. Xe xavutalai'a tamitema takeleva la a'italonu lexe mi vuluvulusi.” 20Laso nenge tavikala axova so lavulavu toxoxa'a noxi'a takeleva? Xe axova noxi'a tamitema so lavulavu no anu lo xe noxi'a tamitema so i'itine'i no anu vaivaikala vaimomo 'o? Xo Mosinge mumaxa'u lexe lavulavu so lialia ano'o ne mi vuluvulusi.

21Ioxe, Mosinge mumaxa'u lavulavu noxou aloxo 'o. Ane'i tamitema so lavulavu no anu lialia 'o me'a imomomo so ilavusou Mosinge uasi. Ia vaikala e mi'oxo lexe muxovulaulau ne, Mosinge musosovosou lexe anu anesi vote'i so pamauli. Xo aloxo 'o. Nexi talanu vaikalaou laixe xe loxo tamitema ilopalanu, la Mosinge upamauline'i ane. 22Xo manina. Taiuta imasaxau imaisou sosovo so xavisi xe Takiliki opone'i ututuluou lavulavu lailaixe so imolo. 23Ia nexi talanu vaikala so Kalaisiti musoli no ovu valautusi. Vaikala anene mi so Taiuta loxo itulaki no anu xe Takiliki i'oxo lexe vaikala xovulaulau ane. 24Ia nenge tamitema Taiuta xe Takiliki ane telomuxu ava noxou Mosinge la talavu. Talavu lexe xaviou mo lavulavu noxou Mosinge a noxou Kalaisitisi. 25Xo mi se'i Mosinge u'oxonu ia tamitema ilavu uasi, i'oxo lexe mi ne uxovulaulau mo papaxesi. I'oxo axone ia no anu mi ne la lavulavuou mo xavinu uua'ulixu ane noxi'a tamitema avile.

26Xo tavivilo, ngingi menge ngaxavutala lexe ngingi tamitema kaini axova ngelomuxu ava noxou Mosinge ne. Xo tavu'alo noxinge ne takeleva no anu mimi so vasimenge uasi. Xe tavu'alo noxinge tatiatila o tamitema so uala tatila uasi. 27Xo Mosinge musosovosi'a ane'i ane tamitema i'oxo lexe tamolesi. Mo so axone la umaxa'u lexe lavulavu noxi'a takeleva ne mi vitanisi ane. Xe musosovosi'a tamitema loxo mamalaxa'a so umaxa'u lexe xavi noxi'a tatiatila olele ne mi vitanisi. 28Xe musosovosi'a ane'i ane tamitema i'oxo lexe tami vitanisi o tamosomososi. Usosovosi'a ane'i ino'u uala uasi axone so umaxa'u lexe ualauala tatila ne anu mi vitanisi kalumo.

29Laso ane. Umomomo so itema vile u'itinu no iou Mosinge uasi manina. 30Xo Mosinge molu mumulangenge noxou Kalaisiti Iesua. Mo anu anusisi vote'isinge so texalisou lavulavusou Mosinge ane u'asi'asi. Mo noxou Kalaisitisi Mosinge muxalinenge tamalemalenga mo ukalipalanenge lexe nenge tanoxou mu'isalili. Xo no anu xaixai noxou Kalaisitisi la anu mulotonenge mo mu'umenenge no anu mi e mukalavusunenge tei. 31Laso maixene no anu vaikalaou Mosinge uvikala lexe, “Uala vilesisi so tamitema i'itinu. Uala ane noxou Mosingesi.”

Currently Selected:

1 Kolini 1: ATA

Highlight

Compare

Copy