1 Kolini 11
11
Pelototo so isu'asou kisi'a
1Ioxe, ngingi ngamulinu ilixoleli a loxo eni amulinu ilixou Kalaisiti. 2La eni a'osasinge manina xo ngatetelisou vaikalaxeli mo mi ma'ia epilixinu noxinge la ngalavusou ngamulaxu no anu xavutalamengi. 3Ia mi vilela so ngalamana no anu aloxo 'o. Tamulu la ane'i kisi'a tasemai'a xe Kalaisiti la kisi'a tamulu xe Mosinge la kisou Kalaisiti. 4Laso loxo itema usu'asou kisou ka uvikala noxou Mosinge o upala'anixu Mosinge vaikalaou la anu ulu'enu ualasou kisou e Kalaisiti. 5Ia loxo sema vile ivikala noxou Mosinge o ilemolu vaikala so pela'a mo isu'asou kisie uasi la ane ilu'enu ualasou kisie e mulue. Ane loxo iou vilesisi noxi'a tasema e isalanu kisi'a laxusou. 6Laso loxo sema isu'asou kisie to uasi la iluinu kisie avile. Ia axone la imailamulinu. Laso ane, laixe loxo isu'asou kisiesi. 7Isu'asou xo tasema ne so ivalaxu ualasi'a tamului'a. Xe tamulu la isu'asou kisi'a uasi xo ane'i so isosovosou Mosinge mo so ivalaxu ualasou.
8Mo aloxo 'o. Mosinge uxalixu itema no anu vasimele sema uasi. Anu muxalixie no anu itema vasimolusi. 9Xo sema ixolu tei kaio itema uxali so usu'uline uasi. Itema muxolu tei laso Mosinge muxalixie sema so isu'ulinu. 10Laso anu laixe so sema isu'asou kisie. Xo axone la ta'angelo isaxisie lexe ilu'ene mo so mulue u'uli laxune. 11Anene manina ia no anu xoluxolunenge noxou Tatananenge la loxo tasemamo xe tamulumo uasi. Ane'i ixolu so ivalaxa'a ngato'o. 12Xo tei la Mosinge muxalixie sema no vasimolu itema. Xe mune'e la tamulu mukalusi ixali no anu vasime'a tasemasi xo no anu lavulo'o. Ia anu Mosinge molu tava'u mauli mukalusi.
13Laso ngingi menge ngatilovo. Loxo sema ivikala noxou Mosinge mo isu'asou kisie uasi la anu mi laixe? 14Nenge talavu. Loxo tamulu laxusi'a veveni avile la anu laixe uasi. 15Ia loxo sema laxusie veveni axone la anu laixe xo anu tokolomoie ane. Xo Mosinge mulosie laxusie axone so usu'asou kisie. 16Ia loxo se'i ixiliou pelototo ano'o la ilavu laixe lexe anenesi ilixo noxinge. Xe no anu pitapita noxou Mosinge mukalusi la ilixo noxi'a axone kalumo.
Pelototo so sosovosou Tatananenge vasimolu
17Ioxe, mo apelototosinge no anu mi vilela. Ia no anu ano'o la eni vaikala vile so lexe a'osasingexu uasi manina. Xo no voxo loxo ngapita la nene'axu laixe uasi, masua to! 18Vaikala ane tei so mi ne aloxo 'o. Sivo muxali noxilo lexe no voxo so ngapita no anu pita noxinge la ngaxolu ngakalikalitotongengi mo ngakusukusuinge ngato'o. Elomusou sivo ne la axamulinu lexe masi temanu sevile. 19Ngakalipala se axone la no anu vote'i anene masi upala'a lamana lexe Mosinge u'osasi'a ta'ei no taingengi. 20Xo loxo ngapita la nga'oxo lexe nga'oxonu la'ilali so ngasosovosou Tatananenge vasimolu. Ia anene manina uasi. 21Xo ngingi nga'oxonu la'ilali ne vuluvulusi. Ngingi se'i ngakaolinu ngenge la'ilali ia se'i ixolu isolixa'asi. Xe ngingi se'i la ngaiexu uaini mo ngasipaki avilesi. 22Xo axova? Ngingi tatasinge so nga'ou la'ilalingenge mo ngaie lexangenge no anu uasi? Xo loxo 'o io ngingi ngataxanu pita noxou Mosinge uasi. Mo ngingi ngapamailane'i ane'i ane xa'a la'ilali uasi. Ai, eni avikalangengi so ilixongengi ne axova? Nge'oxo lexe opoleli u'osasingexu? Uasi to, mi vile no anene so alemolu vaikala so osa uasi.
Vote'i so tasosovosou Tatananenge vasimolu
23Ioxe, vaikala ane eno'u noxou Tatananenge a elemolu noxinge mukalu. Aloxo 'o. No olovoxo e Iutasi mupilixinu Tatananenge Iesua no avo'a ta'uluaou la tei oli'a tatisaipeli mixolu mi'ani. Mixolu mi'ani la anu muno'u pileti vile. 24Muno'u mukalu la anu muvikala laixe noxou Mosinge. Xe muse'inu, la muvikala lexe, “Ano'o vasimelo. Anu so uxalisou mamulo singe. Ngingi nga'oxo ilixo aloxo 'o so xavutalamengi uno'ilo.” 25Xe mi'ani mukalu la anu muno'u kapu so uaini kalumo mo muvikala lexe, “Kapu so uaini ano'o ne sialuxo. Anu so uxalixu konitalaki alavua. Loxo ngaxolu ngaie no anu kapu aloxo 'o la nga'oxonu ilixo aloxo 'o so xavutalamengi uno'ilo.” 26Laso ane. Loxo ngaxolu nga'ou pileti mo ngaie no anu kapu so uaini axone, la anu loxo ngalanu vaikala lamana so soli noxou Tatananenge. La ngaxolu nga'oxo axone xo mo umomomo no anu lailivu noxou.
Loxo tasosovosou Tatananenge vasimolu ia tataxanu uasi, la lakolisou tu'umaxu
27Mi ne mutiatila laso loxo itema vile u'oxonu ilixo so u'ou pileti xe uie no anu kapu ne so usosovosou Tatananenge. Ia loxo u'oxonu vuluvulusi mo utaxanu uasi la anu ususunoxu vasimolu ilou sialuxu Tatananenge ane. 28Laso laixe loxo tatilovosou oponenge tei kaio ta'ou pileti mo taie no anu kapu. 29Xo loxo itema u'ou mo uiexu ia oponu umama'u laixe no anu vasimolu Tatananenge uasi, la lakolisou tu'umaxu. 30Laso maixene mose'i no taingengi pelesi'a mo ipipiena mo se'i misoisoli mukalu. 31Ia loxo tatilovosinge mo tamama'u laixe la lakolisou tu'umaxu uxalisinge uasi. 32Ia loxo tasusu xe Tatananenge ulosinge tu'umaxu so ulovonixinge axone, la anu laixe xo nenge tamamulo avile loxo tatemanu lialia mukalusi uasi.
33Laso tavivilo, loxo ngapita so nga'ani la ngingi se'i nga'uli no anu ani uasi. Ngavisimenge ngato'o so nga'ani ukeisi. 34Loxo itema vile usolixu manina la laixe loxo u'ani tei no tasou. Xo loxo 'o io ngapitapita mo anu uxalixu lakolisou tu'umaxu no taingengi.
Mimi se'i a uxolusio, ia loxo ili'i ane'e noxinge laso alovonixu.
Currently Selected:
1 Kolini 11: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
