प्रेरित 13
13
बरनबास होर शाऊला रा भेजणा
1अन्ताकिया री कलीसिया में कई उपदेशक होर भविष्यद्वक्ता थी; जेड़अ बरनबास होर शैमोन जोह नीगर कहलाऊँदा साहा जासका मतलब काला; होर लूकियुस कुरेनी होर चोथाई देशा रे राजा हेरोदेसा रा दूध भाई मनाहेम, होर शाऊल। 2जेबा त्याह बिना ब्रत परमेश्वरा री सेवा करदे लागेदे थी, तेबा पवित्र आत्मा बोलू, मेरी तणी बरनबास होर शाऊला तेऊ कामा का अलग करा जासकि तणी मांई सह शादू। 3तेबा त्याह ब्रत होर प्रार्थना करी करे होर त्याह पैंदे हाथ डाही करे त्याह बिदा करी। 4तेबा त्याह पवित्र आत्मा संघे भेजीदे सिलुकिया बे नाठे, होर तखा का जहाजा में चहडी करे साईप्रस टापू बे नाठे।
पौलुसा री पहिली प्रचार-यात्रा
5होर सलमीसा में पुजीकरे, परमेश्वरा रा बचन यहूदियों रे प्रार्थना घरा में शूणाऊ यूहन्ना त्याह रअ सेबक थी। 6त्याह तेऊ टापू में नांहदे-नांहदे पाफुस नगरे पूजे। तखे त्याह यीशु ना रअ एक यहूदी जादूगर होर झूठअ भविष्यवक्ता भेटअ। 7सह बईद सिरगियुस पौलुसा संघे थी, जोह बुद्धिमान मणश थी। तेऊ बरनबास होर शाऊल आपु सेटा शदाई करे परमेश्वरा रा बचन शूणना चाहू। 8पर इलीमास टोनहे, किबेकी यह तेऊरे ना रा मतलब, त्याहरा बिरोध करी करे राज्यपाला वे बुशाह करणे का रोकणे चाही। 9तेबा शाऊल जासका ना लऊ पौलुस भी साहा पवित्र आत्मा संघे परिपूर्ण होई करे तेऊ फेरा बे टकटकी लाई लगातार तेउ हेरदअ रहु होर बोलू, 10हे सारे कपटी होर सब चतुराई संघे भरीदे शैताना री संतान, सकल धर्मा रे दुश्मन, कैह ताए परमेश्वरा रे सीधे रास्ते डींगे करने नांई छाडणी? 11एबा हेर, परमेश्वरा रअ हाथ ताह पैंदे लागअदअ साहा; होर एबा तूह कुछ वक्त तणी कांणअ रंहणअ होर ताह धूपा भालणा नांई भेटणा। तेबा तेभरी धुंधलापन होर न्याहरा तेऊ पैंदे छाऊ, होर सह ओहरी-पोहरी लोडदअ लागअ की कोई तेऊरअ हाथ डाकी सके। 12तेबा बईदे जोह कुछ होऊ, तेऊ हेरी करे होर परमेश्वरा रे उपदेशा कअ चकित होई करे बुशाह करू।
पिसिदिया रा अन्ताकिया में
13पौलुस होर तेऊरे साथी पाफुसा नगरा में जहाज खोली करे पंफुलिया रे पेरगा में आए; होर यूहन्ना त्याह छाड़ी करे यरूशलेमा बे बापस आउए। 14पेरगा का जेह बढ़ी करे त्याह पिसिदिया का अन्ताकिया में पूजे; होर सब्ता री धयाडी प्रार्थना घरा में नाहशी करे बैठे 15व्यवस्था होर भविष्यद्वक्ता री कताबा पढ़ने बाद प्रार्थना घरा रे सरदार फयाड़ा भेजू, हे भाईओ, ज़ेबा लोका बे शांति री तणी थारे मने कोई गला साहा तेबा बोला। 16तेबा पौलुसे खडे होई करे हाथा संघे इशारा करू होर बोलू, हे इस्राएलियों होर परमेश्वरा का डरणे आलओ शूणा। 17या इस्राएली लोका रे परमेश्वरे हमारे बजुर्ग चुनी, होर जेभरे त्याह मिस्रा देशा में परदेशी होई करे रंहदा थी, तेबा त्याह री उन्नति करी, होर बलबंत भुजा का काह्डी। 18सह कोई चाहली साला तक बूणे त्याह संघे रहू। 19होर कनान देशा में साता जाति रा नाश करी करे कोई साढ़े चार शअ साला में त्याह री मीरासा में करू। 20ऐता बाद तेऊ शमूएल भविष्यद्वक्ता तक त्याह न्यायी ठहराई। 21तेता बाद त्याह एक राजा मांगू, तेबा परमेश्वर चाहली साला तणी बिन्यामीना रे गोत्रा मेंज़ा का एक मणश; मतलब कीशा रअ शोहरू शाऊल त्याह रअ राजा ठहराऊ। 22तेबा सह अलग करी करे दाऊद त्याह रअ राजा बणाऊ; जासके बारे में तेऊ गुआही दीनी, माहा एक मणश यिशै रअ शोहरू दाऊद, मेरे मना रे साबे भेटअ; तेऊ मेरी सारी इच्छा पूरी करणी।
23तेऊरे बंशा में का परमेश्वरे आपणी प्रतिज्ञा रे साबे इस्राएला सेटा एक उद्धारकर्ता, मतलब यीशु भेजू। 24तेऊरे इंहणे का पहिले यूहन्ना सभी इस्राएली बे मन फिराव का बपतिस्मा रा प्रचार करू। 25जेबा यूहन्ना आपणी सेवा पूरी करी छेकि, तेबा तेऊ बोलू, तमे माह कैह समझा? हाँऊ सह नांई आंहदअ। पर हेरा, माह बाद एक इंहण आलअ साह, जासकी टांगा का बूटा खोलण रे लायक भी हाँऊ नांई आंहदअ।
26हे भाईओ, तमे अब्राहमा री संतान साहा; होर तमे परमेश्वरा का डरदा, तमा सेटा एऊ उद्धारा रअ बचन भेजूद साहा। 27किबेकी यरूशलेमा में रहणे आले होर त्याह रे सरदारे, ना सह पछेणु होर ना भविष्यद्वक्ता री गला समझी, जोह हर सब्ता री धयाडी पढ़दा, तेबा सह दोषी ठहराई करे त्याह गला पूरी करी।
28त्याह मारणे री तणी तेऊ में कोई भी दोष नांई पाऊ, तेबा भी पिलातुसा का बिनती करी तेऊ मारा। 29जेबा त्याह तेऊर बारे में लिखिदी सभे गला पूरी करी, तेबा सह क्रुसा का ऊतरी करे कब्रा में डाहू।
30पर परमेश्वरे सह मुंऐ दे मेंज़ा का जिऊंद करू। 31होर सह त्या जोह तेऊ संघे गलीला कअ यरूशलेमा बे आए, बहू धयाडी तक हेरदअ रहू, लोका एबा त्याह री गुआही सा। 32हाम तमा ऐसा प्रतिज्ञा रे बारे में जोह बजुर्गा संघे करी दी साहा, यह सुसमाचार शूणाऊंदा। 33कि परमेश्वर यीशु जिलाई करे, सह प्रतिज्ञा माह री संताना री तणी पूरी करी, जेहड़ा दूजे भजना में लिखुदा, तूह मेरअ शोहरू सा आज मांई ही तूह जन्माऊंदअ साहा। 34होर तेऊरे ऐसा रीति संघे मुंऐ दे मेंज़ा का जिलाने रे बारे में भी यह भी साहा कि सह कदी ना सड़े, तेऊ एडहा बोलू, माह दाऊदा री पबित्र होर अटल कृपया ताह पैंदे करणी जासका बाईदा माए दाऊदा संघे करूदा थी। 35तेबा तेऊ एकी भजना में बोलू दा साहा, ताह आपणे पबित्र जना सड़ने नांई दीणअ। 36किबेकी दाऊद तअ परमेश्वरा री इच्छा रे साबे आपणे वक्ता में सेबा करी करे सुतअ, होर आपणे बजुर्गा संघे जा मिलु, होर जोह सडू। 37पर जोह परमेश्वरे जिऊंद करू सह कधी नांई सडू। 38तेबा हे भाईओ, तमे जाणा कि जोह फयाडा तमाबे शूणाऊणा लाऊ दा, सह यह साहा की यीशु संघा पापा री क्षमा भेटा, मूसा री गला जासु व्यवस्था का तमा मुक्त नाही करी सकी। 39होर याह गला मेंज़ा का तमे मूसा री व्यवस्था का निर्दोष नांई ठहरी सकदे थी, त्याह ही सभी में का एक बुशाह करन आलअ तेऊर संघे ठहरदा।
40तेबा चुश्त रहा, एडहा ना हो की भविष्यद्वक्ता री कताबा में आऊअ होर तमा पैंदे नांई ईछे;
41हे निंदा करण आलओ हेरा होर चकित होआ, होर खत्म होआ;
किबेकी हाँऊ थारे धयाडे मेंज़ा का एक काम करदा,
एडहा काम कि जेबा तमाक एतकी चर्चा करे,
तमा कधी बुशाह नांई करणा।
42त्याहरे बागे निखदअ वक्ते लोका त्याह कअ बिनती करदे लागे की आगले सब्ता री धयाडी हामा याह गला भी शूणाए। 43जेबा सभे प्रार्थना घरा का ऊठी तेबा यहूदी होर यहूदी पूजा में आएदे भक्ता में बहू पौलुसा होर बरनबासा पीछे हांडदे लागे; होर त्याहे त्याहा संघे गला करी समझाई की परमेश्वरा रे अनुग्रहा में बणी रहा।
पौलुसा रे साबे अन्यजाति बे प्रचारा करणा
44आगली सब्ता री धयाडी नगरा में सभे लोका परमेश्वर रा बचन शूणन री तणी कठे होई। 45पर यहूदी भीड़ भाली करे जलना संघे भरी होर निंदा करदे-करदे पौलुसा रे बिरोधा में बोलदे लागे। 46तेबा पौलुस होर बरनबास निडर होई करे बोलू, जरुरी, कि परमेश्वर रा बचन पहिले तमाबे शूणाए; पर जेबा तमे तेऊ दूर हटाऊंदा, होर आपणे आपा बे अनन्त जीबना रे लायक नांई ठहरांऊद, तेबा हेरा, हामे अन्यजाति फेरा बे फीरा। तेबा एबा हामे अन्याजाति लोगों की तरफा फिरने रा बिचार करा। 47किबेकी परमेश्वरे हामा बे आज्ञा दीनी दी साहा, मांई तूह अन्यजाति बे ज्योति ठहराऊ कि तूह धरती रे छोर तणी उद्धारा रअ दुआर हो। 48यह शूणी अन्यजाति खुश होई, होर परमेश्वरा रे बचना री बड़ाई करदे लागे। होर जेतरा अनन्त जीबना बे ठहराई, त्याह बुशाह करू। 49तेबा परमेश्वरा रा बचन सारे देशे फैलदा लागा। 50पर यहूदी भक्त होर पूजा करन आली वेटडी होर नगरा रे खासे लोका ऊकसाई, होर पौलुस होर बरनबासा रे खिलाफ झगड़ा करी करे त्याह आपणी सीमा का काहडी। 51तेबा त्याह सामने आपणी टांगा री धूड साफ करी करे इकुनियुमा बे नाठे। 52होर चेले खुशी होर पवित्र आत्मा संघे परिपूर्ण हुंदे रही।
Currently Selected:
प्रेरित 13: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
