एफिसी 1

1मै पावल, परमेश्वरके इच्छासे येशू ख्रीष्टके निउतरह्या हुइतुँ। और यी चिट्ठी मै एफिसस शहरमे रहल परमेश्वरके पवित्र और विश्वासयोग्य विश्वासी मनैनहे लिखतुँ। 2मै प्राथना करतुँ कि हमार परमेश्वर बाबा और हमार प्रभु येशू ख्रीष्ट तुहुरिन्हे अनुग्रह करिँत और शान्ति दिँत।

ख्रीष्टमे आत्मिक आशिष

3हमार प्रभु येशू ख्रीष्टके बाबा और परमेश्वरके प्रशंसा होए, जे हम्रिहिन्हे स्वर्गसे मिल्ना सक्कु मेरिक आत्मिक आशिष देले बताँ। यी ख्रीष्टके संगक हमार एकतक कारण सम्भव हुइल बा। 4और ख्रीष्टके संगक हमार एकतक कारण परमेश्वर संसारहे बनैनासे पैलेहेँ ऊ हम्रिहिन्हे अपन हुइक लग रोजलेलाँ। ताकि हम्रे हुँकार नजरमे पवित्र और निर्दोष हुई सेकी।

5काकरेकी परमेश्वर हम्रिहिन्हे प्रेम करलाँ, और ऊ पैलेहेँ असिन निर्णय लैलेले रहिँत कि येशू ख्रीष्टके कर्लक कामके कारण ऊ हम्रिहिन्हे अपन पुत्कारल लरका बनालिहीँ। परमेश्वर अपन खुशीसे और इच्छासे असिके करलाँ। 6हम्रे महिमामय अनुग्रहक लग परमेश्वरहे धन्यवाद चह्राई। जोन अनुग्रह ऊ हम्रिहिन्हे फोकत्यामे देले बताँ। काकरेकी हम्रे हुँकार छावक संग जुरल बती।

7ख्रीष्टके मुना समयमे हुँकार खुन बहलक कारण परमेश्वर हम्रिहिन्हे छुटैलाँ। ओकर मतलब हो, ऊ हमार पापहे माफ करदेलाँ, परमेश्वरके अनुग्रह गजब महान बतिन। जोन अनुग्रह ऊ हम्रिहिन्हे देले बताँ, 8उ अनुग्रह परमेश्वर हम्रिहिन्हे अपन सारा बुद्धिमानी और विवेकमे प्रशस्त मात्रामे देलाँ।

9और परमेश्वर अपन इच्छक रहस्य हम्रिहिन्हे देखादेलाँ, जोन अपन मजा उद्देश्यक अनुसार ऊ अप्निहीँ ख्रीष्टमे स्थापित करल रहिँत। 10जब यी योजनाहे पूरा करना समय आई, तब परमेश्वर स्वर्ग और पृथ्वीक सक्कु चिजहे ख्रीष्टके अधिनमे करादिहीँ, ताकि ख्रीष्ट सक्कु चिजके अगुवा बने सेकिँत।

11हमार सम्बन्ध ख्रीष्टके संग हुइलक कारण, परमेश्वर हम्रे यहूदिनहे चुन्ले बताँ। ताकि हम्रे उ चिज भेटाई सेकी, जोन चिज देना परमेश्वर हम्रिहिन्हे वाचा कर्ले रहिँत। उ वाचा वहे रहे, जोन चिज करक लग ऊ बहुत पैलेहेँ योजना बनैले रहिँत। और ऊ सक्कु चिज अपन योजना और इच्छासे पूरा करथाँ। 12हम्रे, यहूदिनके सुरुक मनै हुइती, जेने ख्रीष्टमे अपन आशा धर्ली। और हम्रे यक्रेहेक लग रोजगिल रही। ताकि हम्रे परमेश्वरहे प्रशंसा भेटैना कारण बने सेकी।

13तुहुरिन्के संग फेन यहे हुइल बा। तुहुरे सच्चा सन्देश सुनल बतो, जोन सन्देश बताइत कि परमेश्वर तुहुरिन्हे कसिके बँचैथाँ। जब तुहुरे ख्रीष्टहे विश्वास कर्लो, तब परमेश्वर अपन वाचा कर्लक पवित्र आत्मा तुहुरिन्हे देलाँ, यी देखाइक लग कि तुहुरे परमेश्वरके हुइतो। 14काकरेकी परमेश्वर हम्रिहिन्हे पवित्र आत्मा देले बताँ। हम्रे यी बातसे पक्का हुई सेक्थी कि परमेश्वर जोन दोसुर मजा-मजा चिज देना वाचा हम्रिहिन्से कर्ले बताँ, उ चिज हम्रिहिन्हे दिहीँ। यी तब हुई जब परमेश्वर हम्रिहिन्हे पूरा रुपमे मुक्ति दिहीँ, जे-जे हुँकार सन्तान हुइती। ताकि हम्रे परमेश्वरहे प्रशंसा भेटैना कारण बने सेकी।

आत्मिक ज्ञानके लग प्राथना

15उ सक्कुहुनके कारण जोन परमेश्वर कर्ले बताँ। जबसे मै प्रभु येशूकमे तुहुरिन्के विश्वासके बारेमे, और परमेश्वरके पवित्र मनैनहे कर्लक तोहाँर प्रेमके बारेमे सुनके। 16मै जबफेन तुहुरिन्के लग परमेश्वरहे धन्यवाद देथुँ। और अपन प्राथनामे मै तुहुरिन्हे सम्झथुँ।

17मै प्राथना करतुँ, कि परमेश्वर, हमार प्रभु येशू ख्रीष्टके महिमामय बाबा, तुहुरिन्हे अपन आत्मा दिँत, जे तुहुरिन्हे बुद्धिमान बनादी। और परमेश्वरहे तुहुरिन्केमे प्रकट करी, ताकि तुहुरे परमेश्वरहे जाने सेको। 18मै यी फेन प्राथना करथुँ, कि सच्चाईहे बुझक लग परमेश्वर तोहाँर सहायता करिँत। और तुहुरे उ आशक बारेमे फेन जाने सेको, जोन आशा देहक लग ऊ तुहुरिन्हे बलैले बताँ। और तुहुरे जाने सेको कि परमेश्वरके अपन पवित्र मनैनहे वाचा कर्लक आशिष कतरा महान और महिमित बतिन।

19और यी फेन जाने सेको कि हम्रे विश्वासीनके लग परमेश्वरके उ शक्ति तुलना करे नै सेकजैना रुपमे बहुत महान बतिन। और वहे बहुत महान शक्ति, 20ख्रीष्टहे मुअलमेसे जिवैलस। और हुँकिन्हे स्वर्गमे परमेश्वरके दाहिन हाँथ ओहोँर सम्मानके ठाउँमे बैठैलिन। 21ख्रीष्ट सक्कु मेरिक शासन, और अधिकार, और शक्ति और शासक पदसे उप्पर और यहे युगके किल नै होके अइना युगके फेन जतरा नाउँ बा, यी सक्कुहुनके उप्पर हुँकिन्हे धर्लिन।

22और परमेश्वर सक्कु चिजहे ख्रीष्टके अधिनमे करदेले बतिन। और हुँकिन्हे मण्डलीक भलाईक लग हरेक चिजके अगुवा बनादेलिन। 23तबेकमारे ख्रीष्ट मण्डलीक कपार हस हुइँत, और मण्डली हुँकार शरीर हस हुइतिन। मण्डली ख्रीष्टके माध्यमसे भरल बा, और ऊ सक्कु ठाउँमे हरेक चिजहे अपन हाजिरीसे भरदेथाँ।

Currently Selected:

एफिसी 1: DVGNT

Highlight

Copy

Compare