1 Kolini 16

Polu muvikalasou lamoli ane so ikalanu ulai ne Ielusalemo

1Ioxe, eni amasaxau avikalangengixu lamoli ane so ngapitanu so ulai noxi'a tamitemaou Mosinge ne Ielusalemo. Eni epamuxane'i tatemanu pitapita ne Xalesia polovinisi no anu mi anene. Laso ngingi kalumo ngamulinu axone. 2Aloxo 'o. No anu voxo tei utotomu la ngingi vilevilesi ngaxexenu lamoli sevile no anu ane ngaxalisou. Loxo ngaxalisou tatila la ngaxexenu tatila, xe loxo kitua se la ngaxexenu sevilesi. Ngaxexenu la ngamulaxu va'axu mo so loxo eni ane'e la nga'au'au no anula uasi, xo ngepitanu mukalu. 3Mo ngasosovosi'a se'i noxinge so loxo eni axali noxinge la apalusi'a isaxanu lapasi se'i xe su'uli noxinge ne so ulai noxi'a Taielusalemo. 4Ia loxo axamulinu lexe anu laixe so eni kalumo, la noxi'a takei talai.

Polu muvikalane'i lamana so muamua'i noxou

5Ioxe, eni loxo ane'e noxinge la apolo ne Masetonia polovinisi xo eni alai ne tei. 6Apolo xo xe axali noxinge la masi nenge'a taxolu maxuveni sevile. Alavu uasi, masi nenge taxolu sivo lelemesou taunu avile. Taxolu xo xe alutu so alai no tuala ne'ei la ngapilixileli laixe. 7Eni amasaxau so axolu voxo tata'eisi uasi. Loxo no anu masaxa noxou Tatananenge la nenge'a taxolu maxuveni sevile. 8Ia ane'e noxinge uao xo axolu ne Epesusi xo xe voxo so Penikosi ukalui laso alutu alai noxinge. 9Axolu se 'o xo Mosinge mu'oxonu vote'i so a'oxonu xaixai tatila no taine'i Ta'epesusi. Ia tamitema so xilili tavu'alo to!

10Ia aloxo 'o. Loxo Timoti ulai uxali noxinge la ngavalaxu laixe mo so oponu uai se'isisi no anu xaixai noxou. Xo anu u'oxonu xaixai noxou Tatananenge a loxo eni 'osi. 11Mamu so se'i ipixeti noxou, ngataxanu vaikalaou. Ngoli'a ngaxolu laixe xo xe so ulutui la ngapilixinu laixe so opongengi laixe noxinge ngato'o. Eni axolu axomaiou xo mo oli'a tavivinge ixali. 12Xe noxou vivinge Apolosi la avikalanu alaxu tavu'alo lexe laixe so oli'a tavivinge ilai noxinge. Ia anu umasaxau vaimomo 'o uasi. Mu'oxo lexe ili'i loxo uxamulinu voxo laixe, laso ane, ulai noxinge.

Vaikalaou Polu kaluxusou

13Ngingi ngalaxa'i laixe. Ngatulu pumungenge no anu lopala noxinge. Xoluxolungenge loxo tamitema ane tane'i mukalu, nga'ume uasi. 14Xe mi ma'ia nga'oxonu la nga'oxonu no anu sexelasi.

15Tavivilo eni apelototo pakia'u noxinge aloxo 'o. Ngingi ngalavusi'a laili noxou Sitevanasi lexe ane'i tei noxinge no anu lopala ne Akaia polovinisi. Mo ngalavu lexe ane'i opone'i ututulu so isu'uline'i tamitemaou Mosinge u'isalili. 16Ngalavusou ilixo noxi'a axone laso ngalu'engengi no laxa'a. Xe tamitema ta'ei so xaixai noxou Tatananenge axone la ngalomuxa'asi. 17Ane'i Sitevanasi xe Votunatasi xe Akaikusi mine'e noxilo la e'osasi'a manina. Ngingi mukalusi vote'i so ngane'e uasi ia ane'i loxo misosovosinge. 18Ane'i tamitema so i'oxonu oponenge nenge'a u'osasi. Laso ngalomuxa'a tamitema kaini aloxo ne.

19Ane'i tatemanu pitapita ne Esia polovinisi mivikala aso noxinge. Xe Akuila olie Pilisila mo Mosinge ta'olu mukalusi ane ipita no tasi'a mivikala aso laixe noxinge no anu ualasou Tatananenge. 20Tavivinge lai 'o mukalusi ivikala aso noxinge. Laso ngamaxa'u sexela noxinge ngato'o no anu vote'isinge Mosinge ta'olu.

21Eni Polu a akaukavunu pa'usou se 'o mo avikala aso noxinge. 22Loxo itema aneva umatapianu Tatananenge la itema ne umamulosi. Ia nenge ane tasexelaxu la oponenge utatama lexe, “Tatananexi, nane'ela.” 23Iaiama noxou Tatananenge Iesua a uxoxolu noxinge. 24Eni asexelangengi mo apilixingengi noxou Kalaisiti Iesuasi. Vaikala ano'o maninasi. Anu anesi.

Currently Selected:

1 Kolini 16: ATA

Highlight

Compare

Copy