२ कोरिन्थी 12

पावलके दर्शन

1जब कि गर्व करना मोरिक लग ठिक नै हो तभुन फेन गर्व करे परत। पर मै प्रभुक देहल दर्शन और हुँकार देखैलक चिजके बारेमे चर्चा करम। 2मै ख्रीष्टहे विश्वास करुइया एकथो मनैया#12:2 एकथो मनैया यी मनैया पावल अप्निहीँ हो, काकरेकी ऊ अपन बारेमे घमण्ड करना नै चाहतेहे।हे चिहिन्थुँ, जे चौद साल आघे स्वर्गमे लैजागिल रहे। मै नै जन्थुँ, कि ऊ वहाँ अपन संसारिक शरीरमे रहे या अपन आत्मामे किल रहे, पर यी बात परमेश्वर किल जन्थाँ। 3फेनदोस्रे मै दोहोर्याइतुँ, मै जन्थुँ कि उ मनैया स्वर्गेएमे लैजागिल रहे। फेनदोस्रे महिन्हे यी पता नै हो कि यी जात्तिकमे हुइल रहे कि यी एकथो दर्शन किल रहे, यी बात परमेश्वर किल जन्थाँ। 4और ऊ स्वर्गमे असिन बात सुनल, जेकर बयान बोलके करे नै सेकजाइत। और असिन बात सुनल, जेकर बारेमे बतैना अनुमति कौनो फेन मनैनहे नै हुइतिन। 5असिन मनैयक बारेमे मै गर्व करम, पर अपन कमजोरी बाहेक कौनो दोसुर बातमे मै गर्व नै करम।

6काकरेकी यदि मै गर्व करना चाहम कलेसे फेन मै मूर्ख नै बनम, काकरेकी मै सँच्चे बोलम। पर मै अपनहे असिन घमण्डसे रोक्थुँ ताकि असिन ना होए कि जोन मनै महिन्हे हेरथाँ, और मोरिक बात सुन्थाँ, ओइने महिन्हे उहिसे धेउर मानिँत।

पावलके शरीरके काँटा

7पर महिन्हे उ अचम्मक चिजके बारेमे घमण्ड नै करे परना हो, जोन चिज परमेश्वर महिन्हे देखैले बताँ। तबेकमारे समस्यक रुपमे मोरिक शरीरमे एकथो काँटा देगिल बा, जेकर कारण महिन्हे जिना मुश्किल होगिल बा। और शैतानके ओहोँरसे आइल दूत महिन्हे काँटालेके गोझक लग और महिन्हे घमण्ड करनासे रोकक लग देगिल बा। 8यकर बारेमे मै प्रभुसे तीनचो प्राथना कर्नु कि यी महिन्से दूर होजाए। 9पर प्रभु महिन्हे कलाँ, “मोरिक अनुग्रह तोरिक लग काफी बा, काकरेकी मोरिक शक्ति कमजोरीमे सिद्ध हुइत।” तबेकमारे मै महा खुशीसे अपन कमजोरीमे गर्व करम ताकि ख्रीष्टके शक्ति मोरिकमे काम करे सेके। 10तबेकमारे ख्रीष्टके कारण कमजोरीमे, बदनामीमे, और समस्यामे, और सतावटमे, और आफतमे मै सन्तुष्ट रथुँ। काकरेकी जब मै कमजोर रथुँ, तब ख्रीष्टके शक्तिसे मै बल्गर होजिथुँ।

कोरिन्थीनके लग पावलके चिन्ता

11मै मूर्ख बन्नु। पर यी तुहुरेहे हुइतो जे महिन्हे असिक करक लग मजबुर कर्लो, बेन तुहुरिन्से ते मोरिक प्रशंसा हुई परना रहे। जब कि मै कुच्छु फेन लायकके नै हुइतुँ, तभुन फेन कौनो बातमे मै ओइन्से कम नै हुइतुँ, जेने देखैथाँ कि ओइने सक्कु निउतरह्यनसे भारी बताँ। 12जब मै तुहुरिन्के संग रहुँ, ते मै तुहुरिन्हे पक्का सबुत देले रहुँ कि मै एकथो निउतरह्या हुइतुँ। काकरेकी मै सँस्सा करके तुहुरिन्के बिच्चेम बहुत चिन्हा, अचम्मक काम और चमत्कारके काम कर्ले बतुँ। 13एकथो काम जोन मै तुहुरिन्के संग नै कर्नु, जोन काम मै दोसुर मण्डलीमे कर्नु। उ काम यी हो कि मै तुहुरिन्के लग कबु फेन आर्थिक रुपमे बोझ नै बन्नु। तुहुरिन्के असिन सोँच्ना गलत हो कि मै असिक करके तुहुरिन्के विरोधमे गलत कर्नु!

मण्डलीक लग प्रेम

14आब, तेसरचो तुहुरिन्के थेन आइक लग मै तयार बतुँ, और मै अब्बे फेन तुहुरिन्से कुछु नै माँगम। काकरेकी मै तुहुरिन्के सम्पतिहे नै, पर मै तुहुरिन्हे चहथुँ। काकरेकी छाईछावनहे अपन दाईबाबनके लग पैँसा जमा करे नै परत। पर दाईबाबनहे अपन लर्कनके लग पैँसा जमा करे पर्थिन। 15तुहुरिन्के लग मै अपन सक्कु चिज दैदेहम, और मै तुहुरिन्के लग अपन ज्याने दैदेहम। मै तुहुरिन्हे गजब माया करथुँ, पर असिन लागत कि तुहुरे महिन्हे थोर-थोर किल प्रेम करथो।

16तुहुरिन्मेसे केऊ-केऊ सोँच्था कि मै तुहुरिन्केमे बोझ नै रहुँ। पर दोसुर जहनहे लग्थिन कि मै चलाँख बतुँ, और मै तुहुरिन्हे पूरा रुपमे धोखा देले बतुँ, जोन कि एकथो झूँट हो। 17मै तुहुरिन्से अपन लग पैँसा लेहक लग तीतसहे या कौनो दोसुर जहनके प्रयोग नै करल हुइतुँ। 18मै तीतसहे तुहुरिन्के थेन जाइक लग अनुरोध कर्नु, और ओकर संग दोसुर विश्वासी भैयाहे फेन पठैनु। का तीतस तुहुरिन्से फाइदा उठाइल? नै! काकरेकी मै और तीतस एक्के उद्देश्यसे काम करतिही। और हम्रे सक्कु जाने एक्के हस व्यवहार कर्ली।

19शायद तुहुरे सोँचथुइबो कि हम्रे जबफेन तुहुरिन्के आघे अपनहे बँचैना कोशिस कर्थी। नै, हम्रे ओस्तेहेँके बोल्थी जसिके ख्रीष्ट हम्रिहिन्हे परमेश्वरके हाजिरीमे बोलक लग कथाँ, और हम्रे ज्या फेन कर्थी प्रिय संघरियन, यी सक्कु बात तुहुरिन्हे विश्वासमे बल्गर बनाइक लग हो। 20काकरेकी महिन्हे डर बा कि जब मै तुहुरिन्के थेन अइम, ते मै तुहुरिन्हे ओसिन नै भेटैम, जसिन मै चहथुँ। और तुहुरे सक्कु जाने फेन महिन्हे ओसिन नै भेटैबो, जसिन तुहुरे चहथो। कहुँ असिन ना होए कि मै तुहुरिन्के बिच्चेम झगरा, क्रोध, स्वार्थ, बिह्रे मुना, चिब्ली खैना, घमण्ड और अव्यवस्था भेटाऊँ। 21कहुँ असिन ना होए कि जब मै फिर्ता अइम ते मोरिक परमेश्वर महिन्हे अपमान करे, और महिन्हे उ बहुत्ते जहनके लग शोक करे परे। जेने आघे पाप कर्ले रहिँत। और उ खराब काम, और छिनार काम और कामुकता जसिन कर्लक कामसे ओइने अपन मन बदलके पाप करे नै छोरलाँ।

Currently Selected:

२ कोरिन्थी 12: DVGNT

Highlight

Copy

Compare