1 Kolini 12
12
Ulenu Laixe u'itimenge lavulavu so xaixai iouiou
1Ioxe tavivilo, avikalangengi no anu lavulavu so xaixai iouiou Ulenu Laixe u'itimenge xo amasaxau lexe ngaxovulaulau uasi. 2Ngingi ngalavusou xoluxolu noxinge mi ne ngexolu no isivoxosio. Ngingi ngelopala no anu momosinge kalavoi ia anu temanu uasi, umomomo so ukolingengi uasi. Ia mi ne mupamupamuxangengisi. 3Xoluxolu noxinge tei axone ia vaimomo 'o avikala lamana noxinge aloxo 'o. Loxo Mosinge anu Ulenu uxolu noxou itema vile la anu umomomo so ulemolu vaikala so mamulo sou Iesua uasisi. Xe itema ane Ulenu Laixe uxoxolu noxou axonesi umomomo so uvikala lexe, “Iesua anu Tatanaleli.”
4Ioxe, noxinge Mosinge ta'olu la nenge taxalisou lavulavu so xaixai iouiou. Ia vote'i so taxalisou ne vilesisi a noxou Ulenu Laixe, xo anu molu u'itimenge. 5La nenge tamomomo so ta'oxonu xaixai iouiou ia nenge ta'oxonu xaixai ne so lexe noxou Tatananenge vilesisi. 6Xe no anu xaixai ne la votevote'isou iouiou ia anu Mosinge vilesisi so ulosinge mukalusi xavi no anu. 7Mo Ulenu Laixe upela'inge vilevilesi no anu xaixai vilevilesi. Ia tava'u so u'oxo axone so nenge nenge'a tasu'ulinenge ngato'o. 8Xo aloxo 'o. Se'i so ilanu vaikala so lavulavu ane u'asi'asi xe se'i so ipala'anixu laxu vaikala ne. Ia lavulavu ne molu noxou Ulenu Laixesi. 9Xe se'i so lopala pakia'u manina xe se'i so ipamauline'i tapipiena. Ia mi ne molu noxou Ulenu Laixe kalumo. 10Xe se'i so i'oxonu sosovo so xavi xe se'i so ipela'axu Mosinge vaikalaou xe se'i so itongone'i ta'ulenu lexe talaixe o tamasua xe se'i so ivikala no anu vaikala iouiou xe se'i so ixiunu vaikala ne mo ipalasinoxu laxu. 11Xaixai iouiou ne molu noxou vilesisi e Ulenu Laixesi. Anu uvelunu lavulavu so xaixai anene noxinge vilevilesi no anu masaxa noxousi.
Nenge Mosinge ta'olu pa'upa'usou no anu vasimolu Kalaisiti
12Ioxe, mo aloxo 'o. Nenge vasimenge anu loloni ia no anu la pa'upa'usou tavu'alo. Pa'upa'usou tavu'alo ia uxolu upita la anu vasimolu vilesisi. La noxou Kalaisiti axone kalumo. 13Xo Ulenu Laixe e vilesisi ne, mukeleninenge mupitanenge vilesisi so texali vasimolu Kalaisiti. Loxo nenge Taiuta xe Takiliki xe tamitema so xaixai vitanisi xe nenge ane taxolu lalavulusi, nenge mukalusi ne tepita no anu vasimolu. Mo nenge mukalusi loxo teie no anu Ulenu vilesisi ne xo anu a uxolu noxinge mukalusi.
14Xo loxo ngelavu. Vasimenge anu pa'usou vilesisi loloni uasi, anu pa'upa'usou piena to. 15Mo asolonu latilovo ne aloxo 'o. Loxo itema tava'u uvikala lexe, “Ai, eni itema 'o avolu uasi, laso eni vasimolu pa'usou vile uasi,” anu kalavoisi ane, anu uxolu pa'usou no anu vasimolusi. 16O loxo sangalou u'oxo lexe, “Eni iou itema 'o uasi, laso eni vasimolu pa'usou uasi,” anu kalavoi kalumo xo anu pa'usou no anu vasimolu itema ne. 17Mo aloxo 'o. Loxo itema vasimolu ne iou ukalusi, la anu ulomu axovae? O loxo vasimolu ne sangalousi la anu utuma'u mi axovae? 18Ia uasi, vasimenge axone uasi. Mosinge mu'isalilinoxu vasimenge pa'upa'usou no anu tanitanixu mulovosi, mo no anu masaxa noxousi. 19Xo loxo itema vasimolu pa'usou vilesisi la anene loxo vasimolu maninasou uasi. 20La uasi, pa'upa'usou tavu'alo upita so uxalixu vasivasimenge vilesisi.
21Ioxe, aloxo 'ola. Loxo itema iou uvikalanu avolu lexe, “Eni ano'u su'uli vile noxine uasi,” Uvikala axone la anu manina? O loxo kisou uvikalanu tava'u lexe, “Eni ano'u su'uli vile noxine uasi,” Anene manina? 22E uasi. Loxo manina la vasimenge pa'upa'usou ane ta'oxo lexe pelepelesousi ne nenge tano'u su'uli no anu tatila. 23Xe vasimenge pa'upa'usou se'i tataxanu uasi mo se'i ne tamailamulinu. Ia pa'upa'usou ne tavu'ulinu mo tavilasinu so tatanuxu laixe. 24Ia no anu vasimenge pa'upa'usou anene tamailamulinu uasi la tavu'ulinu uasi, uxolu to xo nesi. Mosinge molu muxalixu vasimenge mo so pa'upa'usou ane tataxanu malaxo uasi la tavu'ulinu laixe. 25Mu'oxo axone mo so vasimenge pa'upa'usou ukalipala lexe se'i ixolu laixe xe se'i masua uasi. Ane'i ixolu ino'u su'uli iou vilesisi noxi'a ngato'o. 26Mo loxo vasimenge pa'usou uxamulinu navunavu la vasimenge loloni uxamulinu navunavu ne. Xe loxo tavu'ulinu pa'usou no anu la vasimenge loloni uxamuli lexe umauli laixe.
27Laso axone kalumo, la ngingi vasimolu Kalaisiti xo ngingi pa'upa'usou no anu. 28Xo Mosinge molu musosovosi'a tatemanu pita noxou so i'oxonu xaixai no anu vilevilesi aloxo 'o. Tei la ane'i ta'aposeli xe ili'i la tamitema so pela'a xe ili'i la tamitema so ilanu vaikala laixe. Mukalu la musosovosi'a se'i so i'oxonu sosovo so xavi xe se'i so ipamauline'i tapipiena xe se'i so su'uli xe se'i so saxila'u xe se'i so ivikala no anu vaikala iouiou. 29Xo axova? Nenge mukalusi ta'aposeli o nenge mukalusi tamitema so pela'a o nenge mukalusi tamitema so talanu vaikala laixe o nenge mukalusi ta'oxonu sosovo so xavi? 30Mo kalumo, nenge mukalusi tamitema so tapamauline'i tapipiena o nenge mukalusi tavikala no anu vaikala iou iou o nenge mukalusi tamitema so tapala'anixu laxu vaikala ne? Uasi to! 31Laso avikalangengi lexe mamu so opongengi utuluou xaixai ane nene'axu malaxo uasi. Laixe so opongengi utatamasou lavulavu no anu xaixai ane mutiatilasi so Mosinge ulosinge.
Ia eni apala'anixu vote'i vile ane u'uli'uli avile.
Currently Selected:
1 Kolini 12: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
