१ पत्रुस 2
2
1तबेकमारे सक्कु मेरिक खराब काम छोरदेऊ। दोसुर जहनहे धोखा ना देऊ। कपटी ना बनो। दोसुर जहनके बिह्रे ना मुओ। दोसुर जहनके विरोधमे नै मजा बात ना बत्वाऊ। 2मै तुहुरिन्हे भर्खर लावा जल्मलक लरकनसे तुलना करथुँ। एकथो लावा जल्मलक लरकाहे बल्गर हुइती बह्रक लग रोट्दिन उहिहे दाईक दूध चहथिस। ओस्तेहेँके तुहुरिन्हे फेन परमेश्वरके वचन सुन्ना इच्छा हुई परत। ताकि परमेश्वरकेमे तुहुरिन्के विश्वास पक्का होए। और परमेश्वर तुहुरिन्हे बँचाई सेकिँत। 3काकरेकी जसिके पवित्र शास्त्रमे लिखल बा, “तुहुरे अनुभव कर्ले बतो कि प्रभु भलाई करथाँ।
4-5तुहुरे प्रभु येशूक थेन आइल बतो। ऊ एकथो भवनके जग बैठैलक मूल ढुंगक हस बताँ। पर येशू जित्ती ढुंगा हुइँत। हुँकिन्हे बहुत्ते मनै अस्वीकार कर्लिन। पर परमेश्वर हुँकिन्हे चुन्लाँ। और हुँकिन्हे बहुमूल्य बनैलाँ। और जसिके मनै ढुंगालेके भवन बनैथाँ, ओस्तेहेँके परमेश्वर फेन तुहुरिन्हे एकथो समूहमे जमा करैले बताँ। जेम्ने परमेश्वरके आत्मा रथिन, ताकि तुहुरे पुजारीनके हस हुँकार सेवा करो, जेने बलिदान चह्रैथाँ। और ओइने असिन काम करथाँ, जोन काम परमेश्वरहे खुशी बनैथिन। असिन काम तुहुरे यहे कारणसे कर्बो जोन काम येशू ख्रीष्ट कर्ले बताँ।”
6काकरेकी पवित्र शास्त्रमे परमेश्वर असिके कले बताँ,
“हेरो, मै सियोन शहरमे कोन्वक ढुंगा हस किहुहे धारतुँ।
ऊ जग बैठाइक लग रोजगिलक एकथो बहुमूल्य ढुंगा हस हुइताँ,
जे हुँकारमे विश्वास करी ओकर लाज नै हुइहिस।”
7तुहुरे येशू ख्रीष्टमे विश्वास करुइयनके लग ते यी ढुंगा बहुत किम्ती बा। पर हुँकारमे विश्वास नै करुइया मनैनके लग पवित्र शास्त्र असिके कहत,
“जोन ढुंगाहे भवन बनुइयन काम लगैनासे अस्वीकार करदेलाँ,
वहे ढुंगा भवन बनाईबेर बहुमूल्य बनल बा।”
8और फेनदोस्रे पवित्र शास्त्रमे असिके फेन लिखल बा,
“यी ढुंगा मनैनहे भुइयाँमे गिराई,
यी एकथो चट्टान हो, जे ओइन्हे गिराई।”
ओइने असिके गिरथाँ, काकरेकी ओइने परमेश्वरके सन्देशहे मन्नासे अस्वीकार करथाँ।
परमेश्वर ओइन्हे अस्तेहेँ हुइन कना योजना बनैले बताँ।
9पर तुहुरे ओसिन नै हुइतो, काकरेकी तुहुरे परमेश्वरके रोजल मनै हुइतो। तुहुरे उ परमेश्वरके पुजारी हुइतो, जे एकथो रज्वा हुइँत। तुहुरे परमेश्वरके सेवा करक लग समर्पित हुइलक मनै और परमेश्वरके नेजी जनता हुइतो। ऊ तुहुरिन्हे अंधारमेसे अपन अचम्मक ओजरारमे रोजल बताँ, ताकि तुहुरे परमेश्वरके अचम्मक कामके घोषणा करे सेको।
10एकचो तुहुरे परमेश्वरके जनता नै रहो, पर आब तुहुरे परमेश्वरके जनता हुइल बतो। एकचो तुहुरे परमेश्वरके दया नै भेटाइल रहो, पर आब तुहुरे यिहिहे जन्थो। काकरेकी परमेश्वर पैलेहेँ तुहुरिन्हे अपन दया देखा सेकल बताँ।
11हे मोरिक प्रिय संघरियन, तुहुरे यी संसारमे विदेशीनके हस और प्रवासीनके हस बैठल बतो। मै तुहुरिन्हे अनुरोध करतुँ कि शरीरके उ सक्कु खराब इच्छासे दूरे बैठो। काकरेकी असिन चाहना हरदम तुहुरिन्के प्राणके विरोधमे रहत। 12परमेश्वरहे विश्वास नै करुइया मनै तुहुरिन्के आसपासे रथाँ, और तुहुरे गलत करतो कहिके कहे सेक्थाँ। तुहुरे असिन मजा जीवन बिताऊ कि ओइने तुहुरिन्के कर्लक मजा काम देखिँत, और ख्रीष्ट फिर्ता अइना दिनमे परमेश्वरके महिमा करिँत।
शासक और मलिक्वनके अधीनता
13हम्रे उ सक्कु शासकहुँक्रिहिनके अधिनमे बैठे परत, जेनहे मनै नियुक्त कर्ले रथाँ। काकरेकी उ प्रभुक इच्छा हो। रज्वक अधिनमे बैठो, जे सक्कुहुनके उप्पर शासन करत। 14हाकिमनके फेन अधिनमे बैठो। काकरेकी गलत काम करुइया मनैनहे सजाय देना और सही काम करुइयनहे प्रशंसा करना अधिकार रज्वा हाकिमनहे देले रथिन। 15तुहुरे मजा काम करो कना परमेश्वर चहथाँ। ताकि तुहुरे गलत आरोप लगुइया उ मूर्ख मनैनहे रोके सेको, जेने परमेश्वरहे नै चिहिन्थाँ। 16तुहुरिन्के चाहल अनुसार काम करनासे तुहुरिन्हे रोके सेकुइया केऊ नै हो। काकरेकी तुहुरे हमार प्रभु येशू ख्रीष्टके माध्यमसे पैलेहेँ स्वतन्त्र होसेकल बतो। पर खराब काम करक लग यिहिहे बहाना ना बनैहो। बेन तुहुरे अपन कामसे यी देखाई परत कि तुहुरे जात्तिके परमेश्वरके सेबक हुइतो। 17सक्कु मनैनहे आदर करो। विश्वासी भैया बाबुनहे प्रेम करो। परमेश्वरसे डराऊ। रज्वक आदर करो।
18तुहुरे नोकरहुँक्रे, जेने दोसुर जहनके घरेम काम करथो और विश्वासी फेन हुइतो। तुहुरे अपन मलिक्वनके आज्ञा पालन करे परत, और हरदम ओइन्के आदर करे परत। तुहुरे सक्कु मेरिक मलिक्वनहे आदर करे परत। चाहे ओइने दयालु और व्यवहारिक रहिँत या ना रहिँत। 19काकरेकी परमेश्वर हम्रिहिन्से खुशी हुइथाँ, जब हम्रे सँस्सा करके उ दुःखहे सहलेथी, जोन दुःख हम्रिहिन्हे नै मिलेपरना हो। काकरेकी हम्रे परमेश्वरके बारेमे सोँच्थी। 20पर यदि तुहुरे गलत काम करके पिटाई खैथो कलेसे तुहुरे अपन सजाय भोगेबेर धिरजता देखैथो कलेसे ओम्ने तुहुरिन्हे कुछु प्रशंसा नै मिली। पर यदि तुहुरे मजा कामके लग दुःख भोगेबेर तुहुरे धिरजता देखैथो कलेसे परमेश्वर यिहिसे खुशी हुइथाँ। 21परमेश्वर तुहुरिन्हे बलैना एकथो कारण यी हो कि तुहुरिन्हे हुँकार लग दुःख भोगे परी। ख्रीष्ट, जे तुहुरिन्के लग दुःख भोग्लाँ, ऊ तुहुरिन्के लग एकथो उदाहरण हुइताँ। तबेकमारे तुहुरे फेन हुँकार कर्लक कामके अनुशरण करे परत।
22पवित्र शास्त्रमे असिके लिखल बा, “ऊ कबु पाप नै करलाँ,
और ऊ कबु फेन कौनो झूँट नै बोल्लाँ।”
23जब मनै येशूक बेज्जत करलाँ, तब ऊ ओइन्के बेज्जत नै करलाँ। जब मनै हुँकिन्हे दुःख देलाँ, तब ओकर बदलामे ऊ ओइन्हे चोट पुगैना कोशिस फेन नै करलाँ। बेन यकर बद्लामे येशू सहयोगके लग परमेश्वरकेमे भरोसा करलाँ। हुँकिन्हे पता रहिन कि परमेश्वर हरदम मनैनके न्याय सही तरिकासे करथाँ। 24जब ख्रीष्ट मुलाँ, ऊ क्रूसमे हमार पापके लग अपन शरीरमे दण्ड भोग्लाँ। ऊ असिन यहे कारणसे करलाँ ताकि हम्रे पाप करना छोरके धर्मी होके जीवन जिना सुरु करे सेकी। और हुँकार सहलक चोटसे हम्रे चोखाइल बती। 25पहिले तुहुरे डगर भुलाइल भेँरीनके हस रहो। पर आब तुहुरे अपन आत्मक भेँरहुवा और सुरक्षा करुइया ख्रीष्टके थेन घुमल बतो।
Currently Selected:
१ पत्रुस 2: DVGNT
Highlight
Copy
Compare
Share
Want to have your highlights saved across all your devices? Sign up or sign in
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.
