गलाती 6

सक्कुहुनके भलाई करना

1हे मोरिक विश्वासी भैयो, कौनो विश्वासी भैया पाप कर्ले बा कहिके यदि तुहुरे पता पैबो कलेसे जेने पवित्र आत्मक अगुवाई अनुसार चल्थो। तुहुरे उहिहे सही डगरमे फिर्ता नानक लग नम्रतासे सहायता करदेऊ। और तुहुरे हौश्यार रहहो, ताकि तुहुरे फेन वहे परीक्षामे ना परजाऊ। 2जब तुहुरे समस्यामे परबो, तब तुहुरे एकदोसर जहनहे सहयोग करहो। अस्तेहेँके तुहुरे ख्रीष्टके नियम कानुनहे पालन करहो।

3यदि केऊ मै एकथो बरवार मनैया हुइतुँ कहिके सोँचत कलेसे जात्तिकमे ऊ ओसिन नै हो, ऊ अपनहे अप्निहीँ धोखा देहता। 4सक्कु जाने अपन व्यवहारहे अप्निहीँ जाँचे परत। यदि ऊ मजा काम कर्ले बा कलेसे ऊ अपन काममे गर्व करे सेकत। पर ऊ अपन कामहे कौनो दोसुर मनैयक कामसे तुलना करे नै परत। 5काकरेकी हम्रे सक्कु जाने अपन व्यवहारके जिम्मेदार अप्निहीँ बती।

6जोन मनै परमेश्वरके वचन सिख्थाँ ओइने अपन थेन रहल धन-सम्पति और खाना जसिन चिजसे परमेश्वरके वचनहे सिखुइया मनैनके सहायता करे परत। 7यदि हम्रे परमेश्वरहे मूर्ख बनाई सेकदारब कहिके सोँच्थी कलेसे हम्रे अपनहे अप्निहीँ धोखा देहती। काकरेकी मनै ज्या चिज बुइथाँ, वहे चिज कत्थाँ। 8यदि कौनो मनैया अपन इच्छा पूरा करत कलेसे उहिहे कबु नै ओरैना मृत्यु मिल्हिस। और यदि केऊ पवित्र आत्मक इच्छा पालन करत कलेसे उहिहे सदाकालके जीवन मिल्हिस। 9भलाइक काम करेबेर निराश ना हुइहो। काकरेकी यदि हम्रे हिम्मत नै हर्ली कलेसे हम्रे परमेश्वरके समयमे ईनाम भेटैबी। 10तबेकमारे मौका भेटाइल अनुसार हम्रे सक्कु मनैनके भलाई कर्ती जाई; खास करके ओइन्हे जेने हमार विश्वासी भैया-बाबुन हुइँत।

अन्तिम चेतावनी और शुभकामना

11यी बर-बर अक्षरहे हेरो; तुहुरिन्हे देहक लग मै अपन हाँथेलेके लिखतुँ। 12यहूदी मनैनहे खुशी बनाइक लग ओइने तुहुरिन्हे खतना करवैना दबाव देथाँ। ओइने असिके यहे कारणसे करथाँ, ताकि मनै ओइन्हे असिन प्रचार करके सतावटमे ना पारिँत कि ख्रीष्ट क्रूसमे मुलाँ कना बातमे किल विश्वास करके परमेश्वर मनैनहे बँचैथाँ। 13खतना करवाइल यहूदी विश्वासीन फेन मोशक नियम कानुन पालन नै करथाँ। पर तुहुरिन्के खतना कराजाए कहिके ओइने चहथाँ, ताकि ओइने दोसुर यहूदिनके आघे घमण्डसे कहे सेकिँत, कि हमार कारणसे गैर-यहूदी विश्वासीन खतना करवैलाँ।

14यदि मै अपन लग घमण्ड करबुँ कलेसे हमार प्रभु येशू ख्रीष्ट हमार लग क्रूसमे मुलाँ कहिके किल मै घमण्ड करम। और येशू ख्रीष्ट क्रूसमे मुलक कारण आबसे मै संसारके गुलाम नै रहिगिनु। और आब संसारके यी कौनो फेन चिजके थेन मोरिकमे शासन करना शक्ति नै हुइतिन। 15काकरेकी ना ते खतनक कुछु महत्त्व बा, ना ते बिना खतनक, पर महत्त्वपूर्ण बात यम्नेहेँ बा कि हम्रे एकथो लावा सृष्टिमे बदलगिल बती। 16जेने लावा सृष्टिक नियम पालन करथाँ, उ सक्कुहुनहे परमेश्वर दया करिँत, और ओइने शान्तिसे रहिँत। और ओइने परमेश्वरके रोजल मनै हुइँत।

17आबसे महिन्हे केऊ फेन आकुर दुःख ना दिँत, काकरेकी मोरिक शरीरमे जोन डाम#6:17 डाम जोन-जोन मनै पावलके विरोधी रहिँत ओइने पावलहे पिट्लिस और उहिहे कोर्रालेके मर्लिस, काकरेकी पावल ख्रीष्टके बारेमे सिखाए। यी दाग वहे पिटाई खैलक कारणसे हुइल रहिस। बैठल बा, उ डाम जनाइत कि मै येशूक निउतरह्या हुइतुँ। 18हे मोरिक विश्वासी भैयो, मै प्राथना करतुँ कि प्रभु येशू ख्रीष्टके अनुग्रह तुहुरे सक्कु जहनके संग पलिरहे। आमेन! (यकर मतलब हुइत, अस्तेहेँ होए।)

Currently Selected:

गलाती 6: DVGNT

Highlight

Copy

Compare