रोमि 15

दिहराआ बोझ उसलिलोओ

1ओमे आमू जे बलवानो जोवे का कोमजोरो ओ कोमजूरि सहन कोईत सेकताहा ने कोडू आपाआ आपुह प्रसन्न कोआ. 2आमापोरोत हर एक जागऱ्याहा तियाआ हाजा कामा कोअता प्रसन्न को का तियाआ उन्नति उवे. 3काहाके का ख्रिस्ताने आपाआ स्वतःहा प्रसन्न कोल्यु नाहा पण जेहलो लेखिलो होय, “ताआ निंदकांची निंदा मापो आवयी होय” 4जेतेहे गोठी पाल्या पोरोत लेख्यहो गोयी होय, ती आमा कोअता लेखी गोयी होय का आमाहा धीर अने पवित्रशास्त्राआ हाजो आशा मेकही. 5धीर अने शांती आपणारो परमेश्वर तुमामे ओ वरदान आप का ख्रिस्त येशुउ नुसार परस्पर एक मोन ओतगोयु रोअलो. 6काहाके का तुमु एक मोन अने होमला स्वरात आमा प्रभू येशु ख्रिस्ताआ बाहहू परमेश्वर याहा स्तुती कोईली.

एकजुट ओत परमेश्वरो महिमा

7याकोअता जेहलो ख्रिस्ताने परमेश्वरोओ गौरव कोअता तुमामे ग्रहण कोल्यु होय तेहलूज तुमु पण एक दिहीराहा ग्रहण को. 8याकोअता आय कोत्लू का जी प्रतिज्ञा आगला डायाहा आप्यी गोयी ओती तियाहा दृढ कोइला कोअता ख्रिस्त परमेश्वरोओ हाजोपोन प्रमाण आपलो कोअता सुंता कोईओलो मांहो सेवक बन्यो, 9अने अन्यजाति पण विसारोओ दया परमेश्वरोओ स्तुती केहेलो कोये लेखिलो होय, “याकोअता आय जातीई-जातीई माय ताआ धन्यवाद कोअनारू, अने ताआ नावाआ भजन गावीही” 10फासी कोयु, “ओ जाती-जातीइ आखे माहु, तियाआ प्रजे आरी आनंद को” 11अने फासाडी, “ओ जाती-जातीइ आखे माहु, प्रभूऊ स्तुती को, अने ओ राज्य राज्यआ माहु, तियाआ स्तवन को” 12अने फासाडी यशायाह कोत्लू, इशायाचा अंकुर फुटे, अने दिहरे जातीया अधिकारी उविला कोअता एक उठी, तियापो अन्यजाति आशा मेकीत. 13परमेश्वर जो आशेमेहे दाता होय तुमामे विश्वास कोइला कोअता आखे प्रकारोओ आनंद अने ठावकुजे पुरोओत कोअही का पवित्र आत्माआ सामर्थ्यावाही तुमाआ आशा वोदतो जाइअलो.

यरूशलेमरोत इल्लुरिकुम

14ओ माआ पाही, आय स्वतः तुमाआ विषयाला निच्छित ओलखीत्लू, का तुमु पण स्वतःआ हाजोकोते पोअल्ये ईश्वरीय ज्ञानांनी जाअखो होय, अने एक दिहराहा बोध कोहू सेकतेहे. 15तेबी आय केधी-केधी ओर आपलो कोअता तुमामे जे जाअखो धैर्याने लेखिलो होय ओ तियाअ कृपेच्या कारनोवाही उवे जे परमेश्वराने माहु आप्लु होय, 16का आय दिहरे जाती याकोअता ख्रिस्त येशु सेवक ओतगोयु परमेश्वरोओ सुवार्तेची सेवा याजका एकहरको कोहू, ज्याआपोरोत अन्यजाति या अर्पण कोअल्यो जालो पवित्र आत्मावांहि पवित्र बोणीत ग्रहण कोल्यु जाइअलो. 17याकोअता तिया गोठीइ विषया माय जे परमेश्वरा आरी संबध मेकोहो, आय ख्रिस्त येशु माय माहु अभिमान वाटतो. 18काहाके तिया गोथिहिई सोडीत माहु फासी कोडला गोठीइ विषया माय कोअंलाअ धैर्य नाहा जे ख्रिस्ताने अन्यजाति याहा अधिनतेसाठी वचन अने कर्म, 19चिन्ह अने अदभूत ई पवित्र आत्माआ सामर्थ्यावाही माआजे त्यापोरत कोल्यु इहिंजा का आय यरुशलेमे मधून चारू आरी इल्लुरिकुम पर्यंत ख्रिस्ताच्या सुवर्तेची पुरो-पुरो घोषणा कोअयी. 20पोन माआ मोनाआ इच्छा ए होय का जीही-जीही ख्रिस्ताचे नाव नाहा गोये तिही पर्यंत सुवार्ता होम्लाड़जे एहलो न ओवो का दिहरा बांधीत मेकल्या पायापो को बानदेहे. 21पोन जेहलो लेखिलो होय तेहलूज ओवो, ज्या माहु पर्यंत तियाआ सुवार्ता पुगाड्यु नाहा ते पालिलो अने ज्याहा होमल्ये नाहा ते समाज.

रोम मेहे जाअलो योजना

22याकोअता आय तुमाही आवता फासी-फासी अडथळा आवयू. 23पोन ओमे आव देशामेने माआ कार्याकोता फासी जागू रोली नाहा अने जाअखो वोराम माहु तुमाआ जागे आविलाआ उत्कंठा होय. 24याकोअता जांहा आय स्पेनला जाइताहा तुमाही आविलो जाइअलो काहाके का माहु आशा होय का माहु तीही आवता तुमाआ आरी भेट उवे अने जांहा तुमाआ होबती उवे माआ मोन पोईत आवे तेहलाम तुमु माहु किबी सेटे पर्यंत पोताडीन आपा. 25पोन ओमे ताहा आय पवित्र मांहाहा सेवा कोअता यरुशलेम ला जात होय. 26काहाके का आय मकिदुनिया अने अखयाच्या माहुंहु ओ हाजो वाटेम का यरुशलेमामे पवित्र माहुंमे गरिबांकाजे किबी मदत कोअत्लू. 27तियाहा हाजो ताहा वाटेम, परंतु ते त्याआं कर्जदार होय, काहाके का अन्य जाती केधी आध्यात्मिक गोठीमेहे सहभागी ओयताहा तियाहा पण उचित होय का शारीरिक गोठीमेहे तियाआ सेवा को. 28याकोअता आय ओ काम पुरो कोईत अने तियाहा ए आर्थिक मदत आपित तुमाही आविलो स्पेनला जाइअलो. 29अने आय ओलखीत्लू का जांहा आय तुमाही आवे तेहलाम ख्रिस्ताचे पुरो आशीर्वाद आरी आवे. 30ऐ पाही, आमा प्रभू येशु ख्रिस्ताच्या जागे पवित्र आत्माआ प्रेमाआ स्मरण आपित आय तुमामे विनंती कोअत्लू कामा कोअता परमेश्वराही प्रार्थना कोईलामे माआआरी आग्रहावाही रो 31का आय यहुद्यांचे अविश्वासणाऱ्या आरी वासित रोही अने माआ जी सेवा जी यरुशलेमे साठी होय पवित्र माहुंहु पोइलो, 32अने आय परमेश्वरोओ इच्छावाहि तुमापोओ आनंद आविलो आराम पावेल. 33शांतीचा परमेश्वर तुमाआ आखा सामने राहो आमेन.

Currently Selected:

रोमि 15: NOINT

Highlight

Copy