1 Kolini 15
15
Iesua musoli ka mutulu mumaulila
1Ioxe tavivilo, alivunoxu xavutalamengi no anu vaikala laixe e evotongengixu mala'o. Evotongengixu xe ngelomuxu la ngatulu pakia'u no anu anenesio. 2Elanu vaikala laixe ne xe loxo opongengi mukasou lexe manina, la anenesi vote'isinge so pamauli noxou Mosinge. O axova, ngelopala vitanisi?
3Ioxe, vaikala mutiatila manina ne mose'i mia'aloxeli tei mukalu laso eni epilixinu noxinge. Vaikala ne aloxo 'o. Kalasiti musoli so mukalusou tina'unenge so susu aloxo Mosinge vaikalaou ulemolu. 4Musoli xe mimulaxu vasimolu no lulu xe voxo tatalu mupoloe la Mosinge mutulusou mupamaulinula. Mi ne muxali loxo Mosinge vaikalaou ulemolu kalumo. 5Xe ili'i la anu mupala'a noxou Pita xe mukalu la mupala'a noxi'a ta'aposeliou. 6Xe ili'ila la mupala'a noxi'a tavivinge talopala ane navasi'a teitexi no anu 500. Tavivinge se'i ne misoisoli ia ane'i tavu'alo noxi'a a ixoxolusio. 7Xe mune'ela la anu mupala'a noxou Tiemisi xe mukalu la mupala'a noxi'a ta'aposeliou mukalusi.
8Ioxe, mune'e mune'e xo xe ili'i la eni kaluxusi'a so mupala'a noxilo. Eni eili'i manina axone la aloxo kekea ane lavulo'o noxou ialuxu manina. 9La ane'i ta'aposeli latala iua'ulixo mo eni amitema alaixe so atavulenu uala aposeli aloxo 'o uasi. Xo tei la elosi'a tatemanu pita noxou Mosinge tu'utu'umaxu. 10Ia vaimomo 'o xoluxoluxo aloxo 'o xo no anu iaiama noxou Mosingesi. Muiaiama noxilo la ulapau vitanisi uasi. Muxalixu nene'axu xo no anu xaixai noxilo la aua'ulixa'a ta'aposeli mukalusi. Ia eni melo uasi, iaiama noxou Mosinge a uxoxolu noxilo so ulosilo xavi no anu xaixai anene. 11Ia mi vile uasi, xo loxo eni o ane'i, la tavotovotosou mi vilesisi. Mi vilesisi e elemolu se mukalu 'o lexe Iesua musoli ka mumaulila. Tevotovoto axone laso ngelopala lexe maninasi.
Ili'i la tamitema ta'ei misoisoli la imualila
12Ioxe, nexi tevotovoto axone lexe Kalaisiti musoli ka Mosinge mutulusou mupamaulinula. Laso axova? Tevotovoto axone ia ngingi se'i ngavikala lexe tamitema loxo isoisoli la imaulila uasi. 13Xo loxo manina lexe tamitema imaulila uasi la anu Kalaisiti kalumo umauli uasi, uai avile no anu solisi. 14Mo loxo Kalaisiti umauli axone uasi, la votovoto noxixe ne temanu uasi. Mo axone la ngingi ngelopala noxou Kalaisiti vitanisi, nene'axu uasi. 15Xe aloxo 'ola. Nexi ta'aposeli tevikala lamana lexe Mosinge mutulusou mupamaulinu Kalaisiti ka nexi temaisou no iexi. Ia loxo vaikalamengi lexe tamitema ane misoisoli imaulila uasi ne manina, la nexi tekalavoisi ane. Nexi tamitema so takalavoisou Mosinge xo axone la anu upamaulinu Kalaisiti uasi ane. 16Manina, loxo Mosinge umomomo so upamauline'i tamitema ane misoisoli uasi la anu umomomo so upamaulinu Kalaisiti uasi kalumo. 17Mo loxo upamaulinu Kalaisiti uasi la lopala noxinge ne lapipia vitanisi mo susu ukasingesio. 18Mo loxo tamitema ane milopala noxou Kalaisiti xe misoli la ane'i imamulo avile ane. 19Loxo nenge talopala noxou Kalaisiti so taxalisou xoluxolu laixe no anu lialia 'osi la anu mi vitanisi. Xo axone xe tasoli la taxalisou nene'axu laixe uasisi. Loxo lopala noxinge so lialia axonesi la laixe so tamitema tane'inenge xo tapunenge avile ane.
20Ia uasi, axone uasi. Xo Kalaisiti mutulu mo mumaulila ne, mo ili'i la nenge axone kalumo. Laso anu aili'isinge xo anu tei manina noxinge no anu ane so tasoli xe tamaulila. 21Xo tava'u so tasoli, la noxou itema vile. Mo tava'u so tamaulila, la noxou itema vile kalumo. 22Nenge mukalusi tasoisoli xo tava'inge e Atamu. Mo axone kalumo la nenge ta'ei taxolu noxou Kalaisiti la tamauli ane. 23Nenge noxou Kalaisiti tamaulila axone ia no anu vote'isou u'isalili. Aloxo 'o. Kalaisiti mu'uli noxinge xo mutulu mukalu. Xe ili'i no voxo loxo anu une'e la nenge tamulinu axone so tatulu kalumo. 24Xe mukalui la anene telexusi. Xo Kalaisiti ukalusou xavi noxi'a tatiatila xe ane'i ane i'uli'uli xe tami ane xavine'i musuku. Ukalusou xavi noxi'a ukalu la anu upilixinu mimi mukalusi noxou Mosinge anu Maminge so molu u'uli laxunu avile. 25Xo Kalaisiti uxoxolu u'uli'uli xo mo umaloxo'a mo umamulone'i tauluaou avile. 26Umamulone'i tauluaou axone la ukalusou soli kalumo xo nenge tasolila uasi. 27La no anu ane Mosinge vaikalaou ulemolu lexe “Anu umulaxu mimi mukalusi so Kalaisiti umaloxo'u.” la talavu aloxo 'o. Mimi mukalusi uxolu no laxu Kalaisiti axone ia Mosingesi uasi. 28Ioxe, Mosinge umulaxu mimi mukalusi no laxu Kalaisiti so umaloxo'u ukalui laso anu Kalaisiti ulu'enu so uxolu no laxu Mosinge. Mo so axone la anu mimi mukalusi uxolu noxou Mosingesi so anu u'uli laxunu.
29Ioxe, vaikala ane lexe tamaulila ne mose'i no taingengi masi milavu no opone'i lexe manina. Xo loxo opone'i pakia'u lexe tamitema ane misoisoli imomomo so imaulila uasi, laso axova so ino'u tanixa'a no anu ilixo so kelele? 30Mo nexi kalumo. Loxo ili'i tamaulila uasi, laso axova so nexi tatetelisou xaixai ano'o e utotomu tamitema imolo mamulosixexu 'o? 31Tavivilo, xoluxolungenge ne noxou Kalaisiti Iesua anu Tatananenge anu nene'axu xaixai noxilo. Mi ne a'osasou mo alemolu lamana mo so ngingi ngalomuxu pelototo noxilo 'o. Eni la loxo soli so xaixai noxilo 'o a utotomu uxolu no ielisi. 32Mo loxo ne Epesusi la tamitema mikasilo e mikasilo manina, la eni loxo itema ane u'oto noxi'a tamisoposi tamosou la'ia. La axova, tava'u xoluxoluxo axo'o xo no anu masaxa noxilomo? Eni axalisou nene'axu laixe no anu xoluxolu so vasimelo 'o? E uasi. Laso loxo tamitema imauli no anu soli uasi la eni apilixinu xaixai ialuxu 'oe. Apilixinu mo so nenge'a ta'ani mo taie xo ili'i la tasoli tasiaunenge avile.
33Laso ngakalavoingengi uasi. Loxo ngavaitami noxi'a tamitema so xavutala masua la ane'i i'unanu tane'i noxinge la uvila'isou xavutala laixe noxinge ne. 34Ngapilixinu xavutala so xovulaulau axone mo ngamulinu vote'i laixesi. Mamu so ngapilixingengi no anu susu. Xo se'i noxinge ilavusou Mosinge uao. Mi ano'o alemolu so ngapamailamulinu mo so ngano'u lavulavu.
Loxo tasoli xe tamaulila la vasimenge uxiu uxali alavua
35Ioxe, masi se'i itali'i lexe, “Uo, tamitema isoisoli la itulu axovao? Mo loxo itulu la vasime'a kaini axovao?” 36Ai, ngingi ta'ei ngavikala axone la ngaxovulaulau ane. Latilovo so tasoli mo tamauli aloxo 'o. Loxo ngalavu, mi ane tatounu la anu umulaxu xolanu vitanisi uasi. Anu usoli mo u'uio. Ukalu laso anu lemexu uxali. 37O loxo tatapu'u uiti o mi ngiaxu axone, la tatounu ai'ainu ilou volovoloxu uasi. Tano'u ngiangiaxu vitanisi so tatapu'u. 38Tatapu'u ia loxo aiainu xe volovoxu xe temanu la anu uxali mo umulinu iou u'isalili no anu masaxa noxou Mosingesi.
39Ioxe, tatemanu lialia mukalusi vasivasime'a umulinu ie'iie'i u'isalili. Xo nenge tamitema la vasimenge iou vile xe tamisoposi la vasime'a iou vile xe tangiala vasime'a iou vile xe tasinana kalumo vasime'a iou vile. 40Xe mimi no loxotolo la anu iou vile xe mimi so lialia la anu iou vile. Xo loxo tasixisou anene no loxotolo la anu lailaixe mo mimi so lialia anu laixe kalumo, ia iou vilemo. 41Xo aso xe so'io xe tataoto la usaxi laixe ia ie'iie'i vilevilesi. Xe noxi'a tataoto la ane'i isaxi iou vilemo noxi'a vilevilesi.
42Laso axone kalumo noxinge tamitema so tamauli no anu soli. Xo loxo tasoli la anu vasimenge so i'asixu ne anu so u'ui ane. Ia loxo tatulu tamaulila la no anu vasimenge anene so u'ui uasi. 43Vasimenge i'asixu ne anu masua to, ia so tatulu no anu, la anu iaxusi. Anene i'asixu, la anu pelesousi ia so tatulu no anu la xavinusi. 44Anene i'asixu la mi so lialiasi ia so tatulu no anu la anu so tualasou Mosingesi. Xo vasimenge so lialiamo xe vasimenge ane so tualasou Mosingemo.
45Xo no anu Mosinge vaikalaou la muvikala aloxo 'o, “Mosinge mulosou itema tei e Atamu tauxu so mauli no vasimolu.” Xe mune'e la itema tameisou e Kalaisiti la mulosinge mauli so ulenenge. 46Ia mauli so ulenenge uxali tei uasi. Anene so vasimenge muxolu tei kaio texalisou mauli so ulenenge. 47Itema ane tei ne anu so lialia xo Mosinge muxalixu no anu lialiasi. Ia anu itema tameisou anu molu no tualasou Mosingesi. 48Laso tamitema mukalusi so lialia 'o ane'i ie'i vilesisi noxou itema so lialia. Xe ane'i ane so tualasou Mosinge la ie'i vilesisi noxou itema so tualasou Mosinge. 49Vaimomo 'o taxolu no lialiasio laso maixene vasimenge iou vilesisi aloxo itema so lialia e Atamu ne. Ia ili'i loxo taxolu no tualasou Mosinge la vasimenge iou vilesisi aloxo itema so tualasou Mosinge e Kalaisiti.
50Ioxe tavivilo, eni avikala lamana aloxo 'o. No voxo so Mosinge molu u'uli laxune'i tamitemaou la ane'i ane so vasime'a sialu, imomomo so ixolu uasi manina. Mo mi ane so u'ui la umomomo uasi so u'unalai no anu xoluxolu kaluxu uasi. 51Ngalomu, eni apla'anixu mi vile mutalume aloxo 'o. Ili'i la se'i noxinge isoli uasi. Se'i isoli uasi ia nenge mukalusi vasimenge uxiu. 52Mi ne uxali alaxu vilesisi, ienge u'amosi. No voxo anene la piuka kaluxusou utama la tamitema misoisoli ne itulu imauli no anu vasime'a ane so uxolu avile. Ane'i loxo misoisoli xe ane'i loxo ixoxolusio, nenge mukalusi vasimenge uxiu axone. 53Xo vasimenge kaini so usoli mo u'ui 'o anu uxiu alavua uxali kaini so usoli uasi, uxolu avilesi. 54Vasimenge so u'ui mo usoli 'o loxo uxiu mo uxali kaini ane so uxolu laixe avile ukalui, laso ane. Nene'axu vaikalaou Mosinge uxali xo uvikala lexe “Tatananenge muua'ulixu soli mo mukalusou avile.” 55Mo loxo ulemolu, “Soli nini naua'ulinexe axovae? Nini a loxo tanga xo nelosixe navunavu toxoxu. Ia mi ane so nekapinexi no anu munavae? Ta'umenela uae.” 56Tava'u so soli ulosinge navunavu toxoxu ne xo no anu sususi. Mo talavusou susu lexe xavinu xo tava'u no anu losi. 57Ia talemolu laixe noxou Mosinge xo nenge taxolu noxou Tatananenge Iesua Kalaisiti laso no anu vote'i anene nenge taua'ulixu soli ane.
58Laso tavivilo ane asexelangenge ne. Ngaxolu pumungengesi, ngavaxa ngane'e no anu lopala noxinge uasi. Mo loxo nga'oxonu xaixai noxou Tatananenge la xavingengiousi. Xo ngalavu lexe ngaxolu noxou Tatananenge laso xaixai noxinge ne ulapau vitanisi uasi.
Currently Selected:
1 Kolini 15: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
