१ पत्रुस 3

थारु और जन्नी

1-2हे जन्नी मनै, तुहुरे फेन अपन थरवक अधिनमे रहो। ताकि यदि तुहुरिन्मेसे केक्रो थरवा परमेश्वरके वचन विश्वास करनासे अस्वीकार करत कलेसे तुहुरे कुछु नै कलेसे फेन तुहुरिन्के व्यवहार देख्के ओइने परमेश्वरहे विश्वास करे सेक्थाँ। जब ओइने तुहुरिन्के शुद्ध और प्रेम भरल व्यवहार देख्हीँ। तब ओइने ख्रीष्टमे विश्वास करहीँ। 3अपनहे सुग्घुर बनाइक लग अपन भुट्लामे रहर लग्तिक झोँटी ना बनाऊ। और सोन, मोती और बहुत महिँगा लुग्गा लगाके दोसुर जहनके ध्यान अपन ओहोँर ना तानो। 4तुहुरिन्के भित्री मनमे रहल बात तुहुरिन्हे सुग्घुर बनाइत। उ कलक तुहुरिन्के नरम और शान्त व्यवहार हो, जोन परमेश्वरके लग बहुत किम्ती बा। 5काकरेकी बहुत पहिलेक जन्नी मनैनके व्यवहार फेन अस्तेहेँ रहिन। ओइन्के जीवन पवित्र रहिन, और ओइने परमेश्वरहे विश्वास और आशा करिँत। उ जन्नी मनै सुग्घुर हुइलाँ, काकरेकी ओइने अपन थरवक अधिनमे बैठिँत। 6सारक हस, जे अब्राहामहे स्वामी कहिके ओकर आज्ञा पालन करे। उ कलक यदि तुहुरे दोसुर जहनके लग मजा करबो और कौनो बातमे नै डरैबो कलेसे तुहुरे सारक छाईन हस हुइतो।

7हे थारु मनै, ओस्तेहेँके तुहुरे अपन-अपन जन्नीनसे मिलके बैठो। और कसिके ओइन्हे सहयोग करना कहिके विचार करो। और ओइने तुहुरिन्से कमजोर बताँ कहिके तुहुरे याद करो। तबेकमारे तुहुरे ओइन्हे सम्मान करे परत। काकरेकी तुहुरे दुनु जाने परमेश्वरके देहल वहे अनुग्रहक साझा हकदार बतो, जोन अनुग्रह सदाकालके जीवन हो। तुहुरे अस्तेहेँके करहो ताकि जब तुहुरे हुँकिन्से प्राथना करे जैबो ते परमेश्वर तुहुरिन्के प्राथना सुनिँत।

मजा काम करेबेर अइना दुःख

8अन्तिममे विश्वासी भैयो, मै तुहुरिन्हे यी कहे चाहतुँ, कि तुहुरे एकतामे बैठो, एकदोसर जहनके लग सोँचो। एक्के परिवारके सदस्य हस एकदोसर जहनहे प्रेम करो। एकदोसर जहनहे दया देखाऊ, और एकदोसर जहनसे नम्र होऊ।

9खराबीक बदला खराबी नै करुइया अथवा बेज्जतके बदला बेज्जत नै करुइया, बेन ओकर बदलामे आशिष देहुइया बनो। तुहुरे ओइन्के लग आशिष मांगदेहे परत। काकरेकी तुहुरे परमेश्वरसे आशिष देहक लग बलागिल बतो, ताकि तुहुरे परमेश्वरसे आशिष भेटाई सेको। 10काकरेकी पवित्र शास्त्रमे असिके लिखल बा,

“यदि कौनो मनैया अपन जीवनके आनन्द लेहे चाहत,

और मजा दिन देख्ना इच्छा करत कलेसे,

उहिहे खराब काम करनासे हौश्यार रहे परत।

और उहिहे उ बात बोल्ना छोरे परत, जोन सच्चा नै हो।

11उहिहे खराब काम करना छोरे परत। बेन उहिहे मजा काम करे परत।

दोसुर जहनके संग शान्तिमे रहक लग कर्रा मेहनत करो।

12काकरेकी प्रभु मजा काम करुइया मनैनहे हेरथाँ।

और ऊ ओइन्के प्राथना सुनक लग हरदम तयार रथाँ।

पर परमेश्वर नै मजा काम करुइया मनैनके विरोधमे काम करथाँ।”

13यदि तुहुरे सदादिन मजा काम करक लग कोशिस करथो कलेसे पक्कै फेन तुहुरिन्हे केऊ चोट पुगाई नै सेकी। 14पर यदि तुहुरिन्हे मजा काम कर्लक कारण दुःख भोगे परता कलेसे परमेश्वर तुहुरिन्हे आशिष दिहीँ। तुहुरे यशैया अगमवक्तक लिखल हस करो: “तुहुरिन्हे धम्की देहुइया मनैनसे ना डराऊ, और मनै का करहीँ कना बातमे चिन्ता ना करो।” 15बेन तुहुरे ख्रीष्टहे तुहुरिन्के जीवनके प्रभुक रुपमे आराधना करो। और यदि हम्रे सक्कु विश्वासीन साझेदार हुइना आशक बारेमे केऊ पुँछल कलेसे उहिहे व्याख्या करक लग हरदम तयार रहो। 16पर यिहिहे नम्र और आदरसे भरल तरिकासे करो। सदादिन ज्या मजा बा, वहे करो। जब तुहुरिन्के विरोधमे खराब बात करुइया मनै तुहुरिन्के ख्रीष्टके संगक सम्बन्धक कारण तुहुरिन्के मजा व्यवहार देख्हीँ, तब ओइने लाजमे परजिहीँ। 17यदि हमार मजा कामके कारणसे हम्रे दुःख भोग्थी, और यी हमार लग परमेश्वरके इच्छा हो कलेसे यी एकदम मजा हो। खराब काम करके दुःख उठाइलसे ते यहे मजा बा। 18मै असिके यहे कारणसे कहतुँ, काकरेकी हमार पापके कारण ख्रीष्ट दुःख भोग्लाँ, और मुलाँ। ऊ एकचो किल मुलाँ और यिहिहे दोहरैना जरुरी नै हो। ऊ एकथो धर्मी मनैया रहिँत, जे पापी मनैनके लग मुलाँ ताकि ऊ हम्रिहिन्हे परमेश्वरके लग्गे नाने सेकिँत। ओइने हुँकार शरीरहे मुवैलाँ, पर हुँकार आत्मा जित्ती बतिन। 19तब हुँकार आत्मा गैलिन, और परमेश्वरके कैद कर्लक आत्मनहे उ ठाउँमे खुशीक खबर प्रचार करलाँ, जहाँ मुअल मनैनके आत्मा बतिन। 20यने वहे आत्मा रहिँत, जेने बहुत समय पहिले परमेश्वरके आज्ञा पालन नै करलाँ। जब नोआ अपन पानी जहाज बनाइतेहे, तब मनै अपन पाप करना छोरके परमेश्वरके ओहोँर घुमके अइथाँ कि कहिके परमेश्वर धिरजतासे ओइन्के आसरा हेरतिहिँत। पर आठ जाने किल उ डरलग्तिक सैलाबसे बँचागिलाँ। 21जब हम्रे डुब्कि लेथी तब पुरान समयमे ओइन्के मुक्ति अब्बे हमार मुक्तिक एकथो उदाहरण हो। हमार डुब्कि लेना पानी हमार शरीरमेसे फुहर नै हटाइत। पर ओकर संकेत यी हो कि हम्रे परमेश्वरसे माफी मंग्ले बती, ताकि हमार मन आबसे ना घब्राए। हम्रे माफी भेटाई सेक्थी, काकरेकी येशू ख्रीष्ट मुअलमेसे फेनदोस्रे जित्ती होगिलाँ।

22और ऊ स्वर्गमे चलगिलाँ। आब ऊ वहाँ परमेश्वरके दाहिन पाँजर सक्कुहुनसे खास ठाउँमे बैठल बताँ। और ऊ सक्कु स्वर्गदूत और सक्कु अधिकारीनके और शक्तिहुँक्रिहिनके उप्पर राज करथाँ।

Currently Selected:

१ पत्रुस 3: DVGNT

Highlight

Copy

Compare