२ कोरिन्थी 13

अन्तिम चेतावनी

1-2पवित्र शास्त्रमे असिके लिखल बा, “हरेक मुद्दा दुई या तीनथो साँखीनके गवाहीसे समाधान करे परत।” मै पैलेहेँ ओइन्हे चेतावनी देसेकल बतुँ, जब मै अपन दोसर यात्रक समयमे वहाँ रहुँ। आब मै फेनदोस्रे ओइन्हे और दोसुर सक्कु मनैनहे यी चिठ्ठीमे चेतावनी देहतुँ, जसिके मै पहिले करल रहुँ। आब मै तेसरचो तुहुरिन्के थेन आइक लग बतुँ, और यदि ओइने अभिन फेन पाप करे नै छोरहीँ ते केऊ फेन दण्डसे नै बचिहीँ। 3मै यी कहतुँ, काकरेकी तुहुरे यी बातके सबुत मंग्थो कि ख्रीष्ट मोरिक माध्यमसे बोल्थाँ। जब ख्रीष्ट तुहुरिन्हे सुधरथाँ ते ऊ कमजोर नै हुइँत, बेन ऊ तुहुरिन्के बिच्चेम अपन शक्ति देखैथाँ। 4ख्रीष्टहे कमजोरीमे क्रूसमे टँगागिलिन, पर आब ऊ परमेश्वरके शक्तिसे जित्ती बताँ। हम्रे फेन ओस्तेहेँके कमजोर बती जसिके ख्रीष्ट रहिँत। तभुन फेन परमेश्वरके शक्तिसे हम्रे तुहुरिन्के संग व्यवहार करक लग हुँकार संग रहब। 5तुहुरिन्के विश्वास सच्चा बा कि नै हो कहिके और येशू ख्रीष्ट तुहुरिन्केमे बताँ कि नै कहिके तुहुरे अपनहे अप्निहीँ जाँचो। पर ख्रीष्ट तुहुरिन्केमे नै हुइँत कलेसे तुहुरे असफल होगिल बतो। 6पर महिन्हे आशा बा कि तुहुरे जानलेबो, कि हम्रे जाँचमे सफल होगिल बती। 7हम्रे परमेश्वरसे प्राथना कर्थी कि तुहुरे कुछु खराब काम ना करो। यी देखाइक लग नै हो कि तुहुरिन्के बिच्चेम हमार सेवा सफल रहल। बेन हम्रे अप्ने असफल हुइल हस लग्लेसे फेन तुहुरे मजा काम करो कना हम्रे चहथी। 8काकरेकी हम्रे सच्चाइक विरोधमे कुछु नै करे सेक्थी, पर हम्रे सच्चाइक लग किल करे सेक्थी। 9काकरेकी हम्रे विश्वासमे कमजोर बती, और तुहुरे विश्वासमे बल्गर बतो कलेसे हम्रे आनन्दित हुइथी। और हम्रे यी प्राथना कर्थी कि तुहुरे विश्वासमे सिद्ध होजाऊ।

10तबेकमारे मै तुहुरिन्हे यी बात तुहुरिन्के थेन अइनासे पैलेहेँ लिखतुँ, ताकि तुहुरिन्हे दण्ड देके महिन्हे अपन अधिकार देखाई ना परे, जोन अधिकार प्रभु महिन्हे देले बताँ। काकरेकी मै अपन अधिकारके प्रयोग तुहुरिन्के विश्वासहे बल्गर बनाइक लग करे चहथुँ, तुहुरिन्हे नाश करक लग नै चहथुँ।

अन्तिम नमस्कार

11हे मोरिक विश्वासी भैयो, आब अन्तिममे तुहुरिन्हे आनन्द मिले, सिद्ध बन्ती जाऊ, मोरिक सल्लाहा सुनो, एकदोसर जहनसे एक मन होके शान्तिमे रहो। और प्रेम और शान्ति देहुइया परमेश्वर तुहुरिन्के संग रहिहीँ।

12एकदोसर जहनहे ख्रीष्टके प्रेमसे नमस्कार करो। 13परमेश्वरके सक्कु पवित्र मनै तुहुरिन्हे नमस्कार पठैले बताँ। 14प्रभु येशू ख्रीष्टके अनुग्रह, परमेश्वरके प्रेम और पवित्र आत्मक संगति तुहुरिन् सक्कु जहनके संग पलिरहे।

Currently Selected:

२ कोरिन्थी 13: DVGNT

Highlight

Copy

Compare