१ थेसलोनिकी 1

1यी चिट्ठी पावल, सिलास और तिमोथीक ओहोँरसे हो। यी थेसलोनिके शहरके मण्डलीहे लिखगिल बा, जोन मण्डली परमेश्वर बाबा और प्रभु येशू ख्रीष्टसे सम्बन्धित बा। मै प्राथना करतुँ कि परमेश्वर तुहुरिन्केमे अनुग्रह करिँत और तुहुरिन्हे शान्ति दिँत।

थेसलोनिके शहरके विश्वासीनके लग धन्यवाद

2हम्रे प्राथनामे हरदम तुहुरिन्हे सम्झथी, और हम्रे परमेश्वरहे तुहुरिन सक्कुहुनके लग धन्यवाद देथी। 3और जब हम्रे अपन बाबा परमेश्वरसे प्राथना कर्थी ते हमार प्रभु येशू ख्रीष्टमे तुहुरिन्के उ काम हरदम याद कर्ती रथी, जोन काम तुहुरे विश्वासके कारण करथो। और दोसुर जहनकेमे प्रेम देखाइक लग जोन तुहुरे कड़ा मेहनत करथो। तुहुरे सतावट सहथो। काकरेकी तुहुरे प्रभु येशू ख्रीष्टके फिर्ता अइना आशा करथो। 4हे मोरिक विश्वासी भैयो, हम्रे जन्थी कि परमेश्वर मनैनहे प्रेम करथाँ, तुहुरिन्हे अपन मनै बनाइक लग चुन्ले बताँ। 5काकरेकी येशू ख्रीष्टके बारेमे हमार खुशीक खबर तुहुरिन्के थेन बोलीमे किल नै आइल। पर पवित्र आत्मक शक्तिसे पूरा रुपमे पक्का होके आइल बा; तुहुरे मजासे जन्थो कि तुहुरिन्के फाइदक लग हम्रे तुहुरिन्के थेन कसिके रही। 6तुहुरे हमार और प्रभुक अनुशरण कर्ले बतो। तुहुरिन्केमे बरवार दुःख रहे, पर तुहुरे उ सन्देशहे स्वागत कर्लो, जोन सन्देश पवित्र आत्मासे देगिल बा। 7तबेकमारे माकेडोनिया प्रदेश और अखैया प्रदेशके सक्कु विश्वासीनके लग तुहुरे नमूना बन्लो। 8काकरेकी तुहुरिन्के थेनसे परमेश्वरके वचन माकेडोनिया प्रदेश और अखैया प्रदेशमे किल प्रचार नै करगिल हो। पर हरेक ठाउँ जहाँ हम्रे जैथी, वहाँ हम्रे मनैनहे परमेश्वरमे तुहुरिन्के विश्वासके बारेमे हम्रिहिन्हे बताइत भेटैथी। तबेकमारे हम्रिहिन्हे तुहुरिन्के बारेमे दोसुर जहनहे कुछु फेन बतैना जरुरी नै हो। 9काकरेकी ओइने अप्निहीँ दोसुर जहनहे बतैथाँ, कि जब हम्रे तुहुरिन्के थेन अइली ते तुहुरे कसिके हमार स्वागत करलो। और यी फेन बतैथाँ, कि कसिके तुहुरे मूर्तिनसे दूर होके परमेश्वरके ओहोँर घुम्लो, ताकि तुहुरे जित्ती और सच्चा परमेश्वरके सेवा करो। 10और हुँकार छावक स्वर्गमेसे फिर्ता अइना असरा हेर्ती रहो, जिहिहे परमेश्वर मुअलमेसे फेनदोस्रे जिवैलाँ। अर्थात येशूहे, जे हम्रिहिन्हे परमेश्वरके उ न्यायसे बँचाइत, जोन आइक लग बा।

Currently Selected:

१ थेसलोनिकी 1: DVGNT

Highlight

Copy

Compare