1 कुरिन्थि 7

वेहवालोओ सिद्धांत

1ती गोठीई विशयामेहे जी तुमा लीखली ओ हाजो होय का माटी बाईही ने सीबे. 2पोन व्याभिचाराच्या बिखीकी हर एक माट्योओ लाडी अने हर एक बोहई माटी रोहूजवे. 3माटी आपाआ बोहई हक्क पुरो कोईओलो; अने तेहलूज लाड़ी पोन आपाआ पतीचा. 4लाडीई डीलोपो अधिकार नाहा पण तिया पतीचा अधिकार होय तेहलूज डोहाआ पण आपाआ डीलोपो अधिकार नाहा, पण बोहई होय. 5तुमु एका दिहरारी अलग रोहू नाहा पण फक्त किबी टायमोपो रोत परस्पर सम्मति कोअली प्रार्थनासाठी समय मिळवा, अने फासाडी एकठे रो एहलो उवूंहू नाहा का तुमाआ असयंमाच्या कारनोवाही शैतान तुमामे पारखे. 6पोन आय जोओ कोत्लू ते आज्ञा कोईत नाहा ताहा सवलत कोईत कोत्लू. 7माआ ए इच्छा होय जेहलो आय होय तेहलूज आखे मांहु रोहू पोन प्रत्येकाहा परमेश्वारापो रोत अलग-अलग वरदान जोडयेहे होय कोडाआ कोडला प्रकारचा अने कोडाआ दिहरा प्रकारचा.

नि वेहवाल वालाहा सलाह

8पोन आय वेहवाल नाह कोईली अने रोंडाली विषयी कोत्लू का त्याकोअता ऐहलेच रोलो हाजो होय जेहलो आय होय. 9पोन ते स्वतः संयम ओवुहू शकत नाहा ताहा वेहवाल कोईत लेदलेए काहाके वेहवाल कोअला कामातूर रोहोलो हाजो होय.

वेहवाल वालाहा सलाह

10ज्याआ वेहवाल उवे होय तियाहा आय नाहा पण प्रभू आज्ञा आपोहो का लाडी लेतजा आपाआ माटिप रोत अलग रोहू नाहा 11अने जर अलग पण उवेताहा दिहरे वेहवाल न कोअता रोअलो किंवा आपाआ डोहा आरी फासी समेट कोईत लेवा अने माटी पण आपाआ लाडीही सोडीत कायना. 12दिहरा मुळे प्रभू नाहा पण आयुज कोत्लू जर पाही लाडी विश्वास कोईत नाहा अने त्याआरी रोंहु खुश होय ताहा तीही सोडीत कायना. 13ज्या बईइ माटी विश्वास कोईत नाहा अने तीआरी रोंहु खुश होय ताहा तीही डोहाहा सोडीत कायना. 14काहाके एहेलू जो माटी विश्वास कोईत नाहा तो लाडी सी पवित्र ओलखिणारा; नाहा ताहा तुमाआ पोऱ्ये अशुद्ध रोल्या ओते पण ओमे ताहा पवित्र होय. 15पोन जो माहु विश्वास कोईत नाहा जर तो जुदो ओतू ताहा जुदो ओवुहू दया एहलो अवस्थाम कोडु पाही किंवा बोईही बंधनात नाहा परमेश्वराने आपाहा मिलून बालीन रोअलाकाजे हादाडये होय. 16काहाके ऐ बुई ताहु नाहाकोत मालुम होय का तू आपाआ डोहाआ तारण कोईत लेही? अने ऐ माटी, ताहु की मालुम का तू आपाआ लाडीई तारण कोईत लेही?

परमेश्वरोओ बुलाहटो होस साला

17जेहलो प्रभूऊ प्रत्येकाहा वाटीत आप्लु होय अने परमेश्वाराहा प्रत्येकाहा जेहलो हादाडये होय तेहलूज तिये सालीलो आय आखे मंडली ऐहलेच नियुक्त कोअत्लू. 18जो सुंता कोअल्यू गोगाडेंए गोल्यो होय तो सुंता न उवलो बोनहू कायना जो सुंता न उवलो हाद्यु होय तिये सुंता न कोईली. 19नाहा सुंता किबी होय अने नाहा सुंता न उवलो पण परमेश्वरोओ आज्ञाहा कोत्लू आखे किबी होय. 20हर एक जोओ ज्या अवस्थाम गोगाडेंए गोल्यो होय तियाआ मायज रोअलो 21जर तू दासो अवस्थाम हाद्यु गोल्यो होय ताहा चिंता कोहू नाहा; पण जर तू मुक्त ओवुहू शकतो ताहा तेहलूज काम को. 22काहाके जो नोकोराहा अवस्थाम हादाडल्यु गोल्यो होय ताहा-ताहा तो प्रभूआ मुक्त कोअल्यू होय तेहलूज जो हाजो अवस्थाम हाद्यु गोल्यो होय ताहा तो ख्रिस्ताआ सेवक होय. 23तुमु किंमत आपित वेसातो लेद्लो होय तुमु मांहाआ सेवक बोनहू नाहा 24ऐ पाही, जो कोडु ज्या अवस्थाम हाद्यु गोल्यो होय तिये तियाहा परमेश्वरा बरोबर रोअलो.

वेहवाल समन्धित प्रश्नोंओ उत्तर

25जुवान पोयरी बद्दल प्रभूऊ कोडलीस आज्ञा माहु जोड़ी नाहा, पण विश्वासयोग्य रोअलाकाजे जीही दया प्रभूऊ मापो कोअयी होय तियाआ प्रकारे सहमती आपोहो. 26माआ विचारोम ओ हाजो होय आजे परीस्थीतीम खोतालो मांहु जेहलो होय तेहलूज रोअलो. 27जर तुमु लाडी होय ताहा त्यापोरोत अलग रोईला प्रयत्न कोहू नाहा अने जर ताआ लाडी नाहा, ताहा बोहई होद कोहू नाहा. 28पोन जर तू वेहवाल कोअनारू पोन ताहा पाप नाहा अने कुवारीने वेहवाल कोल्यु ताहा पाप नाहा पोन एहलाहा शारीरिक दुख उवे अने माहु वासाडीतो होय. 29ऐ पाहीही, आय एहलो कोत्लू का वेल कोम कोअयु गोल्यो होय त्यापोत जिया लाडी होय ते एहलो रोंहु जोवे का जेहेकाय तियाआ लाडी नाहा, 30अने रोडनारे एहलो रोडहू जोवे का जणूकाही रडीत नाहा अने आनंद कोनारामे एहेलू आनंद को का जेहलो का आनंद कोईत नाहा अने वेसातो लेनारा एहलो रोंहु जोवे का त्याजागे जणू किबी-किबी नाहा. 31अने जगाआरी एहलो रोंहु जोवे का हाहराआरी रोत जीवनरे नाहा काहाके आव जुगाआ रिती अने व्यवहार बद्लीलो जातेहे. 32सासोल्यू माआ एह्ली इच्छा होय का तुमामे चिंता ओवुहू कायना, वेहवाल नाह कोईली प्रभूउ गोठीइ चिंतेमध्ये रोतलू का प्रभूहु केहलो खुश मेकीला. 33पोन वाजेवाले मांहु, जो जुगाआ गोठीइ चिंतेमध्ये रोतलू का आपाआ लाडीही कोडला प्रकारे खुश मेकीला. 34वेहवाल कोयु अने वेहवाल न कामकोल्यो पण भेद होय वेहवाल कोयु प्रभूउ चिंतेमध्ये रोत्ले का तो देहिक संसारो चिंता मेहे रोतलेअने आत्माआ बेनुमे पवित्र रोंहु जोवे. 35आय ए गोठी तुमाआ फायदाकोता फोसिवालाकोता नाहा, पण यकोअता का हाजो लागेहे तेहलूज कोल्यु जाहो का तुमु एक मन लागाडीलो ओतगोयु प्रभूउ सेवा बोणीत रोअलो. 36जर कोडु ओ होमजुत्लू आय आपाआ तियाअ कुवारी हक्क देत होयतीया जुवान पंजालो रोल्यो होय अने जरुरी पोन होय ताहा जेहलो जोवे तेहलूज कोईओलो यामे पाप नाहा ताहा तीई वेहवाल ओवुहू आपलो. 37पोन जो मोनुमे स्थिर रोतलू अने तियाहा आवश्यक नाहा पण आपाआ इच्चेप अधिकार मेकोहो अने आपाआ मोनुमे ए गोठी ठेरवीत लेदि होय का तो आपाआ जुवान पोरीही वेहवाल नाह कोईली मेकही, ताहा तो हाजो कोअत्लू. 38त्याकोता जो आपाआ कुवारी वेहवाल कोईत आपोहो, तो हाजो कोअत्लू अने जो आपाआ जुवान्याहा वेहवाल कोईत आपित नाहा तो फासी जाखो हाजो कोअत्लू. 39जोपोरोत कोडा बईइ माहु जिवंत रोतलू तोपोरोत ती त्याआरी बांधीत मेकली होय; पोन जर तीई माटी मोल्यु होय ताहा जे तीही गोमे वेहवाल कोहू सेकोहो पण फक्त प्रभूमध्येच. 40पोन जीही होय जर तेहलीज रोहुताहा माआ विचारोम फासी धन्य होय; अने आय होमजीत्लू का परमेश्वरोओ आत्माआ मामेह पण होय.

Currently Selected:

1 कुरिन्थि 7: NOINT

Highlight

Copy